Baeluda, Pinguleni mu Kuba no Bulungami

“Akuumfweni imilandu pa kati ka bamunyinenwe, no kupingulo kulungeme.”—AMALANGO 1:16.

1. Mu mulandu wa bupingushi, kupeelwa nshi ukwa maka ukwacitwa, kabili cinshi cintu ici citubulula ku bapingushi ba buntunse?

PAMO nga Kapingula Wapulamo, Yehova alipeela amaka ya bupingushi ku Mwana wakwe. (Yohane 5:27) Mu kukonkapo, pamo ngo Mutwe wa cilonganino ca Bwina Kristu, Kristu abomfya ibumba lya musha wa cishinka kabili uwashilimuka ne Bumba lyakwe Ilitungulula ku kusonta baeluda, abo pa nshita shimo babomba nga bakapingula. (Mateo 24:45-47; 1 Abena Korinti 5:12, 13; Tito 1:5, 9) Pamo nga bakapingula bacepako, aba balikakililwako ukukonka mu kupalamisha ica kumwenako ca Bakapingula ba ku mulu, Yehova na Kristu Yesu.

Kristu—Kapingula wa ca Kumwenako

2, 3. (a) Busesemo nshi ubwa buMesia busokolola imibele ya kwa Kristu pamo nga Kapingula? (b) Fishinka nshi ukucilisha fyawaminwa ukumonwa?

² Ulwa kwa Kristu pamo nga Kapingula, calembelwe mu busesemo ukuti: “Pali wene pakekalo mupashi wa kwa Yehova, umupashi wa mano kabili uwa mucetekanya, umupashi wa kutubulula kabili uwa bumpalume, umupashi wa kwishiba kabili uwa katiina ka kuli Yehova. Ukupekwa kwakwe kukaba mu katiina ka kuli Yehova; te ku kumona kwa menso yakwe akapingwila, kabili te ku kuumfwa kwa matwi yakwe akakalulwila, lelo akapingwilo mulanda mu bulungami, no kukalulwila mu kutambalala abafuuka ba mu calo.”—Esaya 11:2-4.

³ Moneni muli bulya busesemo imibele iyo ilenga Kristu ‘ukupingwila aba pano isonde mu bulungami.’ (Imilimo 17:31) Apingula mu kumfwana no mupashi wa kwa Yehova, amano ya bulesa, umucetekanya, ukutubulula, no kwishiba. Moneni, na kabili, ukuti apingwila mu katiina ka kuli Yehova. Muli ifyo, “icipuna ca kupingwilapo ca kwa Kristu” caba, mu kwimininako, “[cipuna, NW] ca kupingwilapo ca kwa Lesa.” (2 Abena Korinti 5:10; Abena Roma 14:10) Aliba uwasakamanishisha ku kupingula imilandu mu nshila Lesa apingwilamo yene. (Yohane 8:16) Tapingula pa kumona fye pa menso nelyo ku maŋumfuŋumfu fye. Apingwila mu kutambalala pa lubali lwa bafuuka na balanda. Mwandi ni Kapingula wawamisha! Kabili mwandi ca kumwenapo cawamisha ku bantunse bashapwililika abo bepushiwa ukubomba mu cifulo ca bupingushi ilelo!

Abapingushi ba pe Sonde

4. (a) Cinshi cikaba umo uwa milimo ya ba 144,000 mu kati ka Kuteka kwa Myaka Ikana ukwa kwa Kristu? (b) Busesemo nshi bulangisha ukuti Abena Kristu basubwa bamo baali no kusontwa pamo nga bapingushi ilintu bacili pe sonde?

