“Cindika Yehova ku Fyuma Fyobe”—Mu Nshila Nshi?

“CINDIKA Yehova ku fyuma fyobe, na ku fya ntanshi fya cibwesha cobe conse.” Muli aya mashiwi ya mano ayapuutwamo ayalembelwe imyaka 2,600 iyapitapo, mwaba amakii ku kuipakisha amapaalo ya kwa Yehova ayengi, pantu kalemba atwalilila ukusoso kuti: “E fyo amatala yobe yakesulamo ifya ciikushi, ne fya kukaminamo fyobe fikalapalo mwangashi upya.”—Amapinda 3:9, 10.

Lelo cipilibula nshi ukucindika Lesa? Fyuma nshi twingacindikilako Yehova? Kabili ni shani fintu twingacite ci?

“Cindika Yehova”

Mu Malembo, ishiwi ilikalamba ilya ciHebere ilya kucindika, ka·vohdhʹ, mu kukonke shiwi lipilibula “ukufina.” E co ukucindika umuntu cipilibula ukumumona ngo wafina, uwa mibele yebekesha, nelyo uwacindama. Ishiwi na limbi ilya ciHebere ilya kucindika, yeqarʹ, nalyo ilyapilibulwa “icaumo mutengo” na “ifyaumo mutengo.” Mu kupalako, ishiwi lya ciGriki ti·meʹ, ilyapilibulwa “ukucindika” muli Baibolo, lyumfwikamo ukukatama, ubucindami, ukuumo mutengo. E co umo acindika umbi pa kuba na katina kuli wene no kumukatamika.

Ukucindika na kabili kwalikwata ulubali na lumbi. Langulukeni ilyashi likumine Mordekai umuYuda wa busumino, uyo pa nshita imo asansalike ipange lya kufwayo kwipaye Mfumu Ahasuerusi iya Persia ya pa kale. Pa numa, ilyo Imfumu yaishileishiba ukuti Mordekai tacindikwe nangu fye pamo pali ilya ncitilo, aipwishe cilolo wakwe umukalamba, Hamani, inshila yawamisha iya kucindikilamo umo uo Imfumu yacankilwemo. Hamani atontonkenye ukuti umucinshi wa musango yo ukapeelwa kuli ena, lelo fintu alubile! Kwena, Hamani asosele ukuti uyo muntu alingile ukufwikwa “ica kufwala icifwale mfumu” no kutentema pali “kafwalo uo imfumu itentemapo.” Asondwelele ukuti: “Bamuteke na pali kafwalo no kumutandasha mu lubansa lwa musumba, no kubilisha ku ntanshi yakwe, abati, E fyo kwacitwa ku muntu uo imfumu icankilwo kumucindika.” (Estere 6:1-9) Muli ci ca kucitika, ukucindiko muntu kwasanshishemo ukumutasha pa cintubwingi pa kuti akatamikwe sana kuli bonse.

Mu kupalako, ukucindika Yehova kwaba mu mbali shibili: Ukumucindikisha pa lwesu no kumutasha pa cintubwingi ukupitila mu kubombako no kwafwilisha umulimo wa kubilisha ishina lyakwe ku bantu.

“Ifyuma Fyobe”—Finshi?

Mu kushininkisha ifyuma fyesu fisanshamo ubumi bwesu, inshita yesu, ukulamuka kwesu, na maka yesu. Ni shani pa lwa fikwatwa fyesu? Langulukeni amashiwi ya kwa Yesu lintu amwene mukamfwilwa umubusu alepoosamo utunyampuku tubili utwa ndalama mu cipao ca mwi tempele. Atile: “Uyu mukamfwilwa, mubusu, apooselemo icacilamo kuli bonse; pantu bonse bene [abalepoosamo] ni ku fipakile fyabo bapooselemo ifya bupe, lelo wene ni ku kubulwa kwakwe apooselemo fyonse ifya maliila ifyo akwete.” (Luka 21:1-4) Yesu atashishe uyu mukamfwilwa pa kubomfye fikwatwa fyakwe ku kwafwilisha ukupepa kwa kwa Yehova.

