Lishina Nshi Mwakwata?

MULI Baibolo, ishiwi “ishina” limo limo lilosha ku mibele ya muntu. Ica kumwenako, Imfumu ya mano Solomone yalembele ifi: “Lisuma ishina lya mucinshi ukucila amafuta yasuma ayanona, no bushiku bwa mfwa bwawamo kucilo bushiku bwa kufyalwa.” (Lukala Milandu 7:1; linganyeniko Amapinda 22:1.) Ukulingana na mashiwi ya kwa Solomone, umuntu tafyalwa ne shina lisuma. Lelo, ni lintu alekula e lyo anonka ishina lyabamo ubupilibulo bwine bwine. Ishina lyakwe lisokololwa ne mibele yakwe, nampo nga ni kape kape nelyo kaitemwe, uwa cililishi nelyo uwafina, uwaicefya nelyo uwa miiya, nangu fye umulungami nelyo imbifi.

Langulukeni Davidi. Lintu aleteeka, aali uwakosa kabili uushipungaila. Pa nshita imo ine, aliicefeshe no kusumina ifilubo fyakwe no kulapila ku membu acitile. Pali uyo mulandu, kasesema wa kwa Yehova atile Davidi aali “muntu ngo mutima wakwe [Lesa].” (1 Samwele 13:14) Davidi wacaice kale kale alikwete shina lisuma na Lesa.

Lelo Imfumu ya baYuda, Yehoramu alipuseneko. Aipangiile ishina lyabipa. Alengele abatekwa bakwe ukuleka ukupepa Yehova kabili aipeye bamunyina mutanda na bacilolo bamo abaYuda. Kuli pele pele, Yehova amupumine no bulwele bwatapata ubwa mwipeye. Baibolo itila Yehoramu “aile ukwabulo kumutemwa,” nelyo nge filanda Today’s English Version, “takuli uwakwete ubulanda lintu afwile.”—2 Imilandu 21:20.

Ubumi bwa kwa Davidi na Yehoramu bulangilila bucine bwe pinda lya mu Baibolo ilitila: “Iciibukisho ca mulungami ce paalo, lelo ishina lya babifi likatiipwa.” (Amapinda 10:7) E ico, umo umo alingile atontonkanya sana pa cipusho ca kuti, ‘Lishina lya musango nshi ndepanga na Lesa na bantu?’