Ukusenda Ikoli mu Bwaice

MULI shino “nshita ishayafya,” abacaice balalolenkana no kutitikisha kwafina. (2 Timote 3:1) Cila bushiku bakumanya ukukubanya ukukoselesha bucisenene, ukupeepa, ne misango imbi iya myendele ya konaula. Abakonka ifipimo fya Baibolo kuti bapumiwa pa kukaana ukukonka icinabwingi, kabili Abena Kristu bamo kuti bayumfwe fyo kuti caba bwino ukunakilako.

Mupepi na ku kupwa kwa mwanda wa myaka uwalenga 7 B.C.E., Yeremia alembele ukuti: “Cisuma ku muntu ukuti asende ikoli mu nshita ya bulumendo bwakwe.” (Inyimbo sha Bulanda 3:27) Aloseshe mwi? Mu kuti ukusambilila ifya kubomba ne fya kwesha mu bwaice kulaafwa umuntu ukuipekanya ukulolenkana na mafya ya mu bukalamba. Utuyofi, nangu cingati tatwawama, te kuti tusengaukwe ku Bena Kristu bonse abacaice na bakalamba. (2 Timote 3:12) Lelo ubunonshi bwa busumino bwalicila nga nshi pa kwilulukwa kwa pa kashita akepi uko ukusuusuka pambi kwingaletako.

Nga ca kuti uli musepela, lolenkana fye na mesho ya citetekelo ukwabula ukushimba. Lintu watunkwa ukuwila mu myendele yalubana, kaana ukunakilako. Nangu cingati pali ino nshita ici kuti pambi caba icayafya ukucita, mu kuya kwa nshita, tawakeselanguluka. Yesu alaile ukuti: “Sendeni ikoli lyandi . . . , e lyo mwalasango kutusha ku mitima yenu; pantu ikoli lyandi lyalyanguka, ne cisendo candi calipepuka.”—Mateo 11:29, 30.

Pokelela ukusonsomba kwisako pa mulandu wa kwikalilila ku fishinte fya Baibolo. Ukucite fyo kuli no kukulanga inshila yawamisha mu bumi pali nomba ne subilo lyashininkishiwa ku ntanshi. Nga fintu Baibolo ilondolola, “pano isonde paleya, no lunkumbwa lwa pako, lelo uucito kufwaya kwa kwa Lesa ekalilila umuyayaya.”—1 Yohane 2:17.