Inyali ya Kumutungulula mu Nshila ya ku Mweo

“MWE Yehova, ninjishibo kuti te kwa muntunse ukwenda kwakwe; te kwa muntu uuleya ukushikimika amatampulo yakwe.” (Yeremia 10:23) Muli aya mashiwi kasesema Yeremia alangishe ukuti abantunse te kuti bende mu nshila ya mweo mu kutunguluka ukwabulo bwafwilisho. Ni kwi kwingafuma ubwafwilisho bwa musango yo? Kemba wa malumbo ayasuka mwi pepo lyakwe kuli Yehova Lesa atila: “Icebo cenu ni nyali ku makasa yandi, kabili lubuuto ku nshila yandi.”—Ilumbo 119:105.

Abo abatendeka ukusambilila Icebo ca kwa Lesa, Baibolo wa Mushilo, no kucita ifyo isosa bakaba ngo muntu uutendeka ubulendo pa macaca. Pa kubala te kuti amwensekeshe pantu nakufiita. Lelo ilyo akasuba katendeka ukutula, atendeka ukulamona panono panono. Kwi pelepele, akasuba kasuka kasaama. Alaamona fyonse mu kulengama. Icilangililo ca musango yo citwibukishako ipinda lya mu Baibolo ilitila: “Inshila ya balungami yaba ngo lubuuto ulwabalika, ululeya no kubuuta kasuka akasuba kasaama.”—Amapinda 4:18.

Ni shani kuli abo abakaana ubutungulushi bwa kwa Lesa? Baibolo isosa ukuti: “Umwenda ababifi mwaba nge mfifi iyatoola, tabeshiba ico baipununako.” (Amapinda 4:19) Ee, ababifi bapala umuntu uuipununa mu mfifi. Nangu fye fintu fimoneka ngo kutunguluka kwabo fya pa kashita akanininini fye, pantu “tapali mano, tapali mucetekanya, tapali kupanda amano, ifingawisha Yehova.”—Amapinda 21:30.

E ico, konkeni ubutungulushi bwa Cebo ca kwa Lesa, Baibolo. Nga mwacite fyo, mukasanga amashiwi ya pa Amapinda 3:5, 6 ukuba aya cine ayatila: “Tetekela Yehova umutima obe onse, na ku kwiluka kobe we mwine wishintililako; uko konse wenda umwishibe, na o akatambalike nshila shobe.”