• “Ica Buntunse Bonse”
    Ulupungu—1997 | February 15

    • 13. (a) Ni shani fintu Lukala Milandu 9:4, 5 atwaafwa ukumona ukubombesha kwa kufwaya ukulumbuka nelyo ukukwata amaka mu nshila yalinga? (b) Fishinka nshi tulingile ukulolenkana na fyo nga ca kuti buno e bumi fye bweka ubwabako? (Moneni utumashiwi tuli pe samba.)

      13 Ni kwi kuntu uko kulumbuka nelyo amaka fifisha umuntu? Ilyo inkulo imo ileya ne nkulo imbi ileisa, abantu balumbuka nelyo abakwatisha amaka balafwa no kulabwa. E fyo caba kuli bakakuula, bakemba ne ntukushi shimbi, abafwaisha ukuwamyako ubwikashi, na bambipo, pamo fye nga fintu caba kuli bapolitishani abengi ne ntungulushi sha fita. Pali aya yonse amantanga yalumbulwa, bantu banga aba kulungatika abo mwaishiba abaikeleko pa kati ka myaka ya ba 1700 na 1800? Solomone alengwile ifintu bwino bwino, ukusoso kuti: “Imbwa ya mweo yena yawamo kucile nkalamo iyafwa; pantu aba mweo bantu abaishibo kuti bakafwa, lelo abafwa bantu abashaishiba kantu nangu kamo, . . . iciibukisho cabo calabwa.” (Lukala Milandu 9:4, 5) Kabili nga ca kuti buno e bumi bweka fye ubwabako, lyene ukutukutila ilumbo nelyo amaka mu cituntulu kwaba mupu.a

  • “Ica Buntunse Bonse”
    Ulupungu—1997 | February 15

    • a The Watchtower inshita imo yalandile aya mashiwi yashilimuka ukuti: “Tatulingile ukonaula buno bumi mu fintu ifya fye . . . Nga ca kuti ubu e bumi bweka ubwabako, lyene takwaba icacindama. Buno bumi bwapala umupila uo mwapoosa mu muulu kabili uyo mu kwangufyanya ubwelela pa nshi na kabili. Bwaba cinshingwa icishikokola, iluba ilibonsa, umusonga wa cani uwingaputulwa no kuuma bwangu. . . . Lintu twalinganya ku ciyayaya, ubumi bwesu bwipi nga nshi. Ukulinganya ku nshita buba fye kalitoni akanono. Mu kushininkisha [Solomone] alilungika lintu alengula ukwangwako kwa mu bumi ukwa bantunse ukwingi ne mibombele no kutila fyaba mupu. Tulafwa bwangu ica kuti kanshi nga tatwafyelwe na kufyalwa, umo uwa mabilioni ya bantu abafyalwa no kufwa, kabili abanono nga nshi e beshiba ukuti e ko twali no kuba. Iyi mimwene taili ya kwenekela fye ifyabipa nelyo iya kufuupula nelyo iya cintefwila nelyo iya bucamwenso. Cili cine, icintu cashininkishiwa, imimwene ine ine, nga ca kuti ubu e bumi bweka ubwabako.”—August 1, 1957, ibula 472.