Pepa Yehova ne Minwe Yasanguluka

KEMBA wa malumbo, pe samba lya kupuutwamo aimbile ati: “Ndesambe minwe yandi mu kaele, no kushinguluke ciipailo cenu, mwe Yehova.”—Ilumbo 26:6.

Pa kushika aya mashiwi, Davidi pambi alelosha ku mwata wa bashimapepo ba bwina Lebi aba mu Israele uwa kunina pa matabo ya cipailo lyene no kubika ilambo lyabo pa mulilo. Lelo ilintu bashilacita iyi ncitilo ya kupepa, bashimapepo balefwaikwa ukusamba iminwe yabo na makasa. Ici tacali kantu fye akanono. Ukukaanacita uyu mulimo wa kutendekelako shimapepo aali no kulufishapo ubumi!—Ukufuma 30:18-21.

Mu mampalanya, ukusamba kufumamo ukusanguluka kwa ku mupashi no kwa mibele. (Esaya 1:16; Abena Efese 5:26) Yehova afwaya ifwe ‘ukushinguluke ciipailo cakwe’ ilelo ukupitila mu kumubombela. Lelo afwaya ukuti tucite fyo ne minwe yasanguluka—nga fintu Davidi alandile, iminwe iyasambwa “mu kaele.” Ici cifwaikwa tacaba kantu akanono, pantu abakowela tabakapyane Ubufumu bwa kwa Lesa. (Abena Galatia 5:19-21) Ubumi mu milimo ya bukapepa tabusuminisha umo ukuipoosa mu mibele ya bucisenene. Muli fyo umutumwa Paulo alembele ukuti: “Ntuutaulo mubili wandi, no kuuteko busha; epali, ilyo nabila kuli bambi, nabo wakaanwa ne mwine.”—1 Abena Korinti 9:27.

Abo abafwaya ukusuminisha kwa bulesa ne nsansa sha cine cine bafwile ukubombela Yehova ne minwe iyasanguluka. Ukupala Davidi, benda “muli bumpomfu bwa mutima, na mu kutambalala.”—1 Ishamfumu 9:4.