“Bweleleni Kuli Ine, na Ine Ndebwelela kuli Imwe”

ULUPWA lwaleipakisha ukutandala mu mutengo. Lyene, Peter, umwaice pali bonse, alipumbwike, ukutentemuka iculu aletamfya akapale. Mu kupumikisha, umulu waiswilemo amakumbi, kabili imfula yatendeke ukuloka. Pa kubalilapo yali ni cipungufula, lelo panono panono yatendeke ukufubauka. Ulupwa mu kwangufyanya lwalilongenye ifipe fyabo no kubutukila kuli motoka yabo. Kabili uuli onse alepapa kuntu Peter ali.

Peter, pali iyo nshita, aleesha ukubwelela ukwali ulupwa. Cali icaansha ukumona ku ntanshi, kabili inshila ukuninika iculu yali iyatelela mu mfula. Mu kukanaenekela, umushili walilekele ukumoneka pe samba lya makasa yakwe ilyo aponene mu cilindi cashika, icafisama. Alyeseshe ukufumamo, lelo mu mbali mwali umwatelela nga nshi.

Amenshi ya mfula yalekunkuluka pa culu kabili yaleisusha icilindi na matipa. Peter aali mu busanso bwa kunwena. Lelo lyene wishi alimusangile kabili alimukulile no mwando ukufumamo. Pa numa, Peter alishimawilwe nga nshi pa mulandu wa kulubanta. Lelo, uwapombwa mu mabulangeti mu maboko ya kwa nyina, ukushimaulwa kwali ukwayanguka ukupokelela.

Ici ca kukumanya cilelangilila bwino ku cicitika kuli bamo abaali pa kati ka bantu ba kwa Lesa. Baliwila mu cilindi cashika ica ino micitile ya fintu kabili mu kupelelwa baleesha ukwamfula ukufumamo no kubwela ku mutende wa kuteyanya kwa kwa Yehova. Fintu cili ica kutemuna ukwishiba ukuti Yehova aliba uwa nkumbu kabili uwaipekanya ‘ukwisha umwando’ no kubaafwa ukubwelela ku kucingililwa!

Imibombele ya kwa Yehova iya Nkumbu

Ku numa mu nshiku sha kwa Israele, pa kupwishishiwa kwa kukuula kwe tempele, Solomone apepele ipepo lya kupeela umo alombele Yehova ukukutika ku kupaapata kwalungatikwe ukulola kwi tempele. Lyene asosele ukuti: “Nga babembuka [abena Israele] kuli imwe (pantu tapali muntu uushibembuka), na imwe mwabakalipila, mwabapeela na ku balwani, . . . kabili bapindulule mitima mu calo ico batwalwamo muli bunkole, babwela no kupaapaata kuli imwe mu calo umo batwalwamo muli bunkole, . . . lyene muumfwe mu mulu mu bwikalo bwenu ukupepa kwabo no kupaapaata kwabo.”—1 Ishamfumu 8:46-49.

Ukwipusha kwa kwa Solomone kwalifikilishiwe pa tushita utwingi mu kati ke lyashi lya kale ilya kwa Israele. Libili libili, abantu ba kwa Lesa balefutatuka no kusha wene. Lyene bailwike ifilubo fyabo no kubweluluka, ukumufwaya. Kabili Yehova alebalekelela. (Amalango 4:31; Esaya 44:21, 22; 2 Abena Korinti 1:3; Yakobo 5:11) Ukupitila muli Malaki, Yehova asupawilile imyaka ikana iya kubomba na bantu Bakwe lintu Asosele ukuti: “Ukutula ku nshiku sha bashinwe mwaaluka ku fipope fyandi, no kufibaka iyo. Bweleleni kuli ine, na ine ndebwelela kuli imwe.”—Malaki 3:7.

Ifilenga Ukupunwishiwa

Ukupala abena Israele, ubwingi bwa bantu ba kwa Lesa ilelo balafutatuka no kuipaatulako abene ukufuma ku kuteyanya kwa kwa Yehova. Mulandu nshi? Bamo basupila ifintu ifimoneka ukuba ifya kaele pa kubalilapo, ukupala Peter aletamfya akapale. Ici e cacitike kuli Ada. Acita lipoti ukuti: “Cali mwata kuli ifwe fwe balebombela pamo ukuya ku kulya ica kulya ca kasuba capamo mu cikuulwa ca kuliilamo mu nshita ya kasuba. E co lintu bandaalike ku kunwako kofi pa numa ya kwinuka, tacali icakosa ukusumina. Napelulwile ukuti nshilebomfya inshita iyo ilingile ukubomfiwa ku kulongana nelyo ukushimikila. Nshamwensekeshe ukuti ici kuti pambi caba kufilwa ukubaka icishinte ca pali 1 Abena Korinti 15:33.

