Kabumba Wesu Uwakulisha ne Milimo Yakwe

MWANDI kupuulama! Ifipooma fibulukuta ifya Iguaçú nelyo Niagara, imikonko ikalamba iya Arizona nelyo Hawaii, impito sha mu mpili sha babemba ishayemba isha ku Norway nelyo New Zealand—we kwaula kwa kupapa uko ifi fipapwa fya cifyalilwa fibilisha! Lelo bushe fyaba fya kuicitikilako fye ifya ico iciitwa Mulenga wa Mpanga? Iyo, fyalicila na pali co! Yaba milimo ya kupuutamo mwenso iya kwa Kabumba Wakulisha, Wishi wa mu mulu wakwato kutemwa pa lwa uyo imfumu ya mano Solomone alembele ati: “Acitile conse cine icayemba mu nshita ya ciko; abika ne nshita ya muyayaya mu mitima ya bantu, pa kuti umuntu te kuti eluke umulimo uo Lesa abomba ukutula pa kutendeka no kufika ku mpelelekesho.” (Lukala Milandu 3:11) Mu cine cine, kuti casenda iciyayaya ca nshita ku bantunse ukusapika yonse milimo ya bukata iyo Kabumba wesu aisusha ukubumbwa konse.

Mwandi ni Kabumba Wakulisha twakwata! Kabili ifyo twaba aba nsansa ukuti uyu Lesa wa maka yonse “pa mpela ya nshiku shino nalandila kuli ifwe mu Mwana, uo asontele ukube mpyani ya fintu fyonse, muli uyo kabili acitiile ifya muyayaya.” (AbaHebere 1:2) Uyu Mwana, Yesu Kristu, alitesekeshe ifintu fyayemba ifya kulenga kwa kwa Wishi. Aloseshe libili libili kuli fyene mu kulangilila imifwaile ya kwa Wishi na mu kulanda amashiwi ya kukoselesha kuli bakakutika bakwe. (Mateo 6:28-30; Yohane 4:35, 36) “Ku citetekelo” abengi baaliluka ukuti ifipapwa fya kulenga “fyalengeelwe ku cebo ca kwa Lesa.” (AbaHebere 11:3) Ubumi bwesu bwa cila bushiku bufwile ukubelebesha icitetekelo ca musango yo.—Yakobo 2:14, 26.

Fyalikulisha, mu cine cine, ifya kulenga fya kwa Lesa wesu. Fibelebesha mu kupapusha amano yakwe, amaka yakwe, ubulungami bwakwe, no kutemwa kwakwe. Ku ca kumwenako, asendeeke isonde lyesu no kulibika mu kushinguluka ku kasuba pa kuti ububumbo bwakwe bwa ku nshita ya ku ntanshi, umuntu, engaipakisha ukushinguluka kwa kulengo kucankwa ukwa fiputulwa fya mwaka. Lesa alandile ati: “Inshiku shonse she sonde, takwakaleke ukubapo ukubyale mbuto no kulobolola, no kutalala no kukaba, no lusuba no mwela, na kasuba no bushiku.” (Ukutendeka 8:22) Ukulundapo, Lesa mu kufusha atutiile mwi sonde ubukumu bwa mu mushili. Ukucilisha, apayenye amenshi ayengi, pa numa ukwisasanguka icisolobelo cacindama ne ca kutungilila ku bumi bonse ubwa pe sonde.

Mu kukonkana kwabamo muyano ukwa ‘nshiku sha kubumba’ mutanda, bumo bumo amakana ya myaka ukulepa, “amaka yabomba ya kwa Lesa” (NW) yatwalilile ukupekanye sonde ku bwikashi bwa muntu. Ulubuuto tumwenako, umwela uo tupeema, umushili wauma apo twikala, ifimenwa, ukukonkana kwa kasuba no bushiku, isabi, ifyuni, inama—fyonse fyaletelweko mu muyano na Kabumba wesu Wakulisha ku kubombelo muntu no kuipakisha. (Ukutendeka 1:2-25) Mu kushininkisha, kuti twailunda kuli kemba wa malumbo mu kupunda atuti: “Ifyo yafule milimo iyo mwacita, mwe Yehova! fyonse ifyo mu mano e mo mwaficitila; pano isonde paisulapo ifibumbwa fyenu.”—Ilumbo 104:24.

