Kabumba Wesu Alatupeela Amano Ayalenga mu Lupwa Lwesu Mwaba Insansa

Mwe Balume, Muletemwa Abakashi Benu

“Abalume bafwile ukulatemwa abakashi babo nge mibili yabo. Uwatemwa umukashi wakwe ali-itemwa umwine, pantu takwatala akuba umuntu nangu umo uwapata umubili wakwe; lelo alauliisha no ku-usunga bwino.”—ABENA EFESE 5:28, 29.

Umulume e mutwe wa lupwa. (Abena Efese 5:23) Umulume umusuma tasunga ulupwa lwakwe buluku buluku. Alitemwa umukashi wakwe, alabika amano ku fyo omfwa kabili alamupeela ne fyo akabila. Alesha na maka ukucita ifingalenga umukashi wakwe ukuba ne nsansa mu nshita ya kulacita fye ifyo alefwaya. (Abena Filipi 2:4) Alaba no bufumacumi nga alelanshanya no mwina mwakwe kabili alakutikisha. Taba ne “cipyu” ku mwina mwakwe, tamupuma kabili tamusaalula.—Abena Kolose 3:19.

Mwe Bakashi, Mulecindika Abalume Benu

“Umukashi na o abe na katiina ku mulume wakwe.”—ABENA EFESE 5:33.

Umukashi nga alecindika umulume wakwe no kumutungilila, mu lupwa mulaba umutende. Nga ca kuti umwina mwakwe alufyanya, tamusuusha, lelo alatwalilila ukumucindika no kuba ne cikuuku. (1 Petro 3:4) Nga pali ubwafya ubo alefwaya balanshanyepo, alasala inshita iisuma kabili alalanda mu mucinshi.—Lukala Milandu 3:7.

Muleba aba Cishinka ku Bena Mwenu

‘Umwaume . . . akalambatila ku mukashi wakwe, na bo bakaba umubili umo.’—UKUTENDEKA 2:24.

Umwaume no mwanakashi nga baupana, balaba ifibusa sana. Abaupana balakosha icupo cabo nga ca kuti balelanshanya ukufuma pa nshi ya mutima e lyo no kulacitilako abena mwabo ifisuma. Na kabili tabalingile ukulalaala na bashili bena mwabo. Abacita ubucende balakalifya sana abena mwabo. Ubucende bulalenga abaupana baleka ukucetekelana kabili kuti bwalenga ne cupo ukupwa.—AbaHebere 13:4.

Mwe Bafyashi, Mulesambilisha Abana Benu

“Sambilisha umwana umo afwile ukubela; ne lyo akakota takafumemo.”—AMAPINDA 22:6.

Lesa alipeela abafyashi umulimo wa kusambilisha abana babo. Abafyashi balingile ukulasambilisha abana babo ukuba ne mibele iisuma kabili balingile ukulacita ifyo basambilisha abana babo. (Amalango 6:6, 7) Nga ca kuti umwana alufyanya, abafyashi ba mano tabakalipa ukucila mu cipimo. Umufyashi afwile ukuba “uwayanguka ukumfwa, uukokola ukulanda, uukokola ukukalipa.” (Yakobo 1:19) Nga ca kuti abafyashi bamona ukuti balingile ukulungika umwana wabo, balingile ukuba no kutemwa ilyo balemulungika kabili tabalingile ukumulungika ninshi nabakalipa.

Mwe Bana, Muleumfwila Abafyashi Benu

“Mwe bana, muleumfwila abafyashi benu . . . ‘Ulecindika wiso na noko.’”—ABENA EFESE 6:1, 2.

Abana bafwile ukulaumfwila abafyashi babo no kulabacindika. Nga ca kuti abana balecindika abafyashi babo, mu lupwa mulaba umutende ne nsansa. Abana abakalamba balalanga ukuti balicindika abafyashi babo nga ca kuti balebasakamana. Kuti babawamishako ing’anda nelyo ukubapeelako indalama sha kushitamo ifyo balekabila.—1 Timote 5:3, 4.