“Mu kwangufyanya, naleya mu kwangala pali bakabalwe na bene pa Fibelushi. Lyene naleya ku kutamba ifikope fisela ne fyangalo na bene. Ico catungulwile ku kupusa ukulongana kumo. Mu kupelako, nshaleya ku kulongana ukuli konse atemwa ukwakana mu mulimo wa kushimikila. Lintu nailwike icalecitika, nshalebishanya na kabili no kuteyanya.”

Mu milandu imbi umulandu kuti pambi waba lubembu lwabipisha ulwafiswa ululenga umuntu ukuyumfwa uushalinga ukubombela Lesa. (Ilumbo 32:3-5) Nelyo umuntu kuti pambi aipununa pa cintu cimo icasoselwe nelyo ukucitwa ku Bena Kristu banankwe, ukukanaumfwikisha, nga fintu Solomone asosele ukuti, “tapali muntu uushibembuka.”—1 Ishamfumu 8:46; Yakobo 3:2.

Nalyo line bamo balafuupulwa lintu bapokelela ukusalapula. (AbaHebere 12:7, 11) Ukucebusha kwa misango ya bumi iya kutemwe fimoneka kwalitungulula abengi ukuleka ukubombela Lesa. Ilingi line, mu kufwaya ukutunguluka kwa ku calo, baliyobeka mu kukumanina mu ncito sha ku calo ica kuti takwabako incende mu bumi bwabo ku mulimo wa kwa Yehova. (Mateo 13:4-9; 1 Timote 6:9, 10) Bushe imibele ya ba musango uyo yaba iyabula isubilo?

Bushe Ukankulako ku Bwite bwa kwa Yehova?

Pa kashita kamo Yesu alandile icintu cimo icali icayafya ukumfwikisha, kabili bamo balipunwishiwe. Icalembwa cisoso kuti: “Abengi ba mu basambi bakwe bafumineko baile ku numa, tabaendele nankwe kabili.” Lelo te bonse abapunwishiwe. Ubulondoloshi bwa Baibolo butwalilila ukuti: “Yesu atile ku be kumi na babili, Bushe na imwe mulefwayo kuya? Simone Petro alimwaswike, ati, Mwe Shikulu, ni kuli ani twingaya? Imwe muli ne fyebo fya mweo wa muyayaya.” (Yohane 6:66-68) Abatumwa ba kwa Yesu mano mano bailwike ukuti kuti caba ica busanso ukusha Yesu.

Bamo abapumbuka mu kupelako besa ku nsondwelelo yapalako. Balamwensekesha ukuti ukusha ukuteyanya kwa kwa Lesa lwali lutampulo lwabamo busanso no kuti ni kuli Yehova fye na Kristu e ko bakasanga ifisemo ifitungulula ku bumi. Lintu bailuka ici, balingile na kabili ukwiluka ukuti tacilaba kucelwa ukulanguluka cipya cipya, ukwipusha Yehova ku kulekelelwa, no kubwelela kuli wene. Cali ni Yehova umwine e watambulwile ubwite ukuti: “Bweleleni kuli ine, na ine ndebwelela kuli imwe.”—Malaki 3:7.

Mu cine cine, ni kwi kuntu Umwina Kristu wafumaluka engasanga insansa nga te mu kubombela Yehova? Nga ca kuti umuntu asensenuka pa numa ya kuba ulubali lwa kuteyanya kwa kwa Lesa pa nshita imo, cinshi cimulolela mu calo caba ku nse? Mu kwangufyanya akamwensekesha ukuti nomba ali ulubali lwa calo ico cilecililamo ukuba ica lukaakala. Akaisanga umwine naibimba mu micitile ya calo iyaisulamo ubumbimunda, ukubepa, ukufinsha, na bucisenene, icalo icabamo ubusanso kabili icishawama nga fintu icilindi ca lutikiti catiinishe ubumi bwa kwa Peter wacaice. Lintu akutuluka kabili amwensekesha ukuti ubumi bwakwe ubwa muyayaya buli mu busanso, talingile ukushingashinga mu kufwaya ukwaafwa ukuifumya mu mibele. Nalyo line, ukubwela pambi te kuti kube ukwayanguka.