Umulimo wa Kulamuka uwa kwa Lesa uwa Bubumbo

Ilyo “bushiku” bwalenga mutanda ubwa kubumba bwalepalamina ku mpela, Lesa alengele umwaume kabili lyene uwa kwafwana nankwe, umwanakashi. Mwandi kalume kabamo kulamuka ku bubumbo bwa pe sonde, ubwacilapo nga nshi kupapusha ukucila pa fya kulenga fyonse ifyatangilileko! Ilumbo 115:16 litwebo kuti: “Imyulu myulu ya kwa Yehova; ne calo apeela ku bana ba bantu.” Mu kulinganako, Yehova aelengenye ifwe fwe myeo ya buntunse ukuti ponse pabili twingacankilwamo no kubomfya ifya kulenga fyakwe ifyabangilileko pe sonde. Ifyo tufwile ukuba aba kutootela pa menso yesu—ayapikana ukucila pali kamera yawamisha—ayengasobolola icalo cabalabata icatushinguluka! Twalikwata amatwi yesu—ayacilapo busuma ukucila pa fisoselo ifili fyonse ifyapangwa no muntu—ukutwaafwa ukuipakisho kulanshanya, inyimbo, no lwimbo lwa sha malumbo ulwa fyuni. Twalikwata imibombele ya milandile iya cifumanda, ukusanshako no lulimi luiteulula. Utupumba twa kusondelako twa pa lulimi, ukukumbinkanishiwa na mano ya kununsha, na fyo fine fipayanishisha ica kucankilwamo mu kuipakisha ukulekanalekana kwabule mpela ukwa fya kulya. Kabili fintu tutesekesha ukukumya kwa kuboko kwa kutemwa! Mu kushininkisha kuti twatootela Kabumba wesu, nge fyacitile kemba wa malumbo uwatile: “Ndemutootela, pa kuti nalengelwe mu musango wa kutiinya kabili uwa kupapa; yapesha amano imilimo yenu. Umutima wandi mwaliwishibishe.”—Ilumbo 139:14.

Icikuuku ca Kutemwa ica kwa Kabumba Wesu

Kemba wa malumbo alembele ati: “Tooteleni Yehova, pantu musuma, . . . uucita eka ifipesha amano fikalamba; pantu [ca muyayaya icikuuku cakwe ica kutemwa, NW].” (Ilumbo 136:1-4) Cilya cikuuku ca kutemwa cilemusesha nomba ku kucita ifya kupapa ifyakulisha ukucila pa fya kulenga fyonse ifyo twalondolola nomba line. Ee, nelyo fye ni lintu aletusha ukufuma ku kubumba ifintu fya ku mubili, alebumba pa cipimo ca ku mupashi. Ici alecita mu kwasuka ku kusonsomba kubifi ukwalungikwe pali wene. Ni shani fyo?

Umwaume wa kubalilapo no mwanakashi babikilwe muli paradise wa bukata, Edene. Nangu cibe fyo, malaika wafutatuka, Satana, aimike umwine ngo mulungu kabili atungulwile balya bantunse babili mu kupondokela Yehova. Mu bulungi, Lesa abapingwilile ku mfwa, mu kuba ne ca kufumamo ca kuti abana babo, umushobo wa buntunse onse fye, wafyalilwa mu mibele ya lubembu, iya kufwa. (Ilumbo 51:5) Ubulondoloshi bwa Baibolo ukukuma kuli Yobo bulango kuti Satana asonsombele Lesa, ukutungo kuti takuli umuntu uwingasunga bumpomfu kuli Wene pe samba lya bwesho. Lelo Yobo ashininkishe Satana ukuba kabepa wabipisha, nge fyacita na bambi abengi ababomfi ba busumino aba kwa Lesa mu nshita sha Baibolo no kutentemukila ukufika ku kasuba kesu. (Yobo 1:7-12; 2:2-5, 9, 10; 27:5) Yesu, ngo muntu wapwililika, alangishe ukusunga bumpomfu ukushingalinganishiwako.—1 Petro 2:21-23.

Muli fyo, Yesu aali na maka ya kusoso kuti, ‘Kateka wa pano isonde [Satana] muli ine takwete kantu nangu kamo.’ (Yohane 14:30) Nalyo line, ukufika kuli kano kasuba “pano isonde ponse palaala mu maka ya Mubifi.” (1 Yohane 5:19) Pa kuba napaasha insambu sha bumulopwe bwa kwa Yehova, Satana alipeelwa imyaka imo 6,000 ukulanga nampo nga ukuteka kwakwe kwine pa mutundu wa muntu kuti kwatunguluka. Fintu afilwa mu kubamo bulanda, nga fintu imibele ya calo ilebotelela itwalililo kucitilo bunte! Lesa wesu wa kutemwa, Yehova, bwangu bwangu akafumyapo iyi sosaite ya calo cabola, ukupampamika bumulopwe bwakwe bwakwate nsambu pa mulu we sonde. Mwandi kwilulukwa kwabamo insansa ico cikaleta ku bantunse abafuluka ukuteka kwa mutende, ukwalungama!—Ilumbo 37:9-11; 83:17, 18.

Nangu cibe fyo, ico tacili e conse! Icikuuku ca kutemwa ica kwa Lesa cikalangwa mu kulundapo pe shinte lya mashiwi ya kwa Yesu pali Yohane 3:16 aya kuti: “Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” Uku kubweshiwamo ku mutundu wa muntu ukwa cilolelo ca bumi bwa muyayaya pe sonde kubimbamo ukulenga kwa fintu fipya. Finshi ifi? Ni shani fintu finonsha abantunse abateta? Icipande cesu cikonkelepo cilelondolola.