⁴ Amalembo yalangilila ukuti impendwa inono mu kulinganishiwako iya Bena Kristu basubwa, ukutendeka na batumwa 12, bakaba abapingushi banankwe na Kristu Yesu mu kati ka Myaka Ikana. (Luka 22:28-30; 1 Abena Korinti 6:2; Ukusokolola 20:4) Abashalapo ba filundwa fyasubwa ifya kwa Israele wa ku mupashi pe sonde abene bene balipingwilwe no kupuupuutulwa mu 1918-19. (Malaki 3:2-4) Ukukuma kuli uku kupuupuutulwa kwa kwa Israele wa ku mupashi, casesemwe ukuti: “Nkabweseshamo abapingushi bobe nga pa kubala, na bakabilo bobe nga pa kutendeka.” (Esaya 1:26) Muli ifyo, kwati fye fintu acitile ‘pa kubala’ kwa kwa Israele wa ku mubili, Yehova alipeela abashalapo bapuupuutulwa abapingushi balungama na bakabilo.

5. (a) Ni bani ‘abasontelwe ku kupingula’ pa numa ya kupuupuutulwa kwa kwa Israele wa ku mupashi, kabili ni shani fintu balangishiwa mwi buku lya Ukusokolola? (b) Ni bani nomba abaleyafwako bakangalila basubwa mu mulimo wa bupingushi, kabili ni shani fintu aba balekanshiwa ukuba abapingushi bawaminako?

⁵ Ica kubalilapo, ‘aba mano’ abo ‘abasontelwe ku kupingula’ bonse baali bakalamba basubwa, nelyo baeluda. (1 Abena Korinti 6:4, 5) Bakangalila basubwa aba citetekelo, abacindikwa balangishiwa mwi buku lya Ukusokolola nga baikatwa mu kuboko kwa kulyo ukwa kwa Yesu, uko e kuti, pe samba lya kulama kwakwe no kutungulula. (Ukusokolola 1:16, 20; 2:1) Ukutula 1935 abasubwa balipokelela ukutungilila kwa cishinka ukufuma kwi “bumba likalamba,” ililesanduluka lyonse ilyo isubilo lya liko lili kupusunsuko “bucushi bukalamba” no kwikala kuli pe na pe pe sonde lya paradise. (Ukusokolola 7:9, 10, 14-17) Ilyo “ubwinga bwa Mwana wa mpaanga” bulepalamina, abengi aba aba balesontwa kwi Bumba Litungulula lyasubwa ukubomba pamo nga baeluda kabili abapingushi mu filonganino fya Nte sha kwa Yehova ukucila pali 66,000 ukupulinkana isonde lyonse.a (Ukusokolola 19:7-9) Ukupitila mu masukulu yaibela, balekanshiwa ukubomba pa fishingamo muli sosaite ya “calo cipya.” (2 Petro 3:13) Isukulu lya Butumikishi bwa Bufumu, ilyacitilwe ku mpela ya 1991 mu fyalo ifingi, lyakomaile pa kubombapo kwalinga pa milandu ya bupingushi. Baeluda abalebomba nga bapingushi baliba abakakililwako ukupashanya Yehova na Kristu Yesu, abo amapingushi yabo yaba aya cine kabili ayalungama.—Yohane 5:30; 8:16; Ukusokolola 19:1, 2.

Abapingushi ‘Abendela mu Katiina’

6. Mulandu nshi baeluda ababomba mu makomiti ya bupingushi balingile ‘ukwendela mu katiina’?

⁶ Nga ca kuti Kristu umwine wine apingwila mu katiina ka kuli Yehova kabili mu kuba no kwaafwa kwa mupashi Wakwe, fintu baeluda bashapwililika balingile ukucite co mu kucilapo! Lintu bapeelwa umulimo wa kubomba muli komiti ya bupingushi, balekabila ‘ukwendela mu katiina,’ ukulilila “kuli Shifwe uupingulo . . . kwabula akapaatulula” ku kubaafwa ukupingwila mu bulungami. (1 Petro 1:17) Balingile ukwibukisha ukuti balebomba no bumi bwa bantu, “imyeo” ya bantu, pamo nga abo “abakaba no kulubulula.” (AbaHebere 13:17) Mu cilolwa ca ici, mu kushininkisha bakalubulula pa ntanshi ya kwa Yehova pa filubo ifingasengaukwa ifili fyonse ifyo pambi bengacita. Mu kulandapo kwakwe pa AbaHebere 13:17, J. H. A. Ebrard alembele ukuti: “Caba mulimo wa kwa kacema ukulinda imyeo iyapeelwa ku kusakamana kwakwe, kabili . . . afwile ukulubulula pa mulandu wa iko, pa mulandu wa iyo iyaluba ukupitila mu cilubo cakwe. Ili lili lishiwi lyakatama. Lekeni umutumikishi onse uwa cebo alanguluke, ukuti mu kuitemenwa alipokelela ici cifulo ca bulashi icabamo icishingamo ica kutiinya [ukulengo mwenso].”—Linganyeniko Yohane 17:12; Yakobo 3:1.