Bushe uli umo uwa abo abaesha ukubwela kuli Yehova lelo wasanga ukuti calyansha? Ninshi ishiba ukuti ulekabila ukwaafwa. Kabili ishiba ukuti bamunonko ne nkashi mu kuteyanya kwa kwa Lesa bali abaitemenwa ukukupeela ukwaafwa. Lelo ulingile ukubombesha ku kulanga Yehova ukufwaisha kobe. Ili ni nshita ya ‘kupinduluka’ no ‘kubwelela kuli Yehova.’—1 Ishamfumu 8:47.

Ukwaafwiwa Ukubwela

Ada alondolwele icamwafwile ukubwelela kuli Yehova ukuti: “Pa nshita fye yalinga, nkashi uwaletungulula isambililo kuli ine andaalike ku kusangwa ku kulongana kwa muputule nankwe. Aali umusuma nga nshi! Kabili tanshimawile nakalya! Alangishe ukutemwa ukukalamba. Umwaka wali naupitapo ukutula apantu nasangilwe ku kulongana, lelo nali ndeetetula pa kubulwamo akantu ukwa calo na pa cishinka ca kuti, ku numa ya kucebusha kwa cimbepa, kwali fye ubulanda, ukukalifiwa, na bucisenene. E co napingwilepo ukusangwa ku kulongana. Lintu nafikile fye mu ciyanda ca fyangalo umo kwabelele, naile ku mutande wa ku numa uwa fipuna no kusokama mu cifutu cafiita. Nshalefwaya bamunyina ukumona no kunjipusha ifipusho.

“Nangu cibe fyo, programu yapeele ukufunda uko nalekabila apakalamba. Lintu yapwile, nali uwapampamina te kubwelela fye ku bantu ba kwa Yehova lelo na kabili ukuipeelesha kuli wene no mutima wandi onse. Bamunyina balimpokelele na maboko yabili kabili ‘uwalubile’ alibwelele.” (Luka 15:11-24) Ico conse cacitike inshita ntali iyapitapo, kabili Ada nomba aba mu mulimo wa nshita yonse pa myaka ukucila pali 25.

Umulandu wa muntu na umbi uwalubente wakwete ica kufumamo ca nsansa icapalako. Baeluda bapeele José ukufunda uko kwabelebeshe apakalamba ukutontonkanya kwabo ukucila ifishinte fya Baibolo. José, alifuupwilwe kabili alikalifiwe, mu kupelako ashelemukile mu kukanabomba. Pa myaka cinekonsekonse alipaatwilwe ukufuma ku bantu ba kwa Lesa, kabili mu kati ka iyo nshita alyupile uushasumina kabili abele wishi wa bana, umo uwa abo asuminishe ukubatishiwa mwi Calici lya Katolika.

Mu kupelako, alyaafwiwe lintu kangalila wa muputule apangile icipempu ca bucemi pali wene no kukoselesha baeluda ukucita cimo cine. Alituutuubwilwe kabili ali uwa nsansa ukumona umukashi wakwe ukuba uwasekelela mu cine. José pali ino nshita alebomba nga eluda mu cilonganino. Nga fintu ifi ifya kukumanya fibili fyalanga, Yehova tatana mapaalo ukufuma kuli abo abankulako ku bwite bwakwe ubwabamo ukutemwa ubwa kubwela.

Pa kuti engaipakisha ayo mapaalo, nangu ni fyo, umo intanshi alingile ukutesekesha ukwaafwa kutambikwa no kwankula kuli kwene. Mu filonganino ifyafulilako bamunyina balebukisha abo abashibomba kabili balabatandalila mu nshita mu nshita, ukwesha ukubaafwa. Ukwankulako ku kwaafwa kwa musango yo kulangisha ukutasha ku nkumbu sha kwa Yehova.—Yakobo 5:19, 20.

Mu cishinka, ino ili e nshita ya kwankulako ku bwite bwa kwa Yehova ubwa kuti: “Bweleleni kuli ine.” (Malaki 3:7; Esaya 1:18) Wilolela ukucilapo. Ifya kuponako fya calo filesela mu kuba no kubutukisha kwa kupapusha. Icifulo cawamisha ica kubako mu kati ka nshita shalulunkana ishalalilila pa ntanshi yesu caba ni mu kati na nkati ka kuteyanya kwa kwa Yehova, abacingililwa pe samba lya kucingilila kwakwe. Ni abo beka abooba muli Yehova e bakwata isubilo lyakosa ilya kufiswa ukufuma ku cifukushi cakwe pa bushiku bukalamba ubwa bukali bwakwe.—Sefania 2:2, 3.

[Icikope pe bula 30]

Bushe ukankulako ku bwite bwa kwa Yehova ubwa kuti, “Bweleleni kuli ine”?