Uucelela

PA KATI ka fimuti fya fitwalo ifya ncende ya Mediterranean, icimuti ca mualmonde cili cimo ica fyacilishapo kucebusha. Ku kupwa kwa January nelyo February—pa ntanshi ya bwingi bwa miti imbi—cilashibuka ukufuma ku kunakuka kwa ciko ukwa pa mwela. Kabili mwandi kushibuka! Umuti onse ulafwikwa umwingila wanakanaka uwakashikila nelyo ukubalula amaluba yabuuta, iyalekeleshako ukupala kwati mushishi wabuuta uwa bakalamba.—Linganyako Lukala Milandu 12:5.

AbaHebere ba pa kale baitile umuti wa mualmonde “kashibuka,” ukulosha ku kubalula kwa uko kwa mu kubangilila. Iyi mibele yabomfiwe na Yehova ku kulangilila ubukombe bwacindama. Pa kutendeka kwa butumikishi bwakwe, Yeremia alilangilwe mu cimonwa ukupuuka kwa mualmonde. Cinshi cintu capilibwile? Yehova alondolwele ukuti: “Ndelinde cebo candi ku kucicita.”—Yeremia 1:12.

Pamo fye nga fintu umuti wa mualmonde ‘ushibuka’ mu kubangilila, e fyo na Yehova mu mampalanya ‘alecelela’ ku kutuma bakasesema bakwe ku kusoka abantu bakwe pa lwa fya kufumamo fya kubulwe cumfwila. (Yeremia 7:25) Kabili taali na kutuusha—aali no ‘kubo walola’—ukufikila lintu icebo cakwe ica busesemo capwishishiwe. Kabili e fyo cali ukuti mu 607 B.C.E., pa nshita yasontwa, ubupingushi bwa kwa Yehova bwaishile pa luko lwa busangu ulwa kwa Yuda.

Icebo ca kwa Lesa cisobela ukuti ubupingushi bwapalako bukesa pa micitile ibifi iyo twikalamo. (Ilumbo 37:9, 10; 2 Petro 3:10-13) Ukulosha ku ncitilo ya musango yo iya bupingushi, kasesema Habakuki atwebekesha ukuti: “Pantu icimonwa cicili cilelola ku nshita iyalingilwe . . . ucilolele, pantu ukwisa cikesa, tacakashimbe iyo.” (Habakuki 2:3) Ukubalula kwayemba ukwa mualmonde kuletucinkulako kuti Yehova akatwalilila ukulola ukukuma ku cebo cakwe pa kuti engacifikilisha.

[Abatusuminishe Ukubomfya Icikope pe bula 32]

Pictorial Archive (Near Eastern History) Est.