Ifyo Mwingacita pa Kuti Mulenonkelamo Sana mu Kubelenga Baibo

Bushe mwalibala amufwayapo ukutendeka ukubomba umulimo uukalamba, e lyo mwamona ukutila nalimo te kuti mukumanishe uku-ubomba? Pa kuti cimwangukile uku-ubomba, nalimo kuti mwa-akanya uyo mulimo mu milimo iinono. Ifi fine e fyo caba na ku kubelenga Baibo. Nalimo kuti mwayipusha ukuti, ‘Bushe ni pesa ningatendekela ukubelenga?’ Muli lino isambililo, twalalanda pa fintu fimo ifya-anguka ifyo mwingacita pa kuti muleipakisha ukubelenga no kusambilila Baibo.

1. Cinshi tulingile ukulabelengela Baibo lyonse?

Umuntu uubelenga Baibo lyonse nelyo “amafunde ya kwa Yehova,” alaba ne nsansa kabili ifintu filamwendela bwino. (Belengeni Amalumbo 1:1-3.) Nga e lyo muletendeka ukubelenga Baibo, mule-esha ukubelenga fye mu mamineti ayanono cila bushiku. Ilyo muleya muleishibilako Icebo ca kwa Lesa, mukalaipakisha ilyo mulecibelenga.

2. Finshi mulingile ukucita pa kuti mulenonkelamo ilyo mulebelenga Baibo?

Pa kuti tulenonkelamo sana ilyo tulebelenga Baibo, tufwile ukubala twaleka ukubelenga, pa kuti tutontonkanye pa fyo twabelenga e lyo twatwalilila. Tufwile ukubelenga e lyo no ‘kutontonkanyapo sana.’ (Yoshua 1:8, futunoti.) Ilyo mulebelenga, muleyipusha amepusho pamo nga: ‘Bushe ifi ndebelenga filensambilisha finshi pali Yehova Lesa? Bushe kuti nabomfya shani ifi ifyebo mu mikalile yandi? Kuti nabomfya shani ifi fyebo ukwafwako abantu bambi?’

3. Ni nshita nshi mwingalabelenga Baibo?

Bushe cilamukosela ukusanga inshita ya kubelenga Baibo? Fwe bengi cilatukosela. Mule-esha ‘ukubomfya bwino inshita.’ (Abena Efese 5:16) Kuti mulecita ifi nga mulepaatulako inshita ya kubelenga Baibo cila bushiku. Abantu bamo basalapo ukubelenga Baibo ulucelo. Bambi basalapo ukubelenga mu nshita ya kasuba, nalimo ilyo baletuusha. E lyo bamo basalapo ukubelenga Baibo icungulo ilyo bashilaya mu kulaala. Inga imwe ni nshita nshi ingamuwamina?

SAMBILILENI NA FIMBI

4. Sambilileni ifyo mwingacita pa kuti muleipakisha ukubelenga Baibo

Nalimo te kuti canguke ukutendeka ukubelenga Baibo. Na lyo line, kuti muleipakisha ukubelenga Baibo nga filya mwingatendeka ukuipakisha ukulya ifya kulya ifyo mushabalile amulyapo. Belengeni 1 Petro 2:2, lyena lanshanyeni ici cipusho:

• Bushe muletontonkanya ukuti nga mwalabelenga Baibo cila bushiku, kuti mwalaipakisha ica kuti mwalafwaisha no kulaibelenga lyonse?

Tambeni VIDIO pa kuti mumone ifyo bamo batendeke ukuipakisha ukubelenga Baibo. Lyena lanshanyeni amepusho yakonkapo.

VIDIO: Icalengele Imisepela Ukutemwa Icebo ca kwa Lesa (5:33)

• Mafya nshi abacaice twacimona muli vidio bacimfishe?

• Cinshi cabafwile ukukanaleka ukubelenga Baibo?

• Finshi bacitile pa kuti batemwe sana ukubelenga Baibo?

Ifyo mwingacita pa kuti mutendeke ukulabelenga Baibo:

• Mufwile ukusala Baibo iyo bapilibula bwino, kabili iya-anguka ukumfwa. Kuti mwaesha ukubomfya Baibo ya Amalembo ya Calo Cipya nga e ko yaba mu lulimi lwenu.

• Pa kubala kuti mwabelenga ifipandwa umwaba ilyashi ilyo mwingatemwa sana. Pa kuti mwishibe ifyo mwingacita, kuti mwabomfya charti iileti “Tendekeni Ukubelenga Baibo.”

• Muleconga ifipandwa ifyo mwabelenga. Mulebomfya charti iileti “Ishibeni Apo Mufikile Ukubelenga Baibo” iili muli cino citabo.

• Mulebomfya JW Library^®. Mu JW Library kuti mwabelenga nelyo ukukutika kuli Baibo ukuli konse mu ndimi ishalekanalekana ukubomfya foni, kompyuta, nelyo tabuleti.

