Imfumu yabalilapo ukupanda amano pamo ngo mufyashi aiti: “We mwana wandi, bake fyebo fyandi, no kusunga uko uli amafunde yandi. Baka amafunde yandi no kuba no mweo, sunga amalango yandi nge mboni ya linso lyobe.”—Amapinda 7:1, 2.

Pa fyo abafyashi bafunda abana kuti pasanshiwa ne fipope pamo nga mafunde ya lupwa. Aya yalafwa aba mu lupwa. Ca cine, amafunde ya lupwa lumo na lumo yalapusana ukulingana ne fyo balefwaya. Nalyo line, abafyashi balikwata umulimo wa kusala icingawamina sana ulupwa lwabo. Kabili amafunde bapanga ilingi yalangilila ukutemwa no kwangwako kwabo ukwa cine cine. Ukufunda ku bacaice kwa kuti, balekonka aya mafunde pamo pene no kufunda kwa mu Malembo ukufuma ku bafyashi babo. Ca cine, calicindama ukubaka ifi fipope nge “mboni ya linso lyobe” e kuti ukupooseshako amano ku kufibaka. E lintu mwingataluka ifilenge mfwa ifimako nga mwasuula ifipimo fya kwa Yehova kabili e lyo ‘mwingaba no mweo.’