Kuti mwanonkelamo nga mwatwalilila ukusambilila Baibo, nangu ca kuti inshita shimo tacanguka. Inshita shimo kuti mwasakamana nga ca kuti mukatwalilila ukusambilila Baibo. Cinshi cacindamina ukutwalilila ukulaibikilishako ukusambilila Baibo? Finshi fingamwafwa ukutwalilila ukusambilila Baibo nangu ca kuti inshita shimo cilafya?

1. Bushe ukusambilila Baibo kuti kwamwafwa shani?

“Icebo ca kwa Lesa ca mweo kabili ca maka.” (AbaHebere 4:12) Baibo kuti yamwafwa, pantu ilalondolola ifyo Lesa atontonkanya ne fyo amutemwa. Mukasambilila ifintu ifingi kabili mukaba ne nsansa pali ino nshita, e lyo ne subilo lya kuti ifintu fikawama ku ntanshi. Ne cacindamisha ca kuti nga mulesambilila Baibo, kuti mwaba cibusa wa kwa Yehova. Na kabili ukusambilila Baibo kukalenga ubumi bwenu bukawamineko.

2. Mulandu nshi tulingile ukwishibila ukuti icine icaba mu Baibo calicindama?

Icine icaba mu Baibo caba kwati cuma ica mutengo sana. E co Baibo itukoselesesha ukuti: “Shita icine kabili wicishitisha.” (Amapinda 23:23) Nga twaishiba ifyo icine caba mu Baibo cacindama, tukalaesha na maka ukutwalilila ukulasambilila Baibo, nangu ca kuti twakwata amafya.—Belengeni Amapinda 2:4, 5.

3. Bushe Yehova kuti amwafwa shani ukutwalilila ukusambilila Baibo?

Yehova Kabumba wa Maka Yonse kabili Cibusa wenu alimwishiba bwino kabili alafwaya ukumwafwa ukusambilila pali ena pa kuti mumwishibe. Kuti alenga “mulefwaya ukucita ifyo afwaya kabili alamupeela na maka ya kuficita.” (Belengeni Abena Filipi 2:13.) Kanshi nga mulekabila ukumwafwa pa kuti mutwalilila ukusambilila nelyo ukubomfya ifyo mulesambilila, Yehova kuti amwafwa. Nga mulekabila amaka ya kucimfya amafya nelyo aya kushipikisha nga balemucusha, Yehova kuti amupeela. Lyonse mulepepa kuli Yehova kabili mulemulomba ukuti alemwafwa ukutwalilila ukusambilila Baibo.—1 Abena Tesalonika 5:17.

SAMBILILENI NA FIMBI

4. Mulemona ukusambilila Baibo ukuti kwalicindama sana

Inshita shimo kuti twalamona kwati twalikwata ifya kucita ifingi ica kutila te kuti tukwate ne nshita ya kusambilila Baibo. Finshi fingatwafwa? Belengeni Abena Filipi 1:10, lyena lanshanyeni aya mepusho:

• Finshi fimo ifyo mumona ukuti e “fyacilapo ukucindama” mu bumi bwenu?

• Finshi mwingacita pa kuti mulelanga ukuti ukusambilila Baibo kwalicindama sana kuli imwe?

1. Nga mwabalilapo ukubika umucanga mu mbeketi e lyo mwaesha ukubikamo amabwe, te kuti yengile yonse

2. Nga mwabalilapo ukubika amabwe mu mbeketi, kuti kwashala incende iya kuti mwabikamo umucanga uwingi. Ifi fine e fyo ciba nga ca kuti mwabalilapo ukucita ifintu “ifyacilapo ukucindama” mu bumi bwenu. Kuti mwakumanisha ukuficita, kabili kuti mwashalako ne nshita ya kucitako ne fintu fimbi

Nga tulesambilila Baibo tuleshiba fyonse ifyo tukabila ukwishiba pa fya kwa Lesa, e kutila ukwishiba Lesa no kulamupepa. Belengeni Mateo 5:3, lyena lanshanyeni ici cipusho:

• Tunonkelamo shani nga ca kuti tulemona ukutila ukusambilila Baibo kwalicindama sana?

