Amano ya Bukapepa Ni Mwi Yamonekela?

“AMANO ya mupina yasuulwa ne fyebo fyakwe fintu ifishumfwika.” Ayo e mashiwi Imfumu ya mano Solomone yasondwelelemo ilyashi lya muntu mubusu lelo uwa mano uwapuswishe umusumba umo ku bonaushi. Ku ca bulanda, “takwali muntu uwaibukishe ulya muntu mupina.”—Lukala Milandu 9:14-16.

Abantunse balitemwa sana ukusuula abapina, te mulandu nangu abapina babombe imilimo isuma. E fyo cali kuli Yesu. Esaya aseseme pa lwa wene ati: “Ali uwasuulwa kabili uwakankambwa ku bantu, umuntu wa fya bulanda kabili uwaishibana no bucushi.” (Esaya 53:3) Yesu ali uwasuulwa kuli bamo pantu fye tali uwalumbuka nge ntungulushi shimbi ishalumbuka isha mu nshiku shakwe. Lelo, alikwete amano ayacila aya muntunse uuli onse umubembu. Abantu mu mushi mwaleikala Yesu balikeene ukusumina ukuti uyu “mwana wa kwa kabasa” alikwete amano yacila abantunse kabili alecita ifya maka ifingi. Lelo, ico cali cilubo cabipisha, pantu ubulondoloshi butwalilila abuti Yesu “tacitile kulya ifya maka ifingi pa mulandu wa kuti babulile ukutetekela.” Mwandi balya bantu balipanishe shuko!—Mateo 13:54-58.

Shi twikacita icilubo cimo cine. Yesu atile “amano yapeelelwe nsambu ku fifumamo.” Abacita imilimo ya kwa Lesa no kulenga abantu beshibe amano yafuma ku muulu bakankaala, te pa mulandu wa kulumbuka nelyo ififulo bakwata, lelo ku “fisabo fisuma” ifyo balangisha—e kuti icitetekelo cabo ne milimo yabo ifyashimpwa pali Baibolo.—Mateo 7:18-20; 11:19.