Baacitile Ukufwaya kwa kwa Yehova

Yesu Ayawilwa Pamo nga Mesia Kabili Imfumu!

IBUMBA lya congo ilyaleingila mu Yerusalemu pa Nisani 9, 33 C.E., lyalisungwishe abena Yudea abengi. Nangu cingati cali icaseeka ukumona abantu balekonkomokela mu musumba lilya ciletwala ku Ca kucilila, aba balendo bena balipuseneko. Uwaletele uluntu pa kati kabo aali mwaume uwaninine pa musepela wa mpunda. Uyu mwaume aali ni Yesu Kristu, kabili abantu baleyansa amalaya ne misambo ya tuncindu ukumutangilila kabili balebilisha abati: “Hosana kuli Mwana Davidi! Apaalwe uuleishila mwi shina lya kwa Shikulu! Hosana mu myulu iyapulamo!” Bashimona ibumba, abengi abaali nabafika kale mu Yerusalemu balikuntilwe ukuilunda ku mulongo.—Mateo 21:7-9; Yohane 12:12, 13.

Nangu cingati pali ino nshita balemwawila, Yesu alishibe ukuti ifya kwesha fyalemupembelela. Na kuba, mu nshiku fye shisano ali no kwipaiwa muli uyu musumba umo wine! Ee, Yesu alishibe ukuti Yerusalemu aali cifulo ca kubombelamo ica bulwani, kabili apekenye ukwingila mu musumba mu nshila yamonekesha uku ninshi aleibukisha nga nshi ulwa ubo bulwani.

Ubusesemo bwa pa Kale Bwafikilishiwa

Mu 518 B.C.E., Sekaria alisobele ukwingila kwa kwa Yesu ukwa kucimfya mu Yerusalemu. Alembele ukuti: “Welesha, we mwana mwanakashi Yerusalemu. Mona, imfumu yobe ileisa kuli iwe, iyalungama kabili iya kucimfya, iyafuuka kabili iyatentema pa mpunda, pa musepela umwana wa mpunda nkota. . . . Asoso mutende na ku nko, ukuteka kwakwe kwatula kuli bemba no kufika kuli bemba, kwatula na ku Yufrate no kufika ku mpela sha pano isonde.”—Sekaria 9:9, 10.

E co ukwingila kwa kwa Yesu mu Yerusalemu pa Nisani 9 kwafikilishe ubusesemo bwa Baibolo. Tacali fye nkuma lelo calipekanishiwe bwino. Mu kubangililako, ilintu aali fye ku nse ya Yerusalemu, Yesu atumine abasambi bakwe babili ukuti: “Kabiyeni ku mushi uulungatene na imwe, ilyo line mulesanga ne mpunda naikulikwa, no musepela pamo na yo; pa kushikakula, mulete kuli ine. Kabili ngo muntu asose cintu cimo kuli imwe, mumwebe, amuti, Shikulu aleshikabila; na po pene aleshituma.” (Mateo 21:1-3) Lelo mulandu nshi Yesu aalefwaila ukwingila mu Yerusalemu ninshi natentema pa mpunda, kabili cinshi cali e bupilibulo bwa kwankulako kwe bumba?

Ubukombe Ukukuma Kuli Bumfumu

Ifya kumona na menso ilingi line filebekesha ukucila amashiwi ya kulanda fye. E co, pa nshita shimo shimo Yehova alelenga bakasesema bakwe ukulangilila ubukombe bwabo ku kukosha ubukombe bwa mu busesemo. (1 Ishamfumu 11:29-32; Yeremia 27:1-6; Esekiele 4:1-17) Iyi nshila ya kulanshanishishamo iya kubomfya ifilemoneka na menso yaleshala mu muntontonkanya nangu fye wa muntu wakosa umutima. Mu kupalako, Yesu alangilile ubukombe bwa maka ukupitila mu kutentema pa mpunda ukwingila mu musumba wa Yerusalemu. Mu nshila nshi?

Pa nshita ya fya kucitika fya mu Baibolo impunda shalebomfiwa ku mifwaile ya mucinshi. Ku ca kumwenako, Solomone pa kuya ku kusubwa nge mfumu atenteme pa “mfwalashi,” inama ifyalwa nga punda umulume atamfya kabalwe. (1 Ishamfumu 1:33-40) E co filya Yesu atenteme pa mpunda ukwingila mu Yerusalemu cilepilibula ukuti aleilangisha umwine ukuti ni mfumu.a Icacitile ibumba cakoseshe ubu bukombe. Ibumba, ilyo ukwabula ukutwishika lyafulilemo abena Galili, lyaanshile amalaya yabo ukutangilila Yesu—incitilo iiletwibukisha ukubilisha kwa pa cintubwingi ukwaliko lintu Yehu abele imfumu. (2 Ishamfumu 9:13) Ukwita Yesu ukuti “Mwana Davidi” kuleebekesha insambu shakwe isha mwi funde isha kuteka. (Luka 1:31-33) Kabili filya babomfeshe imisambo ya tuncindu mu kumonekesha calangilile ukuti balenakila ku maka yakwe aya bufumu.—Linganyeniko Ukusokolola 7:9, 10.

E co umulongo waingile mu Yerusalemu pa Nisani 9 calengele ukuti ubukombe bumfwike bwino bwino ifyo Yesu aali ni Mesia wasontwa uwa kwa Lesa kabili Imfumu. Kwena, te bonse baali aba nsansa ukumona Yesu ukuleetwa muli iyi nshila. Ukucilisha abaFarise bacimwene ukuba icishalinga nangu panono ukuti Yesu apeelwe ulya mucinshi wa cifumu. “Mwe Kasambilisha,” e fyo balombele, ukwabulo kutwishika amashiwi yabo yaleumfwika fye bukali bukali, “kalipileni abasambi benu.” Yesu alibaswike ati: “Aba nga batalala, amabwe yalebilikisha.” (Luka 19:39, 40) Ee, Ubufumu bwa kwa Lesa wali e mutwe uo Yesu aleshimikilapo. Aali no kubilisha ubu bukombe mu kushipa nampo nga abantu bapokelela bwene nelyo iyo.

Ifyo Tulesambililako

Cafwaile ubukose ubukalamba pa kuti Yesu engile mu Yerusalemu mu nshila iyo kasesema Sekaria asobele. Alishibe ukuti pa kucite fyo alebalamuna icipyu ca balwani bakwe. Ilyo ashilanina ukuya ku muulu, Yesu atumine abakonshi bakwe ukushimikila imbila nsuma iya Bufumu bwa kwa Lesa no ‘kulenga aba nko shonse ukuba abasambi.’ (Mateo 24:14; 28:19, 20) Pa kupwilikisha ukubomba uyu mulimo na po palakabila ubukose. Te bonse abatemwa ukumfwa ku bukombe. Bamo tabangwako, ilintu bambi balakaanya. Amabuteko yamo yalibikako umwa kupelela ku umulimo wa kushimikila nelyo ukuubinda umupwilapo.

Nalyo line, Inte sha kwa Yehova balishiba ukuti imbila nsuma ya Bufumu bwa kwa Lesa ubwaimikwa ifwile ukushimikilwa, nampo nga abantu bakutika nelyo bakaana ukukutika. (Esekiele 2:7) Ilyo baletwalilila ukubomba uyu mulimo wa kupususha ubumi, balasansamushiwa ku bulayo bwa kwa Yesu ubwa kuti: “Moneni, ine nakulaba na imwe ukufika na pa kupwa kwa nshita.”—Mateo 28:20.

[Futunoti]