7. (a) Cinshi cintu abapingushi ba mu kasuba ka lelo balingile ukwibukisha, kabili cinshi caba e buyo bwabo? (b) Masambililo nshi yantu baeluda balingile ukusambilila ukufuma kuli Mateo 18:18-20?

⁷ Baeluda abalebomba mu cifulo ca bupingushi balingile ukwibukisha ukuti Bakapingula ba cine cine aba mulandu umo umo ni Yehova na Kristu Yesu. Ibukisheni ifyo abapingushi mu Israele baebelwe: “Tamulepingwila muntunse, kano Yehova uwaba pamo na imwe mu cebo ca mu bupingushi. E ico nomba lekeni akatiina kuli Yehova kabe pali imwe. . . . E fyo mulecita no kukanaba ba mulandu.” (2 Imilandu 19:6-10) Mu kuba no mwenso wa kucindikisha, baeluda abalepingula umulandu balingile ukucita apo bengapesha ku kushininkisha ukuti Yehova mu cine cine ‘ali nabo mu bupingushi.’ Ukupingulapo kwabo kulingile mu kulungika ukubelebesha inshila Yehova na Kristu balanguluka umulandu. Cintu mu mampalanya ‘bakaka’ (basanga uwa mulandu) nelyo ‘bakakula’ (basanga uwa kaele) pe sonde cilingile ukuba icakakwa nelyo ukukakulwa kale kale mu mulu—nga fintu casokololwa ku calembwa mu Cebo ca kwa Lesa icapuutwamo. Nga ca kuti bapepa kuli Yehova mwi shina lya kwa Yesu, Yesu akaba “mu kati kabo” ku kubaafwa. (Mateo 18:18-20, NW, utulembo twa pe samba; Ulupungu lwa kwa Kalinda, February 15, 1988, ibula 9) Imibele pa kumfwa umulandu kwa mu bupingushi ilingile ukulangisha ukuti Kristu mu cine cine ali mu kati kabo.

Bakacema ba Nshita Yonse

8. Cinshi cilingile ukuba e kwangwako kwa baeluda ukukalamba ukulola ku mukuni, nga fintu calangililwa na Yehova na Yesu Kristu? (Esaya 40:10, 11; Yohane 10:11, 27-29)

⁸ Baeluda tabapingula inshita yonse. Baba ni bakacema ba nshita yonse. Ni bakondapa, te ba kukanda. (Yakobo 5:13-16) Imfundo ya kutendekelapo iyaba ku numa ye shiwi lya ciGreek ilipilibula kangalila (e·piʹsko·pos) ni iyo iya kusakamana kwabamo ukucingilila. Theological Dictionary of the New Testament ilondololo kuti: “Ukupyanikapo kacema [pali 1 Petro 2:25], inumbwilo [e·piʹsko·pos] itubulula umulimo wa bucemi uwa kubaka nelyo ukulinda.” Ee, icishingamo cabo icikalamba caba kubaka impaanga no kushilinda, ukushisungilila mu kati ka mukuni.

9, 10. (a) Ni shani fintu Paulo akomaile pa mulimo wa kubalilapo uwa baeluda, e co cipusho nshi pambi cingepushiwa? (b) Cinshi cintu amashiwi ya kwa Paulo pa Imilimo 20:29 yatubulula, e co ni shani fintu baeluda pambi bengesha ukucefyako impendwa ya milandu ya bupingushi?