Mu kumfwika, kanshi, ifyuma fyalumbulwa na Solomone na kabili fisanshamo ifikwatwa fyonse ifyo twingaba na fyo. Kabili inumbwilo “ifya ntanshi fya cibwesha cobe conse” ipilibulo kupeela Yehova ifyawamisha pa fyuma fyesu.

Ni shani, nangu ni fyo, ukupeele fyuma kwingacindika Lesa? Bushe kale kale fyonse te fyakwe? (Ilumbo 50:10; 95:3-5) Mwi pepo lya pa mutima, Imfumu Davidi yasumine ukuti, “Fifuma kuli imwe fyonse.” Pa lwa musangulo ukalamba uwa kukuulila itempele uo aletele na bantu bakwe, David atile: “Ifyafuma mu kuboko kwenu e fyo tupeelako kuli imwe.” (1 Imilandu 29:14) E co lintu tulepeela Yehova ifya bupe, ninshi tulemubwesesha fye ifyo atupeela, pa mulandu wa busuma bwa mutima wakwe. (1 Abena Korinti 4:7) Lelo, nge fyo tumwene kale, ukucindika Yehova kusanshamo ukumutasha pa menso ya bambi. Kabili ifya bupe ifibomfiwa ku kulundulula ukupepa kwa cine filacindika Lesa. Mu Baibolo mwaba ifya kumwenako fishaiwamina ifya uyu musango wa kucindikilamo Yehova.

Ifya Kumwenako fya ku Kale

Imyaka mupepi na 3,500 iyapitapo, lintu Yehova afwaile ukupayanya ihema mu matololo nge cifulo ca kupepelamo ica bena Israele, ifipe fyaumo mutengo ifyalekanalekana fyalifwaikwe ukulingana ne nshila lyali no kupangilwamo iyapeelwe na Lesa. Yehova aebele Mose ukuleka “onse uwaitemenwa mu mutima acitile ca musangulo ca kwa Yehova.” (Ukufuma 35:5) Ubulondoloshi bwatwalilila ukusoso kuti: “Awe baishileko umuntu onse uo umutima wakwe wamwimishe kabili onse uo umutima wakwe wamulengele ukuitemenwa, na bo balete ca musangulo ca kwa Yehova, ku mulimo we hema lya Kulaishanya, na ku bubomfi bonse bwa liko, na ku fya kufwala fya mushilo.” (Ukufuma 35:21) Na kuba, ifya kupeela fyabo ifya kuitemenwa, fyalifulile nga nshi ukucile fyalekabilwa ku mulimo ica kuti abantu ‘baleshiwe ukuleta’!—Ukufuma 36:5, 6.

Langulukeni ica kumwenako na cimbi. Ilyo imifwaile ye hema yapwile kabili balepekanishisha ubukuule bwe tempele, Davidi acitile umusangulo uukalamba kwi tempele lintu umwana wakwe Solomone aali no kukuula. Abililemo ne mbila ya kuti bambi bailunde ku mulimo, kabili abantu bailundileko no kuleta ubupe bwa fyuma kuli Yehova. Silfere na golde fyeka fye kuti fyaba nalimo amadola amabilioni 50 mu fipendo fya ndakai. “Awe abantu balisaminwe pa kupeela kwabo ku kuitemenwa.”—1 Imilandu 29:3-9; 2 Imilandu 5:1.

Ifya Kupeela fya Kuitemenwa Ilelo

Kuti twasondako shani insansa sha kupeela kwa kuitemenwa ilelo? Umulimo wacindamisha uulecitwa mu calo conse pali ino nshita wa kushimikilo Bufumu no kupanga abasambi. (Mateo 24:14; 28:19, 20; Imilimo 1:8) Kabili Yehova aalisekelamo mu kulaashika Inte shakwe ifya Bufumu fya pe sonde.—Esaya 43:10.

