Kuti Mwaba Cibusa wa kwa Yehova

Yehova alafwaya mwamwishiba bwino. Mulandu nshi? Enekela ukuti nga twaishiba imibele yakwe, ifyo acita ifintu ne fyo afwaya ukutucitila, kuti twalafwaisha ukuba ifibusa fyakwe. Bushe cine cine kuti mwaba cibusa wa kwa Lesa? (Belengeni Amalumbo 25:14.) Finshi mufwile ukucita pa kuti mube cibusa wa kwa Lesa? Baibo ilasuka aya mepusho, kabili ilalondolola no mulandu bucibusa twingakwata na Yehova bwacindamina ukucila bucibusa ubo twingakwata no muntu uuli onse.

1. Finshi Yehova afwaya ukuti mucite?

“Palameni kuli Lesa, na o akapalama kuli imwe.” (Yakobo 4:8) Bushe aya amashiwi yalola mwi? Yehova afwaya ukuti mube cibusa wakwe. Nalimo bamo kuti cabakosela ukusumina ukutila kuti baba cibusa wa kwa Lesa, pantu tabamumona. Na lyo line, Yehova alitweba mu Cebo cakwe Baibo fyonse ifingalenga twaishiba imibele yakwe pa kuti tube ifibusa fyakwe. Nga tulebelenga ifyo Yehova atweba mu Baibo, bucibusa bwesu na ena bulakoselako nangu ca kuti tatwatala atumumonapo.

2. Cinshi twingalandila ukuti Yehova e cibusa umusuma sana uo mwingakwata?

Takwaba uwamutemwa ukucila ifyo Yehova amutemwa. Afwaya muleba ne nsansa no kulapepa kuli ena pa kuti alemwafwa. Kuti ‘mwapoosa amasakamika yenu yonse pali ena, pantu alamusakamana.’ (1 Petro 5:7) Yehova ali-iteyanya ukwafwa, ukusansamusha, no kukutika ku fibusa fyakwe.—Belengeni Amalumbo 94:18, 19.

3. Finshi Yehova enekela ifibusa fyakwe ukulacita?

Yehova alitemwa abantu bonse, “lelo abalungama e baba sana ifibusa fyakwe.” (Amapinda 3:32) Yehova enekela ifibusa fyakwe ukulaesha na maka ukulacita ifintu ifyo amona ukuti fisuma, no kukanalacita ifyo amona ukuti fibi. Abantu bamo bamona ukutila te kuti bakumemo ukulacita fyonse ifyo Yehova amona ukuti fisuma, kabili te kuti bakumanishe ukutaluka kuli fyonse ifyo amona ukuti fyalibipa. Nomba Yehova alalangulukilako. Bonse abamutemwa kabili abesha na maka ukulacita ifimusekesha, alabasuminisha ukuba ifibusa fyakwe.—Amalumbo 147:11; Imilimo 10:34, 35.

SAMBILILENI NA FIMBI

4. Abrahamu ali ni cibusa wa kwa Yehova

Ilyashi lya mu Baibo ililanda pali Abrahamu (uo baleita no kuti Abramu) lilalenga twaishiba ifyo twingacita pa kuti tube ifibusa fya kwa Lesa. Belengeni ilyashi ililanda pali Abrahamu pa Ukutendeka 12:1-4. Lyena lanshanyeni aya mepusho:

• Cinshi Yehova aebele Abrahamu ukucita?

• Finshi Yehova alaile Abrahamu?

• Bushe Abrahamu acitile shani ilyo Yehova amwebele ifya kucita?

5. Ifyo Yehova enekela ifibusa fyakwe ukulacita

Ilingi line tulenekela ifibusa fyesu ukutucitilako fimo.

• Finshi fimo ifyo mwingatemwa ifibusa fyenu ukumucitila?

Belengeni 1 Yohane 5:3, lyena lanshanyeni ici cipusho:

• Finshi Yehova enekela ifibusa fyakwe ukulacita?

Pa kuti tuleumfwila Yehova, nalimo tulingile ukwalula imibele yesu nelyo ukwaluka muli fimo. Belengeni Esaya 48:17, 18, lyena lanshanyeni ici cipusho:

• Cinshi Yehova ebela ababa ifibusa fyakwe ukwaluka muli fimo?