⁹ Ukulanda kuli baeluda ba mu cilonganino ca ku Efese, umutumwa Paulo akomailepo mu kulinga lintu atile: “E ico muleyangwa mwe bene no mukuni onse uo umupashi wa mushilo wamubikileko bucilolo; akucemeni ulukuta lwa kwa [Lesa, NW] ulo anonkeele mu mulopa [wa Mwana wakwe wine, NW].” (Imilimo 20:28) Paulo aebekesha ukucema, te kukanda. Baeluda bamo kuti pambi bacita bwino ukutontonkanya mu kushika pa cipusho cakonkapo: ‘Bushe kuti twapusushako inshita ikalamba ikabilwa ku kufwailisha no kubomba pa milandu ya mu bupingushi nga ca kuti twapeele inshita ikalamba na maka ku kucema?’

¹⁰ Ca cine, Paulo asokele pa lwa “mimbulu ikali.” Lelo bushe tashimawile iyi mimbulu pa mulandu wa ‘kukanasunga umukuni no mutembo’? (Imilimo 20:29, NW) Kabili ilintu atubulwile ukuti bakangalila ba citetekelo balingile ukutamfya iyi “imimbulu,” bushe amashiwi yakwe tayalangilila ukuti baeluda balingile ukusunga ifilundwa fimbi ifya mukuni “no mutembo”? Lintu impaanga yanaka lwa ku mupashi kabili yaleka ukubomba, cinshi cintu wene alekabila—ukupumwa nelyo ukundapwa, ukukanda nelyo ukucemwa? (Yakobo 5:14, 15) Muli ifyo, baeluda balingile ukutantika inshita lyonse ku mulimo wa bucemi. Ici kuti pambi caletako ica kufumamo ca nsansa ica kupoosa inshita yacepako mu milandu ya bupingushi iipoosa inshita iibimbamo Abena Kristu abacimfiwa ku lubembu. Mu kushininkisha, ukwangwako kwa kubalilapo ukwa baeluda kulingile kwaba kupayanya intulo ya kwaafwa no kupembula, muli ifyo ukulundulula umutende, icibote, no mutelelwe pa kati ka bantu ba kwa Yehova.—Esaya 32:1, 2.

Ukubomba nga Bakacema Kabili Bakapingula Ababombela Bambi

11. Mulandu nshi baeluda abalebomba mu makomiti ya bupingushi balingile ukukanaba na kapaatulula kabili ukuba na “mano ayafuma mu mulu”?

¹¹ Ubucemi bwacilapo ukusakamanishisha pa ntanshi Umwina Kristu talaingila mu bubi kuti pambi bwanashako impendwa ya milandu ya bupingushi pa kati ka bantu ba kwa Yehova. (Linganyeniko Abena Galatia 6:1.) Nangu ni fyo, pa mulandu wa lubembu lwa buntunse no kukanapwililika, bakangalila ba Bwina Kristu kuti pambi mu nshita mu nshita bafwaikwa ukubomba ne milandu ya kulufyanya. Fishinte nshi filingile ukubatungulula? Ifi tafyayaluka ukufuma pa nshita sha kwa Mose nelyo inshita ya Bena Kristu ba mu kubangilila. Amashiwi ya kwa Mose ayaloshiwe ku bapingushi ba mu Israele yacili yalabomba aya kuti: “Akuumfweni imilandu pa kati ka bamunyinenwe, no kupingulo kulungeme . . . Mwiba na kapaatulula mu kupingula.” (Amalango 1:16, 17) Ukubulwa akapaatulula cishibilo ca “mano ayafuma mu mulu,” amano ayaba ayakatama nga nshi kuli baeluda balebomba mu makomiti ya bupingushi. (Yakobo 3:17; Amapinda 24:23) Amano ya musango yo yakabaafwa ukwiluka ubupusano bwaba pa kati ka bunake no bubifi.