5. Muletwalilila ukusambilila Baibo na lintu balemukaanya

VIDIO: Ifisuma Ifyacitike Filya Bashalekele Ukusambilila Baibolo (5:22)

• Muli vidio twatamba, finshi ifibusa fya ba Francesco na banyina bacitile ilyo babebeleko ifyo balesambilila?

• Finshi fyafuminemo muli filya ba Francesco batwalilile ukusambilila?

Belengeni 2 Timote 2:24, 25, lyena lanshanyeni aya mepusho:

• Bushe balupwa lwenu ne fibusa bomfwa shani ifi musambilila Baibo?

• Ukulingana ne fyo twabelenga mu Baibo, cinshi mufwile ukucita nga ca kuti abantu bamo tabatemwe ukuti mulesambilila Baibo? Cinshi mufwile ukucitila ifyo?

6. Muleshintilila pali Yehova ukuti alemwafwa

VIDIO: Yehova Alatwafwa Ukwaluka (3:56)

• Muli vidio twatamba, finshi ba Jim balekele ukucita pa kuti batendeke ukulacita ifyo Yehova atemwa?

• Finshi mwatemwa pa fyo bacitile?

Belengeni AbaHebere 11:6, lyena lanshanyeni aya mepusho:

• Finshi Yehova akacitila “abafwaisha ukumubombela,” e kutila abesha na maka ukumwishiba no kulacita ifilenga alasekelela?

• Bushe ifi fyalenga mwaishiba ukuti Yehova omfwa shani nga amona mulefwaisha ukusambilila Baibo?

IFYO MUSAMBILILE

Nangu ca kuti limo kuti cakosa ukusambilila Baibo, ukusambilila Baibo kuti kwalenga mwaba ne nsansa umuyayaya. Mutwalilile ukushintililila pali Yehova, kabili akamulambula.

Ukupitulukamo

• Mulandu nshi icine icaba mu Baibo cacindamina kuli imwe?

• Finshi mufwile ukucita nga ‘mwaishiba bwino bwino ifyacilapo ukucindama’?

• Cinshi mulingile ukulombela Yehova ukuti amwafwe ukusambilila Baibo?

ISHIBILENIPO NA FIMBI

Moneni ifintu 4 ifyo abantu abengi bacita pa kuti balebomfya bwino inshita yabo.

“Ifya Kubomfya Bwino Inshita” (Loleni!, March–April 2014)

Moneni ifyo Yehova ayafwile umwanakashi umo uwalebombesha ukucita ifilenga Lesa alesekelela, lelo uo umwina mwakwe ashaishibe icalelenga alebombesha.

Yehova Alatukosha pa Kuti Tushipikishe Amafya (5:05)

Moneni ifyo umwaume umo anonkelemo mu fyo abena mwakwe bashipikishe.

Ifyalengele Nsumine Ukuti Ici E Cine (6:30)

Inshita shimo Inte sha kwa Yehova balabeba ukuti balalekanya indupwa. Bushe ici ca cine?

“Bushe Inte sha kwa Yehova Balalekanya Indupwa Nelyo Balalenga Shaikatana?” (Icipande ca pa jw.org)

Bonse tulasala ifyo tufwile ukucita. Mu fingi ifyo tusalapo ukucita kuti mwafuma ifisuma nelyo ifibi, kabili kuti fyalenga bucibusa bwesu na Yehova bwakoselako nelyo bwapwa. Ku ca kumwenako, nalimo kuti twasala uko twakulaikala, ifyo tukalacita pa kuti tukalekwata indalama tulekabila, nelyo ukusalapo nampo nga tulefwaya ukuupa nelyo ukuupwa. Nga twasala bwino ifya kucita tukaba ne nsansa, kabili tukalenga na Yehova akasekelele.

