‘Imbushi ya Mpanga iya Busaka’
FWE bengi te lingi tubomfya ishiwi ‘ubusaka’ ilyo tulelondolola fintu imbushi yaba. Limo kuti twamone fyo imbushi ni nama ishisuma ishilya mupepi na conse ico shasanga kabili ukuti munani uusuma nga nshi, e lyo tulakamako no mukaka wa mulyo—lelo te kuti tutile sha busaka.
Nangu cibe fyo, Baibolo ilondolola umukashi ukuba ‘insebula nkota iya kutemwa, imbushi ya mpanga iya busaka.’ (Amapinda 5:18, 19) Solomone, uwalembele ibuuku lya Amapinda, alitemenwe nga nshi ukubeebeeta inama mpanga sha mu Israele, e co ukwabula ukutwishika alikwete umulandu usuma untu asosele aya mashiwi ya mampalanya. (1 Ishamfumu 4:30-33) Nakalimo alebeebeeta imbushi sha mpanga ishisangwa libili libili ku ncende itwa En-gedi, mupepi no lulamba lwa bemba wa Dead Sea kwati fye fintu wishi Davidi alecita.
Libili libili, imikuni inono iya mbushi sha mpanga ishikala mupepi ne Ciswebebe ca mu Yudea shiya ku kamfukumfuku ka menshi akasangwa mu En-gedi. Pa myaka iingi, imbushi sha mpanga shiya kuli iyi ncende itwa En-gedi ku kunwa amenshi, pantu e ko yasangwa fye muli cilya ciswebebe. Na kuba, ishina En-gedi lipilibula “akamfukumfuku ka kana ka mbushi,” icilangilila ukuti utwana twa mbushi tulasangwa libili libili kulya. Imfumu Davidi yailebelama kulya ilyo yabutwike ukupakaswa ku Mfumu Shauli, nangu ca kuti ali no kwikala nge mbutushi “ku fimabwe ifyasansuka ifya [mbushi sha mpanga] fibushimabwe.”—1 Samwele 24:1, 2.
Na nomba line fye mu matololo ya En-gedi kuti mwamona uko imbushi ya mpanga ikota, imoneka iya kucebusha ilyo ilepita mu mukonko ukukonka sawe ku mulonga wa menshi. Lyene kuti mwatendeka ukumfwikisha ico imbushi nkota yalinganishiwilwa ku mukashi wa cishinka. Fintu yabe yatalalila no kuyemba filangilila imibele ya canakashi. Ishiwi “ubusaka” lilosha ku mimonekele ya yemba iya mbushi ya mpanga.a
Imbushi ya mpanga ikota ilakabila ukuba iyashipa kabili pa nshita imo ine ukuba iyanakilila. Ukulingana na fintu Yehova asosele kuli Yobo, imbushi ya mpanga ifyalila mu mabwe, umwayafya ukufika umwabula ifya kulya kabili umukaba no kutalala sana. (Yobo 39:1) Lelo nangu cibe fyo, ilasakamana utwana kabili itusambilisha ukunina impili no kutoloka mu mabwe nga fintu icita. Kabili imbushi ya mpanga ilabomfya ubulamba ku kucingilila utwana ku fiswango. Incenshi imo yamwene uko imbushi ya mpanga yalwishishe kapumpe pa maminiti 30, uku ninshi akana kali nakafisama mwi samba lya kwa nyina.
Abakashi ba Bwina Kristu ilingi line bakusha abana mu mibele yayafya. Lelo ukupala imbushi ya mpanga, balaipeelesha ukusakamana uyu mulimo uo Lesa abapeela. Kabili balatukuta ukucingilila abana babo ku fintu ifingaleta ubusanso kuli bumupashi bwabo. E ico, ilyo Solomone abomfeshe iyi nsoselo tacefeshe abanakashi nakalya, lelo alelangilila ukunakila no kuyemba kwabo—bumupashi bwabo ubumoneka na mu mibele yayafya.
[Amafutunoti]
a Icitabo citwa The New Brown-Driver-Briggs-Gesenius Hebrew and English Lexicon, cilondolola ifyo ishiwi lya ci Hebere chen, ilyayalulwa ukuti “ubusaka,” ‘lipilibula ukuyemba mu mimonekele.’
[Ifikope pe bula 30, 31]
Umukashi wa Bwina Kristu alangisha imibele ya bumupashi iyayemba ilyo alebomba imilimo iyo Lesa amupeela