12. Ni mu mano nshi muntu abapingushi balekabila ukuba te balungami fye lelo abaume basuma?

¹² Baeluda bafwile ‘ukupingula mu kulungama,’ mu kumfwana ne fipimo fya kwa Yehova ifya calungama ne calubana. (Ilumbo 19:9, NW) Nalyo line, ilintu baletukuta ukuba abaume balungama, na kabili balingile ukwesha ukuba abaume basuma, mu kumfwikisha ukupusanya Paulo apanga pa Abena Roma 5:7, 8. Ukulandapo pali ifi fikomo mu cipande ca ciko pa lwa “Righteousness,” (Ubulungami) icitabo Insight on the Scriptures cilondolola ukuti: “Ukubomfiwa kwa numbwilo ya ciGreek kulangilila ukuti umuntu uwaishibikilwa ku, nelyo ulekanishiwa ku, busuma ni umo uufwaila bambi ubusuma (uwakongamina ku kucita ubusuma kuli bambi nelyo ukubanonsha) kabili uubombela bambi (ukulumbulula ubusuma bwa musango yo mu kucincila). Tayangwa fye ku kucita ico ubulungi bukabila lelo afika ukwalepa ukucila pali ici, ukukuntwa ku kulangulukilako ukutuntulu kuli bambi no kufwaisha kwa kubanonsha no kubaafwa.” (Volyumu 2, ibula 809) Baeluda abashaba fye abalungami lelo na kabili abasuma bakasunga bakacita wa fibi mu kuba no kulangulukilako kwa cikabilila ukwabamo icikuuku. (Abena Roma 2:4) Balingile ukufwaya ukulangisha inkumbu ne icililishi. Balingile ukucita apo bengapesha ku kwafwa kacita wa fibi ukumona ukukabila kwa kulapila, nangu cingati pa kabala ntanshi kuti pambi amoneka nga uushileankulako ku kubombesha kwabo.

Imibele Yalinga pa Kumfwa Umulandu

13. (a) Lintu eluda abomba ngo mupingushi, cinshi cintu ashileka ukuba? (b) Kufunda nshi ukwa kwa Paulo kubomba pa kumfwa umulandu kwa mu bupingushi?

¹³ Lintu imibele ilekabila ukumfwa umulandu kwa mu bupingushi, bakangalila tabalingile ukulaba ukuti bacili ni bakacema, abalebomba ne mpaanga sha kwa Yehova, pe samba lya “mucemi musuma.” (Yohane 10:11) Ukufunda Paulo apeele ku kwaafwa kwa lyonse ukupeelwa ku mpaanga abali mu mafya kulabomba mu kuba na maka yalinganako pa kumfwa umulandu kwa mu bupingushi. Alembele ukuti: “Mwe ba bwananyina, umuntu nga asangilishiwa mu bubi bumo, imwe mwe ba bumupashi, mupuupuutuleni uwabe fi ne mitima iyanakilila; uleilolekesha we mwine, epali nobe waeshiwa. Musendelane ifisendo, kabili e fyo mufishepo imbela ya kwa Kristu.”—Abena Galatia 6:1, 2.b

14. Ni shani fintu bakangalila balingile ukumona ukumfwa umulandu kwa mu bupingushi, kabili imibele yabo ukulola kuli kacita wa fibi ilingile ukuba shani?

¹⁴ Ukucila ukuilanguluka abene ukuba abapingushi bacilamo abalekumanina ku kupeela ukukanda, baeluda abalebomba muli komiti ya bupingushi balingile ukumona ukumfwa umulandu ngo lubali na lumbi ulwa mulimo wabo uwa bucemi. Imo iya mpaanga sha kwa Yehova ili mu mpika. Cinshi bengacita ku kupususha wene? Bushe cili kucelwa nga shi ku kwaafwa iyi mpaanga iilubente ukufuma mu mukuni? Kuti twasubila ukuti tacili kucelwa nga nshi. Baeluda balingile ukusungilila imimwene yashininkishiwa ukulola ku kulangisha inkumbu apo ici cingalinga. Tacilepilibula ukuti balingile ukunenuna ifipimo fya kwa Yehova nga ca kuti ulubembu lwabipisha nalucitwa. Lelo ukuba kwabo abaibukila ku fishinka ifili fyonse ifilenashako umulandu kukabaafwa ukutanununa inkumbu apo cingacitika. (Ilumbo 103:8-10; 130:3) Ica bulanda ukucisosa, bakacita wa fibi bamo baliba abomankonso nga nshi mu mibele yabo ica kuti baeluda balaba abakakililwako ukulangisha ukushangila, nangu cingati te bunkalwe.—1 Abena Korinti 5:13.

