Ukucetekela Kuti Kwabweshiwa!
NANGU line pali ino nshita ubwafya bwa kucetekelo uli onse buli cishibilo ca “nshiku sha kulekelesha,” ukukanacetekelo uli onse kwalimoneke na kabili amakana ya myaka ayengi ayapitapo. (2 Timote 3:1) Kwatendekele mu paradise—mu cifulo umo tushingenekela ica musango yo ukucitika. Baibolo ilondolola ilya ncende ukuti: “Lesa alimine ibala mu Edene, ku kabanga; no mo e mo abikile umuntu uo abumbile. Yehova Lesa ameseshe mu mushili no muti onse uo bengatemwo kumona kabili uwawama ku kulya; na mu kati ke bala, umuti wa mweo, kabili umuti wa kulengo kwishibo busuma no bubi.”—Ukutendeka 2:8, 9.
Ifikomo ifikonkapo fitweba pa lwa fintu ici cikumine ku mulandu cibelele icayafya ukucetekelo muntu muno nshiku. Tubelengo kuti: “Yehova Lesa aebele umuntu, ati, Umuti onse wa mwi bala, ukulya ulelyako: lelo umuti wa kulengo kwishibo busuma no bubi te kuti ulyeko; pantu mu bushiku walyako ukufwa ukafwa.” (Ukutendeka 2:16, 17) Bushe kwaliko umulandu uuli onse uo Adamu aali no kutwishikila cintu Yehova asosele?
Tutwalililo kubelengo kuti: “Nomba insoka yabe ncenjeshi iyacilamo mu fya mweo fyonse ifya mpanga ifyo Yehova Lesa acitile. Na yo aiti ku mwanakashi, Kabili Lesa asosele, ati, Mwilalyako ku muti onse wa mwi bala, mwa? No mwanakashi ati ku nsoka, Ifisabo fya miti ya mwi bala kuti twalyako: lelo ifisabo fya muti uuli mu kati ke bala, Lesa atile, Mwilalyako, kabili mwilakumyako, epali mwafwa. Ne nsoka aiti ku mwanakashi, Ukufwa tamwakafwe; pantu Lesa aliishibo kuti mu bushiku mukalyako, e mukashibulwa amenso yenu, kabili mukaba nge milungu, abaishibo busuma no bubi. Awe umwanakashi, pa kumona uyo muti ukuti uusuma ku kulya kabili wawama ku kumona, kabili muti wa kutemwikwa ku kulengo kushilimuka, abuulako ifisabo fya uko, alalya; kabili apako na ku mulume wakwe, na o alya.”—Ukutendeka 3:1-6.
Pa kusuula ukusoka kwa kwa Lesa ukwaumfwika, Adamu na Efa balangishe ukukanacetekela Yehova. Bapashenye Satana, icibambe ca kwa Lesa icalandile kuli Efa ukupitila mu nsoka ya cine cine. Satana tacetekele inshila ya kwa Yehova iya kutekelamo. Pali uyu mulandu e lyo no mutima wa cilumba no kuituntumba, alipondokele Lesa kabili alufishe abantunse ukuti na bo bapondoke. Alibasongele ukulatontonkanyo kuti Lesa te kuti acetekelwe.
Icafuminemo Cinshi? Ukwampana Kwaonaika
Pambi mwalimono kuti abantu abashicetekela bambi balacisango kukosa ukusungilila bucibusa. Kalemba wa ciLatini uwa mu mwanda wa myaka uwa kubalilapo B.C.E., Publilius Syrus, alembele ati: “Icikakilila fye bucibusa capamo kucetekelo muntu umbi.” Ku kupondoka kwabo, Adamu na Efa balangilile ukuti tabacetekele Lesa. Muli fyo, Lesa cine cine taali na kubacetekela. Pa mulandu wa kuti ukucetekela kwalibongolweke, bucibusa bwa bantunse ba kubalilapo na Lesa bwalipwile. Takwabako icili conse icilangililo kuti Yehova alitalile alanda kuli bene na kabili pa numa ya kubasenuka pa kupondoka kwabo.
Ukwampana kwa kwa Adamu na Efa na ko kwine kwalyonaike. Yehova asokele Efa ati: “Mu kulunguluka e mo ukalafyalila abana; kabili kuli balo e kukalalolo kufuluka kobe, na o akulakuteka.” (Ukutendeka 3:16) Baibolo wa The Jerusalem Bible atila: “Akulaumyo lupaka pali iwe.” Mu cifulo ca kubomfya bumutwe pa mukashi wakwe mu nshila ya kutemwa, nga fintu Lesa afwaile, Adamu nomba asangwike cibinda, uwa kuumyo lupaka pali wene.