1. Kuti mwabomfya shani Baibo pa kuti musale bwino ifya kucita?

Ilyo mushilasala ifyo mwalacita, mulepepa kuli Yehova ukuti amwafwe kabili mulebelenga Baibo pa kuti mwishibe ifyo amona ifyo mulefwaya ukusalapo. (Belengeni Amapinda 2:3-6.) Yehova alibikako amafunde ayo tulingile ukukonka mu fintu fimo. Kanshi nga ca kuti Yehova alibikako ifunde pa fyo tulesalapo ukucita, tulingile ukulikonka pa kuti ifintu fikatuwamine.

Kuti mwacita shani nga ca kuti mu Baibo tamuli ifunde ilya mu kulungatika ililelanda pa fyo mulingile ukucita? Na pali iyo yine nshita Yehova akamutungulula ‘mu nshila iyo mufwile ukwendamo.’ (Esaya 48:17) Akamulanga shani? Akabomfya amashinte ya mafunde ya mu Baibo pa kumutungulula. Amashinte ya mafunde, cine icilondolola ifyo Yehova atontonkanya e lyo ne fyo omfwa pa fintu. Ilingi line tuleshiba ifyo Yehova omfwa pa fintu fimo nga twabelenga ilyashi limo ilya mu Baibo. Nga twaishiba ifyo Yehova omfwa, tukalasala ifya kucita ifikalalenga alesekelela.

2. Finshi mulingile ukutontonkanyapo ilyo mushilasala ifya kucita?

Baibo itila: “Uwa mano alalolekesha ponse apo alenyanta.” (Amapinda 14:15) Ici cilolele mu kuti ilyo tushilasala ifya kucita, tufwile ukutontonkanyapo sana pa fyo tulefwaya ukusalapo. Ilyo muletontonkanyapo muleyipusha amuti: ‘Mashinte nshi aya mu Baibo ayo ningabomfya? Ni cinshi nalasalapo ukucita icikalenga nkabe ne nsansa? Bushe ifyo nalasalapo ukucita fikakuma shani abantu bambi? Ne cacilapo ukucindama, bushe fikalenga Yehova akabe ne nsansa?’—Amalango 32:29.

Yehova alikwata insambu sha kutweba ukuti ici cisuma e lyo ici cibi. Nga twaishiba bwino amafunde yakwe na mashinte ya mu Baibo, kabili tulefwaisha no kulayakonka, tukaba na kampingu iisuma. Kampingu ni nte iitweba ukuti ici cisuma no kuti ici cibi. (Abena Roma 2:14, 15) Nga twasambilisha bwino kampingu yesu, ikalatwafwa ukusala bwino ifya kucita.

SAMBILILENI NA FIMBI

3. Muleleka Baibo ilemutungulula

VIDIO: Muleleka Amashinte ya Mafunde ya mu Baibolo yalemutungulula (5:54)

• Bushe insambu sha kuisalila ifya kucita ni cinshi?

• Mulandu nshi Yehova atupeelela insambu sha kuisalila ifya kucita?

• Finshi Yehova atupeela ifingatwafwa ukulabomfya bwino insambu shesu isha kuisalila ifya kucita?

Pa kuti mwishibe ishinte limo ilya mu Baibo, belengeni Abena Efese 5:15, 16. Lyena lanshanyeni ifyo mwingacita pa kuti “mulebomfya bwino inshita yenu” . . .

• ku kubelenga Baibo lyonse.

• ku kucita ifingalenga mwaba abalume nelyo abakashi abasuma, ku kuba umufyashi umusuma, nelyo umwana umusuma.

• ku kulalongana lyonse.

4. Sambilisheni kampingu yenu pa kuti ilemwafwa ukusala bwino ifya kucita

VIDIO: ‘Muleba na Kampingu Iisuma’ (5:13)

• Muli vidio twatamba, finshi nkashi acitile pa kusambilisha kampingu yakwe no kusalapo ifya kucita ifyali no kulenga Yehova asekelela?