Imifwaile ya Kumfwa Umulandu kwa mu Bupingushi

15. Lintu impika yabipisha yaimako pa kati ka bantu, cinshi cilingile ukupimwa intanshi?

¹⁵ Lintu impika yabipisha yaimako pa kati ka bantu, baeluda ba mano bali no kupima intanshi nampo nga abo babimbilwemo balyesha ukupwisha umulandu pa mbali, mu mupashi wa pali Mateo 5:23, 24 nelyo Mateo 18:15. Nga ca kuti ici califilwa, nakalimo ukufunda ukufuma kuli eluda umo nelyo babili kuti kwakumanina. Incitilo ya bupingushi iba fye iyakabilwa nga ca kuti ulubembu lwabipisha ulo lwingatungulula ku kutamfiwa nalucitwa. (Mateo 18:17; 1 Abena Korinti 5:11) Kulingile ukubako icishinte cabamo ukupelulula ica mu Malembo ica kupangila komiti ya bupingushi. (Moneni Ulupungu lwa kwa Kalinda, September 15, 1989, ibula 18.) Lintu imo yapangwa, baeluda bafikapo bwino balingile ukusobolwa ku mulandu.

16. Cinshi cintu baeluda besha ukupwishishisha ukupitila mu kumfwa umulandu kwa mu bupingushi?

¹⁶ Cinshi cintu baeluda besha ukupwishishisha ukupitila mu kumfwa umulandu kwa mu bupingushi? Ica kubalilapo, te kuti cicitikeko ukupingwila mu bulungami kano nga ca kuti icine caishibikwa. Ukupala mu Israele, imilandu yakakala ifwile ‘ukufwaya mu kwipushisha.’ (Amalango 13:14; 17:4) E co ubuyo bumo ubwa kumfwa umulandu buli kufwailisha ifishinka ifya mulandu. Lelo ici kuti kabili cilingile ukucitwa mu kuba no kutemwa. (1 Abena Korinti 13:4, 6, 7) Lintu ifishinka fyaishibikwa, baeluda bakacita apo bengapesha ukucingilila icilonganino no kusungilila mu kati na nkati ka ciko ifipimo fya kwa Yehova ifyasumbuka no kukonkoloka kwakakuka ukwa mupashi wakwe. (1 Abena Korinti 5:7, 8) Nangu cibe fyo, imo iya mifwaile ya kumfwa umulandu yaba kupususha, nga cingacitika, umubembu uli mu busanso.—Linganyeniko Luka 15:8-10.

17. (a) Ni shani fintu umuntu wapeelwa umulandu alingile ukusungwa mu kati ka kumfwa umulandu, kabili mu kuba ne mifwaile nshi? (b) Cinshi cintu ici cakakabila pa lubali lwa filundwa fya komiti ya bupingushi?

¹⁷ Umuntu uwatungwa umulandu talingile ukusungwa mu kupusanako ukucila pamo nge mpaanga ya kwa Lesa. Wene alingile ukusungwa mu mutembo. Nga ca kuti ulubembu (nelyo imembu) nalucitwa, imifwaile ya bapingushi balungama ikaba ya kwaafwa umubembu ukuteuluka, ukumfwikisha icilubo ca nshila yakwe, ukulapila, na muli ifyo ukusompolwa ukufuma “mu citeyo ca kwa [Ciwa, NW].” Cikakabila “ukusambilisha,” ‘ukufunda mu kufuuka.’ (2 Timote 2:24-26; 4:2) Ni shani nga ca kuti umubembu lyene akutuluka ukuti nabembuka, mu cine cine camupita ku mutima, kabili aipusha Yehova ku kulekelelwa? (Linganyeniko Imilimo 2:37.) Nga ca kuti komiti naishininwa ukuti mu kufumaluka alefwaya ukwaafwa, mu kubamo ukupelulula te kuti kubeko umulandu wa kumutamfisha.—Moneni Ulupungu lwa kwa Kalinda, August 1, 1983, ibula, 31 paragrafu 1.