• Mulebomfya ifyebo fyalundwako ifyaba muli Baibo ya Amalembo Ya Calo Cipya. Mu fyebo fyalundwako mwaliba amamapu, amacharti, ne cipande citila Amashiwi ya mu Baibo ne fyo Yapilibula. Ifi fyonse kuti fyalenga mwalaipakisha ukubelenga Baibo.

5. Mulepekanya ilyo mushilatendeka ukusambilila Baibo

Belengeni Amalumbo 119:34, lyena lanshanyeni ici cipusho:

• Busuma nshi bwaba mu kupepa ilyo mushilatendeka ukubelenga Baibo nelyo ilyo mushilatendeka ukupekanya isambililo lya Baibo?

Kuti mwacita shani pa kuti mulenonkelamo sana lyonse ilyo mulesambilila Baibo? Ilyo mulepekanya isambililo muli cino citabo, mule-esha ukucita ifyakonkapo:

1. Mulebelenga amaparagrafu ya kubalilapo ayali mwi sambililo.

2. Mulemona amalembo ayalimo no kuyabelenga, kabili mule-esha ukumona ifyo yampene ne fili mwi sambililo.

3. Muleshila pa mashiwi umuli amasuko ku mepusho ayali mwi sambililo. Nga mulecita ifi cikamwangukila ukulanshanya na bamusambilisha Baibo ilyo mulesambilila.

Bushe mwalishiba ici cishinka?

Inte sha kwa Yehova balabomfya amaBaibo ayalekanalekana. Na lyo line, tubomfya sana Baibo ya Amalembo ya Calo Cipya pantu yalipilibulwa bwino, yalyanguka ukumfwa, kabili mwaliba ne shina lya kwa Lesa.—Moneni icipande ca pa jw.org icitila “Bushe Inte sha kwa Yehova Balikwata Baibolo Yabo?”

IFYO MUSAMBILILE

Pa kuti mulenonkelamo sana mu kubelenga Baibo, mufwile ukutantika inshita ya kubelenga, mufwile ukupepa pa kuti muleumfwikisha ifyo mulebelenga, kabili mufwile ukupekanya ilyo mushilatendeka ukusambilila Baibo.

Ukupitulukamo

• Finshi fingamwafwa pa kuti mulenonkelamo sana mu kubelenga no kusambilila Baibo?

• Ni nshita nshi mwingalabelenga no kusambilila Baibo?

• Mulandu nshi cawamina ukulapekanya ilyo mushilatendeka ukusambilila Baibo?

ISHIBILENIPO NA FIMBI

Moneni fimo ifingamwafwa pa kuti mulenonkelamo sana mu kubelenga Baibo.

“Ifyo Mwingacita pa Kuti Mulenonkelamo Sana mu Kubelenga Baibolo” (Ulupungu lwa kwa Kalinda Na. 1 2017)

Sambilileni inshila shitatu isho mwingabomfya pa kubelenga Baibo.

“Bushe Baibolo Kuti Yangafwa Shani?—Ulubali 1: Ukwishiba Ifyaba mu Baibolo” (Icipande ca pa jw.org)

Moneni ifingalenga mwatemwa ukubelenga Baibo.

“Bushe Baibolo Kuti Yangafwa Shani?—Ulubali 2: Ulecita Ifingalenga Watemwa Ukubelenga Baibolo” (Icipande ca pa jw.org)

Moneni ifyo ababelenga Baibo pa myaka iingi bacita

Ifyo Mwingacita pa Kuti Muleisambilisha Bwino Baibolo (2:06)

4. Twalilileni ukulalanshanya na Cibusa wenu uwa pa mutima

Ipepo no kusambilila Baibo nafilenga mwaba cibusa wa kwa Yehova. Nomba bushe ipepo no kusambilila Baibo kuti fyalenga shani mwapalama sana kuli ena?

Belengeni Amalumbo 62:8, lyena lanshanyeni ici cipusho:

• Finshi mwingalanda ilyo mulepepa pa kuti mukoshe bucibusa bwenu na Yehova?

Belengeni Amalumbo 1:2, lyena lanshanyeni ici cipusho:

• Finshi mufwile ukulacita ilyo mulebelenga Baibo pa kuti mukoshe bucibusa bwenu na Yehova?

Finshi mulingile ukucita pa kuti munonkelemo sana ilyo muleisambilisha Baibo? Pa kuti mumone fimo ifyo mwingacita, tambeni VIDIO, lyena lanshanyeni amepusho yakonkapo.

VIDIO: Ifyo Mwingacita pa Kuti Muleisambilisha Bwino (5:22)

• Pa fyaciba muli vidio finshi ifyo mwingatemwa ukubomfya ilyo muleisambilisha?

• Lyashi nshi ilyo mwingatemwa ukuisambilishapo?