Ilyo babembwike, Adamu aeseshe ukufutukisha umukashi wakwe umulandu. Atontonkenye ukuti ifyo umukashi wakwe acitile e fyalengele ukuti batamfiwe mwi bala lyapwililika ukuya mu mushili ushalimwa, no kuba abashama mu mibele ishapwililika ukulalolela ukubwelela ku lukungu. (Ukutendeka 3:17-19) Kuti twaelenganya fintu ico calelenga ukukangana pali aba babili. Adamu pambi alicishishemo mu fyo ayankwileko, ukulando kuti tali na kumfwa kuli Efa na kabili. Nakalimo ayumfwile uwalungamikwa ukumweba icapala ku kuti, ‘Ukufuma lelo, ni ne citwe mwine mambo!’ Lubali lumbi, Efa pambi alimwene ifyo Adamu afililwe ukubomba ngo mutwe wa lupwa, icalengele ukukanamucetekela. Te mulandu ne fyo cali, pa kukanacetekela Lesa, bucibusa abantunse bakwete na wene bwalipwile kabili caonawile ukwampana pa kati kabo.
Nani Twingacetekela?
Nga fintu ica kumwenako ca kwa Adamu na Efa cilelangilila, te onse twingacetekela. Kuti twaishiba shani untu twingacetekela?
Ilumbo 146:3 litwebo kuti: “Mwitetekela bakankaala, nangu mwana wa muntu uo takuli ukupususha muli wene.” E lyo pali Yeremia 17:5-7, tubelengapo kuti: “Alitiipwo muntu uutetekela abantunse, uwacito wa mubili e kuboko kwakwe, na kuli Yehova umutima wakwe wafumako.” Lubali lumbi, “alipaalwo muntu uutetekela Yehova, uo Yehova abe ca kutetekelako cakwe.”
Kwena, ukucetekela abantunse te lyonse kwabo kwalubana. Ayo malembo yaleshinina fye ukuti ukutetekela muli Lesa takwingabo kwalubana, lelo ukucetekela abantunse bashapwililika limo limo kuti kwatutwala ku kayofi. Ku ca kumwenako, abantu abacetekela abantu ukucita cintu Lesa fye eka engacita—pamo nga ukupayanye pusukilo no kuleto mutende wakumanina no mutelelwe—uko baleya ni ku kulengwe nsoni.—Ilumbo 46:9; 1 Abena Tesalonika 5:3.
Na kuba, abantunse na mateyanyo ya buntunse fyalinga fye ukuficetekela nga filebomba mu kumfwana ne mifwaile ya kwa Lesa no kulangisha ifishinte fya bukapepa. Kanshi, nga tuli no kulenga bambi ukutucetekela, tufwile ukusose cine, ukuba abafumacumi kabili abengashintililwapo. (Amapinda 12:19; Abena Efese 4:25; AbaHebere 13:18) Ni lintu fye twaisunga mu kumfwana ne fishinte fya Baibolo e lintu ukucetekela kuntu bambi batucetekela kwingabo kwine kwine e lyo pengaba no kukoshanya no kukoseleshanya.
Ukubwesha Ukucetekela
Inte sha kwa Yehova balikwata apo bashintilila apakosa pa mulandu wa kutetekela Lesa no kukoseleshako bambi ukucita cimo cine. Yehova taaluka kabili wa bucishinka, umo uwingashintililwapo lyonse ukucita cintu asosa, pantu ‘Lesa tengabepa.’ Ukucetekela Lesa wa kutemwa takwingatwala ku kulengwe nsoni.—AbaHebere 6:18; Ilumbo 94:14; Esaya 46:9-11; 1 Yohane 4:8.
Abantu abaikatana mu kucetekela Yehova kabili abekalila ku fishinte fyakwe balakuntwa nga nshi ku kulangisho kucetekelana. Mu calo umuli ubwafya bwa kucetekelo muntu, mwandi ca buseko ukusanga abantu abengacetekelwa! Elenganyeni fintu icalo cingabe capusanako nga kwali ukucetekela umupwilapo mu cili conse ico uuli onse engasosa nelyo ukucita! Mu calo cipya icileisa cintu Lesa alaya, e fyo cikaba. Tacakabe na kabili icayafya ukucetekelo muntu!
Bushe kuti mwatemwo kubako iyo nshita? Nga kuti mwatemwa, Inte sha kwa Yehova balemwita ukuti mwingakosha ukucetekela Lesa na malayo yakwe ukupitila mu kusambilililapo na fimbi pa fyo afwaya muleikala. Ukusambilila Baibolo kushinino kuti Lesa e ko aba, ukuti alisekelela mu cingawamino muntu, no kuti mu kwangufyanya akacitapo cimo ku kulungike fyalubana mu calo ukupitila mu Bufumu bwakwe. Amamilioni ya bantu balisambilila ukutetekela Lesa ne Cebo cakwe, Baibolo. Inte sha kwa Yehova bakaba aba nsansa ukumulangilila ifyo babombela icintubwingi ukupitila muli kosi wa kusambilila Baibolo apa fye. Nelyo lembeleni kuli bakasabankanya ba uno magazini nga mulefwayo kumfwilapo na fimbi.
[Amashiwi pe bula 5]
Ukukanacetekela Lesa kukalenga ukuti icibusa na bantu banensu cikapasangane
[Amashiwi pe bula 6]
Abantunse balinga fye ukubacetekela nga balebomba mu kumfwana ne fishinte fya bukapepa