Te ca kutwishika ukuti indalama shilafwaikwa ku kwafwilisha umulimo Inte sha kwa Yehova balecite lelo. Ukukuula no kusakamana Amayanda ya Bufumu, Ifiyanda fya Kulonganinamo, amaofesi ya Sosaite, amafakitare, na mayanda ya Bethel kufwaye ndalama. Ukulemba no kwananya amaBaibolo ne mpapulo shashimpwa pali Baibolo mu ndimi shalekanalekana na ko kwine kufwaye ndalama. Ni kwi kufume ndalama shipooswa pali aya mateyanyo? Shifuma fye mu misangulo ya kuitemenwa!

Imisangulo iingi ifuma ku babusu abo ukupala mukamfwilwa untu Yesu amwene bakwata fye utunono. Pa kukanafwaya ukuipusula iyi nshila ya kucindikilamo Yehova, balasangula indalama shalinga “umwabela amaka yabo,” kabili, inshita shimo, no “kucila amaka yabo.”—2 Abena Korinti 8:3, 4.

Umutumwa Paulo aebele Abena Kristu ba ku Korinti ati, “Onse acite umo apangile mu mutima wakwe, te kupeela no mutimako nangu mu kupatikishiwa, pantu Lesa atemwo mupe wa nsansa.” (2 Abena Korinti 9:7) Ukupeela kwa nsansa kukabila ukutantika kusuma. Paulo aebele abena Korinti ati: “Ku bwa ntanshi bwa mulungu no mulungu, bonse mupaatulepo fimo no kubika, umo mwingakwatila, ukuti ilyo nkesa kwikaba kusangula.” (1 Abena Korinti 16:2) Mu kupalako, abafwaya ukusangwila ku kulundulula umulimo wa Bufumu ilelo, ku mbali kabili mu kuitemenwa, kuti bapaatulapo indalama bakwata kuli yo mifwaile.

Yehova Alapaala Abamucindika

Ilintu ulubanda lwa ku mubili lweka lweka taluletako ulubanda lwa ku mupashi, ukupeela ifyuma fyesu—inshita yesu, amaka yesu, ne fikwatwa fyesu—ku kucindika Yehova, kulaleta amapaalo yene yene. Pantu Lesa umwine wa fyonse, atulaya ukuti: “Umutima we paalo uupeela ukeniwa, no unwensha akanwenshiwa umwine.”—Amapinda 11:25.

Ilyo Imfumu Davidi yafwile, umwana wakwe Solomone akuulile itempele lya lulumbi mu misangulo ya kuitemenwa iyo wishi alonganike, umo Yehova amwebeele. Ilyo lyonse lintu Solomone atwalilile uwa busumino mu kupepa Lesa, “abena Yuda na bena Israele baikele umutelelwe . . . ukufuma kuli Dani no kufika ku Beere-sheba, inshiku shonse sha kwa Solomone.” (1 Ishamfumu 4:25) Ilyo lyonse lintu abena Israele ‘balecindika Yehova ku fyuma fyabo,’ ifipao fyaleisula, umwa kukamina umwangashi mwalesempauka.

Pa numa, Yehova asoseele muli kasesema Malaki ukuti: “Shi mundabwile kuli ico, e fyo Yehova wa milalo asosa; mumone nga nshakamwiswile ifipunda fya mu muulu, no kumupongolwele paalo, kukasuke kukabule incende ya kubapo.” (Malaki 3:10) Ulubanda lwa ku mupashi ulo ababomfi ba kwa Yehova baleipakisha pali lelo bushininkisho bwa kuti Lesa alifisha ubulayo bwakwe.

Mu cine cine Yehova alatemunwa ilyo twabombo mulimo wesu mu kutwala ifya Bufumu pa ntanshi. (AbaHebere 13:15, 16) Kabili aalaya ukututungilila nga ‘twabala twafwaya ubufumu no bulungami bwakwe.’ (Mateo 6:33) Shi na ‘tucindike Yehova ku fyuma fyesu’, no kusekelela kukalamba ku mutima.

