16. (a) Finshi Sekaria amwene ifyacitike kwi tepe? (Moneni icikope 3 pa ntendekelo ya cino cipande.) (b) Ni kwi abanakashi abali na mapindo batwele itepe?

¹⁶ Na kabili Sekaria amwene abanakashi babili abakwete amapindo ayakosa nga ya kwa kabaso. (Belengeni Sekaria 5:9-11.) Ala aba banakashi babili balipusene sana na umwanakashi uwali mwi tepe! Aba banakashi babomfeshe amapindo yabo ayakosa no kufuuba itepe umwali “ifyabipa.” Bushe aba abanakashi baletwala kwisa ifyabipa? Balefitwala mu “calo ca Shinari,” nelyo mu Babiloni. Nomba mulandu nshi batwalile itepe ku Babiloni?

17, 18. (a) Mulandu nshi icalo ca Shinari cabelele ‘icifulo calinga’ uko “ifyabipa” fyalingile ukuba? (b) Finshi tulingile ukulafwaisha ukucita pa bubifi?

¹⁷ Abena Israele abaliko mu nshiku sha kwa Sekaria balishibe ukuti ku Shinari eko ifyabipa fyalingile ukuba. Sekaria na baYuda banankwe balishibe ukuti mu Babiloni mwalecitika ifyabipa pali ilya nshita. Apo bakuliile muli uyu umusumba umwalecitika ifyabipa, cila bushiku balingile ukulalwisha na maka pa kuti belacitako ifyabipa ifyo abengi balecita. Ukwabula no kutwishika ici icimonwa calilengele baumfwa bwino kabili bashininkisha ukuti Yehova ali no kucingilila ukupepa kwa cine pa kuti kwikowela!

¹⁸ Na lyo line ici icimonwa caibukisheko abaYuda ukuti balingile ukulasunga ukupepa kwa cine ukwasanguluka. Yehova te kuti asuminishe kabili takasuminishe ifyabipa ukuba mu cilonganino cakwe. Apo Lesa alituleta mu cilonganino cakwe icasanguluka umo atucingilila no kutusakamana, tufwile ukulacisunga icasanguluka. Bushe ifi tafilengele tulefwaisha ukulasunga icilonganino icasanguluka? Ububifi ubwa misango yonse tabulingile ukusangwa muli paradaise yesu iya ku mupashi.