18. (a) Ni lilali lintu komiti ya bupingushi ilingile ukulangisha ukushangila mu kutamfya kacita wa fibi? (b) Ni mu cilolwa ca mibele nshi iya kulengo bulanda intu baeluda balingile ukupilikita pa lubali lwa mpaanga yalubanta?

¹⁸ Pa lubali lumbi, lintu ifilundwa fya komiti ya bupingushi balolenkana no mulandu walengama uwa busangu bwakaluka, ukupondoka kwa ku mufulo ukulwisha amafunde ya kwa Yehova, nelyo ububifi bwamonekesha, umulimo wabo kucingilila ifilundwa fimbi ifya cilonganino ukupitila mu kutamfya ncitatubi ushalapila. Komiti ya bupingushi tayaba iyakakililwako ukukumana libli libili na kacita wa fibi nelyo ukumulandilako, ukwesha ukumupatikisha ukulapila, nga ca kuti cili icamonekesha ukuti nabulisha ubulanda bwa bukapepa.c Mu myaka ya nomba line ukutamfya mu kusaalala kwa calo kwaba mupepi na 1 peresenti uwa bakasabankanya. Ico cilepilibula ukuti mupepi na pa mpaanga umwanda ishishala mwi cinka, imo ilaluba—nakalimo pa nshita inono. Ukulanguluka inshita no kubombesha cisendako ukuleta umuntu mwi cinka, bushe te ca kulengo bulanda ukwishiba ukuti amakumi ya makana ‘balapeelwa kuli Satana’ cila mwaka?—1 Abena Korinti 5:5.

19. Cinshi cintu baeluda balebomba muli komiti ya bupingushi bashilingile ukulaba, e co cinshi cikaba ubuyo bwabo?

¹⁹ Baeluda baletendeka umulandu wa mu bupingushi balingile ukwibukisha ukuti imilandu iingi iya lubembu mu cilonganino ibimbamo ubunake, te bubifi. Tabalingile ukulaba icilangililo ca kwa Yesu ica mpaanga yaluba, ico asondwelele na mashiwi ya kuti: “Ndemweba, nati, ni fyo fine kukabo kusekelela mu mulu pa mubembu umo uwalapila, ukucila pa bantu abalungama amakumi pabula na pabula abashaba na mulandu wa kulapilila.” (Luka 15:7) Mu cine cine, “[Yehova, NW] . . . [tafwayo] muntu ukonaika, lelo onse ukulola ku kulapila.” (2 Petro 3:9) Mu kuba no kwaafwa kwa kwa Yehova, shi amakomiti ya bupingushi ukupulinkana icalo conse bacite apo bengapesha ku kulenga ubuseko mu mulu ukupitila mu kwafwa bakacita wa fibi ukumona ukukabila kwa kulapila no kutendeka ukwenda na kabili pa nshila ya kamfyemfye iyo itungulula ku bumi bwa muyayaya.—Mateo 7:13, 14.

[Amafutunoti]

Ifipusho fya Kupitulukamo

◻ Ukukonka ica kumwenako ca kwa Kacema Mukalamba na Kacema Musuma, cinshi cilingile ukuba ubuseko bukalamba ubwa baeluda?

◻ Ni mu nshila nshi baeluda bengatukuta ukucefyako impendwa ya milandu ya bupingushi?

◻ Ni mu mano nshi abapingushi balekabila ukuba te balungami fye lelo na kabili abasuma?

◻ Ni shani fintu kacita wa fibi alingile ukusungwa mu kati ka kumfwa umulandu, kabili mu kuba ne mifwaile nshi?

◻ Mulandu nshi ukutamfya kwabela e ca kwalukilako ca kulekelesha?

[Icikope pe bula 16]

Uko ubucemi bwalinga bwacitwa, imilandu ya mu bupingushi iingi kuti pambi yasengaukwa

[Icikope pe bula 18]

Nelyo fye ni mu kati ka kumfwa umulandu kwa mu bupingushi, baeluda balingile ukwesha ukuteulula kacita wa fibi mu mupashi wa kutekanya