ISAMBILILO 55
Muleafwilisha Icilonganino Mwabamo
Mwi sonde fye lyonse, abantu abengi nga nshi balaba ne nsansa ilyo balebombela Yehova mu filonganino baba. Balatasha pa babatungulula kabili balaitemenwa ukwafwa icilonganino mu nshila ishalekanalekana. Bushe ifi twalandapo e fyo na imwe mumfwa?
1. Kuti mwabomfya shani inshita yenu na maka ku kwafwa icilonganino mwabamo?
Bonse fye kwaliba ifyo twingacita pa kwafwa icilonganino. Ku ca kumwenako, bushe bamo mu cilonganino mwaba bakoloci nelyo balalwalilila? Bushe kuli ifyo mwingacita pa kubafwa ukuya mu kulongana? Nelyo bushe kuti mwabafwako ukuya mu kushita ifintu nelyo ukubabombelako imilimo imo iya pa ng’anda? (Belengeni Yakobo 1:27.) Na kabili kuti twaitemenwa ukuwamya nelyo ukulungishako ifyonaike pa Ng’anda ya Bufumu. Takwaba nangu umo uutupatikisha ukubombako iyi imilimo. Ukutemwa Lesa na bantu e kulenga ‘tuleipeelesha fwe bene.’—Amalumbo 110:3.
Inte sha kwa Yehova ababatishiwa kuti ba-afwa icilonganino mu nshila na shimbi. Bamunyinefwe abafika pa fifwaikwa ifya mu Malembo kuti baba ababomfi batumikila kabili mu kupita kwa nshita kuti baba baeluda. Bamunyinefwe na bankashi mu cilonganino kuti babombako bupainiya pa kuti balebombesha mu mulimo wa kubila imbila nsuma. E lyo bambi nabo kuti babombako umulimo wa kukuula ifikuulwa fya kupepelapo nelyo ukuya mu kubombela ku ncende imbi ukwaba ukukabila.
2. Kuti twabomfya shani indalama ne fintu fimbi ifyo twakwata ku kwafwa icilonganino?
Kuti ‘twacindika Yehova ku fyuma fyesu.’ (Amapinda 3:9) Tulatemwa ukubomfya indalama ne fintu fimbi ifyo twakwata ku kutungilila icilonganino twabamo e lyo no mulimo wa kubila imbila nsuma mwi sonde lyonse. (Belengeni 2 Abena Korinti 9:7.) Indalama tusangula balashibomfya na ku kwafwilisha abaponenwe na masanso ayakalamba. Abengi balasalapo ‘ukupaatwilako’ libela ifyo bafwile ukulasangula lyonse. (Belengeni 1 Abena Korinti 16:2.) Kuti twasangula ukubomfya utubokoshi utuba pa fifulo fya kupepelapo nelyo ukubomfya Intaneti pa donate.jw.org. Yehova afwaya tulebomfya ifyo twakwata pa kulanga ukuti twalimutemwa ilyo tulemubombela.
SAMBILILENI NA FIMBI
Moneni fimo ifyo mwingacita pa kwafwa icilonganino.
3. Kuti twabomfya indalama nelyo ifintu fimbi ifyo twakwata
Yehova na Yesu batemwa uupeela ne nsansa. Ku ca kumwenako, Yesu alitashishe mukamfwilwa uwakwete fye utundalama utunono, lelo uwapeele Yehova. Belengeni Luka 21:1-4, lyena lanshanyeni aya mepusho:
Bushe tulingile ukusangula indalama ishingi pa kuti Yehova atemwe?
Bushe Yehova na Yesu bomfwa shani nga tuleitemenwa ukusangula imisangulo?
Pa kuti mwishibe ifyo imisangulo tusangula baibomfya, tambeni VIDIO. Lyena lanshanyeni icipusho cakonkapo.
Bushe imisangulo baibomfya shani ukwafwilisha ifilonganino mwi sonde lyonse?
4. Kuti twaipeelesha ukubombako ne milimo imbi
Mu nshita balelemba Baibo, abalepepa Yehova baleitemenwa ukuwamya ififulo fya kupepelapo. Kanshi tabalepelela fye pa kusangula indalama. Belengeni 2 Imilandu 34:9-11, lyena lanshanyeni ici cipusho:
Bushe abena Israele bonse bacitile shani pa kuti bafwilisheko ukuwamya ing’anda ya kwa Yehova nelyo icifulo ca kupepelapo?
Pa kuti mumone ifyo Inte sha kwa Yehova bapashanya Abena Kristu abaliko mu nshita balelemba Baibo, tambeni VIDIO. Lyena lanshanyeni amepusho yakonkapo.
Cinshi cacindamina ukulasunga Amayanda yesu aya Bufumu aya busaka no kulawamya ifileonaika?
Finshi fimo ifyo mwingacita pa kuti na imwe mwafwilisheko ukubomba uyu mulimo?
5. Bamunyinefwe kuti babombako imilimo na imbi mu cilonganino
Baibo ikoselesha Abena Kristu abaume ukubomba apengapela amaka yabo ukwafwa icilonganino. Pa kuti mumone ifyo bengacita, tambeni VIDIO. Lyena lanshanyeni icipusho cakonkapo.
Muli vidio twatamba, finshi ba Ryan bacitile pa kuti balebombesha mu cilonganino?
Baibo yalilondolola ifyo bamunyinefwe bafwile ukuba pa kuti bafikepo ukuba ababomfi batumikila na pa kuti bafikepo ukuba baeluda. Belengeni 1 Timote 3:1-13, lyena lanshanyeni aya mepusho:
Bushe bamunyinefwe abalebombesha pa kuti babe ababomfi batumikila na balebombesha pa kuti babe baeluda bafwile ukuba shani?
Inga indupwa shabo shifwile ukuba shani?—Moneni icikomo 4 na 11.
Nga ca kuti bamunyinefwe bafikapo pali ifi fyonse ififwaikwa, bushe aba mu cilonganino bonse banonkelamo shani?
BAMO KUTI BAIPUSHA ABATI: “Bushe Inte sha kwa Yehova bafumya kwisa indalama babomfya pa kubomba umulimo wabo?”
Kuti mwabasuka shani?
IFYO MUSAMBILILE
Yehova alatasha sana pa fyo tuipeelesha ukwafwa icilonganino ukubomfya inshita yesu, amaka, indalama, e lyo ne fintu fimbi ifyo twakwata.
Ukupitulukamo
Kuti twabomfya shani inshita yesu na maka ku kwafwa icilonganino?
Kuti twabomfya shani indalama ne fintu fimbi ifyo twakwata ku kwafwa icilonganino?
Finshi mwingatemwa ukucita pa kuti mwafwe icilonganino?
ISHIBILENIPO NA FIMBI
Belengeni ici cipande pa kuti mumone ukuti Yehova tenekela ababomfi bakwe ukulapeela ica pe kumi.
“Finshi Baibolo Ilanda pa Kupeela ica pe Kumi?” (Icipande ca pa jw.org)
Baibo yalilanda pa milimo iyo abaume ababatishiwa bengabomba. Nomba finshi abanakashi ababatishiwa balingile ukucita pa kuti babombeko iyi imilimo?
Moneni ba Nte bamo abashipa kabili abaipeelesha pa kuti batwale impapulo kuli bamunyinabo.
Belengeni ici cipande pa kuti mumone uko tufumya indalama tubomfya mu mulimo wesu, ukupusanako ne fyo ifilonganino fya mapepo fimbi ficita.
“Bushe ni kwi Inte sha kwa Yehova Bafumya Indalama Babomfya mu Mulimo Wabo?” (Icipande ca pa jw.org)