Cinshi tushilingile ukwebela abantu bambi ukuti batusalileko ifya kucita? Belengeni AbaHebere 5:14, lyena lanshanyeni aya mepusho:

• Nangu ca kuti cilanguka ukweba abantu bambi ukutusalilako ifya kucita, cinshi tufwile ukwishiba?

• Finshi ifingamwafwa ukulasambilisha kampingu yenu no kulasala bwino ifya kucita?

5. Mulecindika kampingu ya bantu bambi

Ifyo abantu basalapo ukucita filapusanapusana. Kuti twalanga shani ukuti twalicindika kampingu ya bantu bambi? Natulande pa fya kumwenako fibili:

Ica kubalilapo: Nkashi uwatemwa ukuipenta akuukila ku cilonganino cimbi uko bankashi abengi bashatemwa ukumona umuntu naipenta.

Belengeni Abena Roma 15:1 na 1 Abena Korinti 10:23, 24, lyena lanshanyeni aya mepusho:

• Ukulingana na malembo twabelenga, finshi uyu nkashi nalimo engasalapo ukucita? Finshi mwingacita nga muli no muntu uo kampingu yakwe ilesha ukucita ifintu fimo ifyo kampingu yenu imusuminisha ukucita?

Ica bubili: Munyinefwe alishiba ukuti Baibo tayakaanya ukunwa ubwalwa mu kulinga, lelo asalapo ukukananwa. Bamwita ukuya-angalila pamo na ba bwananyina, e lyo amona bamunyinefwe balenwa.

Belengeni Lukala Milandu 7:16 na Abena Roma 14:1, 10, lyena lanshanyeni aya mepusho:

• Ukulingana na malembo twabelenga, finshi uyu munyinefwe nalimo engasalapo ukucita? Finshi mwingacita nga mwamona umuntu acita ifyo kampingu yenu imulesha ukucita?

Finshi mufwile ukucita pa kuti musale bwino ifya kucita?

1. Mulelomba Yehova ukuti alemwafwa ukusala bwino ifya kucita.—Yakobo 1:5.

2. Mulefwailisha ifyebo mu Baibo na mu mpapulo shilanda pa fya mu Baibo pa kuti mulemona amashinte ya mafunde mwingabomfya. Kuti mwaipushako na Bena Kristu abakalamba mu fya kwa Lesa.

3. Muletontonkanya pa fyo ifyo mwalasalapo ukucita fingakuma kampingu yenu na kampingu ya bantu bambi.

IFYO MUSAMBILILE

Nga twaishiba ifyo Yehova omfwa pa fyo tulefwaya ukucita kabili twatontonkanya na pa fyo fikakuma abantu bambi, tukalasala bwino ifya kucita.

Ukupitulukamo

• Kuti mwacita shani pa kuti mulesala ifya kucita ifingalenga Yehova alesekelela?

• Kuti mwasambilisha shani kampingu yenu?

• Kuti mwalanga shani ukuti mwalicindika kampingu ya bantu bambi?

ISHIBILENIPO NA FIMBI

Kuti mwacita shani pa kuti mulesala ifingalenga bucibusa bwenu na Lesa bwakoselako?

“Lekeni Ifyo Mulepingula Ukucita Filelanga Ukuti Mulacindika Lesa” (Ulupungu lwa kwa Kalinda, April 15, 2011)

Ishibilenipo na fimbi pa fyo Yehova atupanda amano.

Yehova Alatungulula Abantu Bakwe (9:50)

Moneni ica-afwile umwaume umo ukupingulapo ukucita icintu cimo icisha-angwike.

Yehova fye e Ushingatulekelesha (5:46)

Sambilileni na fimbi pa fyo mwingalenga Yehova asekelela ilyo mulesalapo ukucita ifintu ifyo ashalandapo mu kulungatika.

“Bushe Lyonse Mukabila Ifunde lya mu Baibolo?” (Ulupungu lwa kwa Kalinda, December 1, 2003)