Mulandu Nshi uwa ‘Kuyila ku Bubenshi’?

IMFUMU ya mano Solomone uwa mu Israele wa pa kale apeele uku kupanda amano: “Kabiye ku bubenshi.” Mulandu nshi alandile ci? Cinshi twingasambilila ukufuma ku bubenshi?

Solomone alundilepo kuti: “Kamone imibele ya [bubenshi], ube na mano. Nelyo tabwakwata cilolo, nangu ni kaangalila, nangu ni kateka, buteyanye cilyo ca buko ulusuba, bututile ca kulya ca buko mu nshita ya kulobolola.” (Amapinda 6:6-8) Ayo mashiwi ya kale sana yalumbulula icine icasangwa na basambilila ifya cifyalilwa aba muno nshiku.

Kalemba wa mapinda Aguri alangilila ukuti ububenshi bwa “mano ayacilamo.” (Amapinda 30:24, 25) Kwena, amano ya buko tayaba cintu ciletwako no kupelulula kwabamo mucetekanya lelo yafuma ku mununsha untu Kabumba abupeele. Pa mulandu wa mununsha, ku ca kumwenako, ububenshi bulalonganika ifilyo fya buko pa nshita yalinga.

Ububenshi bwaliteyanishiwa mu kusungusha. Mu nshila yamonekesha bulabombela pamo no kupeelo kusakamana ku babomfi banabo, bulafwilisha ububenshi ubucenenwe nelyo ubunakwike ukubwelela kwi fwasa. Mu mununsha bulapekanishisha inshita ya ku ntanshi kabili bucita icili conse icingacitwa ku kufikilisha imilimo ya buko.

Inshila ya cifyalilwa iya bubenshi ilanga ukuti abantunse balingile ukuteyanishisha libela no kuba ababombesha. Ici cibomba mu sukulu, pa ncito, na mu mibombele ya ku mupashi. Ifyo ububenshi bumwenamo mu kupikintika kwa buko, e fyo Lesa afwaya abantunse ‘ukumone cisuma ku kubombesha kwabo konse.’ (Lukala Milandu 3:13, 22; 5:18) Ukupala ububenshi bwapamfiwa, Abena Kristu ba cine bacita umulimo wa kasuba uwakumanina. ‘Bacita na maka yabo conse ico amaboko yabo yasanga ica kucita,’ te pa mulandu wa kuti umukalamba wa ncito alebamona, lelo mu bufumacumi kabili mu kuba no kufwaisha kwa kuba bakabomba abapikintika, abasandulula.—Lukala Milandu 9:10; linganyako Amapinda 6:9-11; mona na kabili Tito 2:9, 10.

Tukaba aba nsansa, mu cituntulu, nga ‘twaya ku bubenshi’ no kubomfya fintu tusambilila ukufuma kuli bwene. Kabili insansa shacilishapo bukulu shikaba shesu nga ca kuti mu kucincila twacita ukufwaya kwa kwa Yehova Lesa, nga fintu kwasokololwa muli Baibolo.