[Akabokoshi pe bula 28, 29]

Inshila Bamo mu Kuitemenwa Basangwila ku Mulimo wa mwi Sonde Lyonse

Abengi balapaatulapo, nelyo ukupekanyapo, indalama isho babika mu tubokoshi twa misangulo utwalembwapo ati: “Imisangulo ya Mulimo wa mwi Sonde Lyonse uwa Sosaite—Mateo 24:14.” Cila mweshi ifilonganino fituma ishi ndalama ku maofesi yakalamba aya calo conse mu Brooklyn, New York, nelyo kwi ofesi linono ilya Sosaite ilyabela mupepi.

Imisangulo ya kuitemenwa iya ndalama na kabili kuti pambi yatumwa mu kulungatika ku Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, nelyo kwi ofesi lya Sosaite ilibombele calo cenu. Ifibekobeko nelyo ifikwatwa fimbi na fyo fine kuti fyasangwilwako. Kalata umwipi uulelondolola ukuti uyu musangulo bupe bwa mu kulungatika, alingile ukutuminwa pamo ne yi misangulo.

Ukutantika kwa Musangulo wa Cipangano

Indalama kuti shapeelwa ku Watch Tower Society ukupitila mu kutantika kwaibela ukwa kuti, uulepeela nga aalakabilapo fimo, shikabweshiwa kuli wene. Ku fyebo fyalundwako, kuti mwalembela ku Treasurer’s Office, Watch Tower Bible and Tract Society of Pennsylvania, Box 33459, Lusaka 10101, nelyo kwi ofesi lya Sosaite ilibombele calo cenu.

Ukupeela Kwapekanishiwa

Ukusansha pa kupeele ndalama ukwa kulungatika ne misangulo ya cipangano iya ndalama, kwalibako inshila shimbi isha kupeelelamo ku kwafwilisha umulimo wa Bufumu mwi sonde lyonse. Ishi nshila shisanshamo:

Inshuwalansi: Watch Tower Society kuti yalumbulwa nga kapokelela wa ndalama mu mitantikile ya inshuwalansi wa bumi nelyo mu mapange ya kuleke ncito nelyo penshoni. Sosaite ilingile ukwishibishiwa ulwa iyo mitantikile yonse.

Amaakaunti ya ku Banki: Amaakaunti ya ku Banki, amasetifiketi ya ndalama shili ku banki, nelyo cila akaunti ya kulekelapo incito kuti pambi yabikwa mu kuseekeshiwa nelyo ukulipilwa ilyo umwine afwa ku Watch Tower Society, ukulingana ne fyo ibanki abikishako indalama lifwaya. Sosaite ilingile ukwishibishiwa ulwa iyo mitantikile yonse.

Ama Stock na ma Bond: Ama stock na ma bond kuti pambi fyasangulwa ku Watch Tower Society ngo bupe bwa mu kulungatika nelyo ukupitila mu kutantika kwa kuti indalama sha malipilo shatwalilila ukulipilwa ku ulesangula.

Icikwatwa ca Mpanga ne Fikuulwa: Icikwatwa ca Mpanga ne Fikuulwa ifingashitishiwa kuti pambi fyasangulwa ku Watch Tower Society napamo ukupitila mu bupe bwa mu kulungatika nelyo pa kwikatila impanga ya ulepeela, uwingatwalilila ukwikalamo ilyo acili umumi. Umo alingile ukwipusha Sosaite ilyo talalembesha ifipepala fya nsambu sha mwi funde isha kupeelelapo icikwatwa icili conse ca mpanga ku Sosaite.

Ifya Cishale no Kuseekesha: Ifipe nelyo indalama kuti fyashiilwa Watch Tower Society mu nshila ya cishale iya mwi funde, nelyo Sosaite kuti yalumbulwa nga kapokelela wa kusuminishanya ku kuseekesha. Ukuseekesha ukuleafwilisha ukuteyanya kwa mipepele kuti pambi kwapusushako imisonko imo imo. Icalembwa cimo ica fya cishale nelyo ica kusuminishanya kwa kuseekesha cifwile ukutumwa ku Sosaite.

Abengatemwa inshila iili yonse pali iyi mitantikile ya kupeela kwapekanishiwa balingile ukulembela kwi Ofesi lya Sosaite ilibombele calo babamo.