6. Ifyo Yehova afwa ifibusa fyakwe

VIDIO: Yehova Alincitila Ifingi Nga Nshi (3:20)

• Bushe Yehova ayafwile shani umwanakashi waciba muli vidio pa kuti aleke ukumfwa ububi no kusakamikwa sana?

Belengeni Esaya 41:10, 13, lyena lanshanyeni aya mepusho:

• Finshi Yehova alaya ukucitila bonse ababa ifibusa fyakwe?

• Bushe mulemona ukutila Yehova kuti aba cibusa musuma? Cinshi mwa-asukila ifyo?

7. Tufwile ukulalanshanya na Yehova pa kuti tube ifibusa fyakwe

Abantu nga balelanshanya balaba sana ifibusa. Belengeni Amalumbo 86:6, 11, lyena lanshanyeni aya mepusho:

• Kuti twalanda shani na Yehova?

• Bushe Yehova alanda shani na ifwe?

IFYO MUSAMBILILE

Yehova afwaya ukuba Cibusa wenu, kabili akamwafwa ukupalama kuli ena.

Ukupitulukamo

• Bushe Yehova afwa shani ifibusa fyakwe?

• Cinshi Yehova ebela ifibusa fyakwe ukwaluka muli fimo?

• Bushe mulemona ukuti Yehova enekela ifibusa fyakwe ukucita ifintu ifyo bashingakumanisha? Cinshi mulemwena ifyo?

ISHIBILENIPO NA FIMBI

Kuti mwanonkelamo shani nga mwaba cibusa wa kwa Lesa?

“Yehova—Ni Lesa Walinga Ukwishiba” (Ulupungu lwa kwa Kalinda, February 15, 2003)

Moneni ifyo mwingacita pa kuti mube cibusa wa kwa Lesa.

“Kuti Nacita Shani pa Kuti mbe Cibusa wa kwa Lesa?” (Ifipusho Abacaice Bepusha, ne Fyasuko Ifingabafwa, Ibuuku 2, icipandwa 35)

Moneni ifyalengele umwanakashi umo alemona ukuti ukuba cibusa wa kwa Yehova kwalimwafwile.

“Nshalefwaya Ukufwa!” (Ulupungu lwa kwa Kalinda Na. 1 2017)

Umfweni ifyo abacaice bamo balandile pa fyo bomfwa pa kuba ifibusa fya kwa Yehova.

Busuma Nshi Bwaba mu Kubela Ifibusa na Lesa? (1:46)

6. Nga twabatishiwa tulaba mu lupwa lwa kwa Yehova

Nga twabatishiwa tulaba mu lupwa ulwaikatana ulwa mwi sonde lyonse. Nangu ca kuti twalipusana inkulilo kabili twikala mu fyalo ifyapusanapusana, twasumina fye ifintu fimo fine kabili bonse twikala ukulingana na mafunde ayalanda pa mibele iyo Abena Kristu balingile ukuba nayo. Belengeni Amalumbo 25:14 na 1 Petro 2:17, lyena lanshanyeni ici cipusho:

• Bushe ukubatishiwa kulenga umuntu aba cibusa wa musango nshi uwa kwa Yehova e lyo na bantu bambi abapepa Yehova?

2. Kuti twacita shani pa kuti tuleba ne nsansa pali ino nshita?

Yehova atupangile ukuti ‘tulekabila ifya kwa Lesa,’ e kutila ukulafwaya ukumwishiba no kulamupepa. (Belengeni Mateo 5:3-6.) Yehova afwaya twaba sana ifibusa fyakwe, ‘tule-enda mu nshila shakwe shonse, tulemutemwa kabili tulemubombela no mutima wesu onse.’ (Amalango 10:12; Amalumbo 25:14) Nga tulecita ifi tukaba ne nsansa, nangu ca kuti natukwata amafya. Nga tulepepa Yehova tulaba ne nsansa, pantu ninshi tuleikala ukulingana ne fyo afwaya tuleikala.