Bushe Muleibukisha?

Bushe mwaliipakisha ukubelenga bamagazini bafumine nomba line aba Ulupungu lwa kwa Kalinda? Nga ni fyo, mwalaba aba buseko ukwibukisha ifyakonkapo:

◻ Mulandu nshi twingacetekela abo Yehova asala ukutungulula abantu bakwe?

Yehova asala abantu bamo ukubomba imilimo imo ababa ne mibele iifwaikwa pa kutungulula abantu bakwe mu nshila alefwayo kuti e mo baye ukulingana ne nshita.—8/15, ibula 14.

◻ Cinshi twingasambililako ku cacitikile Yona?

Yona aleicindamika sana no kusuula bambi. Kuti twasambilila kuli Yona ukupitila mu kukanailolekesha fwe bene no kuyumfwa kwesu.—8/15, ibula 19.

◻ Ni mu nshila nshi cingasoselwa ukuti “ishina lya kwa Yehova lupungu ulwakosa”? (Amapinda 18:10)

Ukuuba mwi shina lya kwa Lesa cimininako ukucetekela Yehova umwine. (Ilumbo 20:1; 122:4) Cipilibula ukwafwilisha bumulopwe bwakwe, ukusumbula amafunde yakwe ne fishinte, ukutetekela malayo yakwe, no kuipelesha kuli wene eka. (Esaya 50:10; AbaHebere 11:6)—9/1, ibula 10.

◻ Ni shani fintu inshila Paulo abomfeshe ku kushimikila kuli bashimucindikwa yaba ica kumwenako kuli ifwe?

Pa kulanda ku Mfumu Agripa, Paulo abomfeshe ukushilimuka, akomaile pa fintu ena na Agripa basuminishenyepo. Mu kupalako, tufwile ukukomaila pa fintu fisuma ifya mbila nsuma, no kukomaila pa fyo tusuminishanya na bantu. (1 Abena Korinti 9:22)—9/1, ibula 31.

◻ Ni bani bamwenamo mu kutekanya kwa kwa Yehova?

Pa mulandu wa kutekanya kwa kwa Yehova, abantu abengi nga nshi balepeelwa ishuko lya kwisapusunsuka ukupula mu “bushiku bwa kwa Yehova” ubuleisa. (2 Petro 3:9-15) Na kabili ukutekanya kwakwe kulelenga ukuti ‘tutwalilile ukulabombela ipusukilo lyesu no mwenso no kututuma.’ (Abena Filipi 2:12)—9/15, ibula 20.

◻ Ubupilibulo bwa Baibolo ubwa Septuagint bwacindeme shani?

Ubu bupilibulo bwalibombele apakalamba nga nshi mu kwananya ukwishiba pa lwa kwa Yehova Lesa no Bufumu bwakwe na Yesu Kristu nge Mfumu. Ukupitila muli Septuagint, icitendekelo cacindama calimikwe ku baYuda abalelande ciGriki na Bena fyalo ukupokelela imbila nsuma iya Bufumu mu mwanda wa myaka uwa kubalilapo.—9/15, ibula 30.

◻ Cinshi cintu umulumbe wa mwana umonaushi utusambilisha pa lwa kwa Lesa?

Ica kubalilapo, ca kuti Yehova “wa nkumbu kabili uusenamina, uukokolo kukalipa, kabili uwafulisho luse ne cishinka.” (Ukufuma 34:6) Ica bubili, ca kuti ‘alalekelela’ lintu ukwaluka kwa ku mutima kwalengo kuti inkumbu shilangishiwe. (Ilumbo 86:5)—10/1, amabula 12, 13.

◻ Ni lilali imibele ya mutende iyalaiwa pali Esaya 65:21-25 ikafikilishiwa?

Nga bakapepa ba kwa Yehova abaikatana muli paradise wa ku mupashi ilelo, abasubwa ne “mpaanga shimbi” baleipakisha umutende uufuma kuli Lesa. (Yohane 10:16) Kabili umutende wa musango yo ukatwalilila ukufika na muli Paradise wa cine cine, lintu ‘ukufwaya kwa kwa Lesa kukacitwa pano nse ponse, nga mu muulu.’ Pali iyo nshita amashiwi ya kwa kasesema Esaya yakafikilishiwa yonse. (Mateo 6:10)—10/15, ibula 24.

◻ Mulandu nshi Abena Kristu basefesha ubushiku bwa pa caka ubwa cupo lelo tabasefya inshiku sha kufyalwa?

Baibolo tailanda ukuti icupo cibi. Cili ku bene Abena Kristu nga kuti batemwa ukusefya, ukwibukisha ifyo caweme lintu baupene no kupingulapo kwabo ukwa kubombela capamo mu kutunguluka. Lelo ukusefya inshiku sha kufyalwa uko Baibolo yalandapo kwali kwa basenshi, kabili konse kwaliko ubukatu.—10/15, amabula 30, 31.

◻ Mu cilangililo ca kwa Paulo icalembwa pali 1 Abena Korinti 3:12, 13, cinshi cintu “umulilo” wimininako, kabili cinshi Abena Kristu bonse bafwile ukuba abaibukila?

Kwaba umulilo uo ifwe bonse tukumanya mu bumi, uwaba mesho ya citetekelo cesu. (Yohane 15:20; Yakobo 1:2, 3) Bonse abo tusambilisha icine bakeshiwa. Nga fintu Paulo asokele, nga tatulesambilisha bwino, ifikafumamo fya bulanda. (1 Abena Korinti 3:15)—11/1, ibula 11.

◻ Ni mu mano nshi Noa ‘aendele na Lesa’? (Ukutendeka 6:9)

Noa aendele na Lesa pantu acitile ico Lesa amwebele ukucita. Pa mulandu wa kuti aliipeleshe ku kucito kufwaya kwa kwa Lesa, Noa akwete bucibusa busuma, kabili ubwapalamisha na Lesa.—11/15, ibula 10.

◻ Mashuko nshi twakwata pa kukanaishiba inshita ya kulungatika ilyo Lesa akacite cilandushi pa babifi?

Kutupeela ishuko lya kulanga ukuti cine cine twalitemwa Yehova kabili tufwaya ukwenda mu nshila shakwe kuli pe na pe. Na kabili cilanga ukuti twaliba ne cishinka kuli Lesa no kuti twalicetekela inshila abombelamo ifintu. E lyo, kulatwaafwa no kuba abaibukila no kulola lwa ku mupashi. (Mateo 24:42-44)—11/15, ibula 18.

◻ Cinshi cipilibula ukutetekela “ishina lya Mwana wa kwa Lesa”? (1 Yohane 5:13)

Cipilibula ukumfwila amafunde yonse aya kwa Kristu, ukusanshako fye ne funde lyakwe ilya kuti ‘tutemwane.’ (Yohane 15:14, 17) Ukutemwa kufwaya ukucitila bambi ifisuma. Kulafumyapo impatila ya mushobo, imipepele, ne ya mu mekashi.—12/1, ibula 7.

◻ Mulandu nshi Inte sha kwa Yehova babela “abapatwa”? (Mateo 10:22)

Inte sha kwa Yehova shapatilwa apa fye pa milandu imo ine intu na Abena Kristu ba mu kubangilila babapakashilepo. Intanshi, Inte sha kwa Yehova shikala imikalile yalingana ne fisumino fya mipepele yashiko kabili e cilengo kuti bamo bashipate. Ica bubili, balashibepesho bufi e lyo no kupondamika ifisumino fya shiko.—12/1, ibula 14.