Ubupilibulo bwe Pinda

Mulandu Nshi uwa Kupaapaatila Ukufyompafyompa kwa Untu Apata?

UMUNTU wa mano uwapuutwamo na bulesa acitile uku kulandapo ukuti: “Ukulasa kwa untu atemwa kwa cishinka, lelo ukufyompafyompa kwa untu apata kwa [kupaapaata, NW].” (Amapinda 27:6) Ni shani aya mashiwi yali no kumfwika?

Umuntu uwa kutemwa akakulasa mu mampalanya mu nshila ya cishinka. Kuti pambi akufunda mu kuba no kutemwa mu mutima wakwe kabili mwi subilo lya kukucitila icisuma. Taulekabila ukupaapaata cibusa wa cine ku kwaafwa kwa musango yo nelyo fye ku kwebaula lintu wakukabila. Kabili fintu wingaba uwa mano nga mu luse wapokelele ukufunda kwakabilwa, ukulengululwa kukuulilila, nelyo ukwebaulwa kwakabilwa!

Nga ca kuti ulefwaya umuntu umo uwakupata ukukucitila icintu cimo icabamo icikuuku, nangu cibe fyo, ufwile ukumupaapaata. Mulandu nshi? Pa mulandu wa kuti ulupato lwakwe te kuti mu cifyalilwa lukongamikile ku kukupeela ukufyompafyompa. Ukucila, kuti aba uwakongamina ku kukusunga mu nshila ya bunkalwe. Icikuuku icili conse ico engalanga kuli iwe kuti capokwa ukufuma kuli wene mu kuba fye no bwafya bukalamba kabili mu kuba no kupaapaata ukwingi pa lubali lobe.

Ica kusekesha muli uku kuloshako ni imo iya milumbe ya kwa Yesu Kristu. Pa kashita kamo alandile pa lwa kwa mukamfwilwa uwapokelele ubulungi ukufuma kuli kapingula uushakwete akatiina ka kuli Lesa nelyo umucinshi ku muntu. Ni shani fintu atungulwike? Kapingula amwene kuli cene ukuti umwanakashi apokelele ukwilulukwa uko awaminwe pa mulandu fye wa kuti atwalilile ukumupaapaata. Yesu abomfeshe ici cilangililo ku kwebekesha abasambi bakwe ukukabila kwa “kupepa pe, no kukananenuka.”—Luka 18:1-8.

Ni Shani Fintu Abalungami Bafula Ilyo Imbifi Shaloba?

Amapinda 28:28 yalondolola ukuti: “Pa kwima kwa mbifi, abantu babelama; mu kuloba kwa shiko, abalungami bafula.” Ni shani fintu ici cishininkisha ica cine?

Ababifi kuti ‘baima’ mu maka, napamo nga bakateka bakaluka. Pa nshita ya musango yo, umuntu walungama alaifisa. Kuti pambi acite fyo pa mulandu wa kutiina ulumanimani lwabo. Kabili mulandu nshi te ifyo? Ca cine ukuti “abantu bacito lukambo ku bantu ku kubabifya.”—Lukala Milandu 8:9.

Lintu ababifi baloba, nangu cibe fyo, abalungami “bafula.” Shani ifyo? Mu kumonekesha mu kuti abalungami bafuma mu kubelama kwabo no kumonekela apabuuta. Muli fyo balatemfuma kabili bamoneka ukwingilishiwako mu mpendwa pa mulandu wa kuti tabakabila na kabili ukubelama. Nga ca kuti abatambalala lyene bateka, kuti bakanda incitatubi no kusumbula imyendele yalungama. Ico na co kuti cakwata ifya kufumamo fya kucefyako impendwa ya bantu bashalungama no kufusha abalungami.—Linganyeniko Amapinda 28:12; 29:2.

Abo abatambalala mu kwangufyanya bakamona ababifi baleloba ukufuma pe sonde mu “bushiku bwa bukali bwa kwa Yehova” ubulepalamina lubilo lubilo. E ico, fwayeni ubulungami no bufuuke umwabele fipimo fya bulesa, kabili kuti pambi mwabakwa ukwingila mu calo cipya ica kwa Lesa, umo abalungami bakafula mu cine cine.—Sefania 2:2, 3; 2 Petro 3:11-13.