Palameni Kuli Lesa
“Uwa Nshiku ne Nshiku Aikala”
BAIBOLO itila: “Takwaba umuntu nangu umo uwatala amona Lesa.” (Yohane 1:18) Lesa wa bukata nga nshi ica kuti takuli umuntu nangu umo uwingamumona no kuba no mweo. (Ukufuma 33:20) Lelo nangu cibe fyo kwaliba amalyashi ayalandwapo mu Baibolo umo Yehova alangishe abaume bamo ifimonwa fya ku muulu. Umo uwamweneko ifi fimonwa ni kasesema Daniele. Ifyo amwene fyamulengele ukumfwa umwenso, nangu fye ni fwe kuti fyatuletela umwenso. Natumfwe ifyo Daniele alondolwele ifyo amwene mu cimonwa.a—Belengeni Daniele 7:9, 10.
“Uwa Nshiku ne Nshiku aikala.” Daniele eka fye e wabomfya aya mashiwi ayalosha ku “waikala imyaka iingi sana nelyo ku mukote.” (Daniele 7:9, 13, 22) Bushe Yehova aikala imyaka inga? Apo ni “Mfumu ya muyayaya,” takwata intendekelo kabili takwata ne mpela. (1 Timote 1:17; Yuda 25) Lesa abako fye umuyayaya, ne ci cilenga twacetekela ukuti amano yakwe tayapelela, pantu Baibolo ilanga ukuti abakote balikwata amano. (Yobo 12:12) Apo amano yesu yalipelela, kanshi calyafya ukumfwikisha ukuti Lesa abako fye umuyayaya. Lelo bushe kuti twaenekela ukumfwikisha amano ya kwa Lesa ayashingalinganishiwako ku-uli onse?—Abena Roma 11:33, 34.
Mulandu nshi ilembo lilandile ukuti Uwa Nshiku ne Nshiku “aikala?” Amashiwi pamo nga “Icilye” no ‘kupingula’ ifili mu fikomo fimbi muli ici cipandwa filetwafwa ukwishiba umulandu Uwa Nshiku ne Nshiku aikalile. (Daniele 7:10, 22, 26) Ico Yehova aikalile pa nshi, kupingula. Ni bani ali no kupingula? Mabufumu ya pano isonde, ayaleimininwako ne finama ifyo Daniele amwene mu cimonwa.b (Daniele 7:1-8) Bushe Yehova ni Kapingula wa musango nshi?
“Ica kufwala cakwe cali icabuuta tutu, no mushishi wa ku mutwe wakwe nga masako ya mpaanga ayabuuta tuutu.” Ukubuuta cishibilo ca bulungami no kusanguluka. Amasako ya mpaanga shimo yaba ayabuuta. Kanshi umushishi uwaba nga masako, ninshi kuti waba uwabuuta. Elenganyeni ifyo Daniele amwene. Bushe mu muntontonkanya wenu, mulemona Kapingula uukwete umushishi wabuuta kabili uufwele ne laya ilyabuuta tuutu? Amashiwi babomfya pa kulondolola Yehova yalango ukuti wa mano kabili ifyo apingula fyalilungama. Ni Kapingula uo twingacetekela no kucindika.
“Kwali na makana ikana (1,000,000) abalemubombela, na makana ikumi ukufushiwa ku makana ikumi (100,000,000) nabeminina pa ntanshi yakwe.” Aba ababomfi bakwe aba ku muulu, ni bani? Baibolo iita bamalaika ukuti ‘babomfi ba kwa Lesa.’ (Amalumbo 104:4) Bamalaika ba kwa Lesa ababa imintapendwa, balabombesha ‘ukucita ifyo asosa’ no ‘kucita ukufwaya kwakwe.’ (Amalumbo 103:20, 21) Ici cilelanga fye ukuti amano ya kwa Yehova tayapelela. Ni Yehova fye e wingateyanya imintapendwa ya bamalaika bafule fi no kubapeela imilimo ya kubomba pa myaka iingi nga nshi!
Icimonwa Daniele amwene cilenga twacetekela sana Yehova, Uwa Nshiku ne Nshiku. Ifyo apingula fyalilungama kabili amano yakwe yalicetekelwa. Kanshi kuti cawama ukusambililapo na fimbi pa fyo mwingapalama kuli Lesa uwakwatisha amano.
Amalembo ya kubelenga mu October:
[Amafutunoti]
a Daniele tamwene Lesa. Lelo ifimonwa amulangile fyalengele amone kwati alimwene Lesa. Ilyo Daniele alelondolola ifyo amwene, abomfeshe amashiwi ya mampalanya e lyo na mashiwi ayalondolola Lesa kwati muntu. Ifi Lesa bamulondolola filalenga twaishiba ifyo Lesa aba, te fyo amoneka iyo.
b Nga mulefwaya ukwishibilapo na fimbi pa cimonwa Daniele amwene ica finama, belengeni icipandwa 9 mu citabo ca Angweniko ku Kusesema kwa kwa Daniele! Abalemba ici citabo ni Nte sha kwa Yehova.
[Amashiwi pe bula 18]
Ni kapingula uo twingacetekela no kucindika