Cinshi Cikacitika Ku Mipepele Ya Bena Kristu?

BUSHE abantu bonse bakasanguka Abena Kristu, nelyo bushe Abena Kristu bakapwa pano calo? Bushe imipepele ya Bena Kristu yalitwalilila ukuba iyasanguluka? Kabili bushe ilasambilisha abantu ubulungami muli cino calo cabipa nelyo bushe yalikowela? Aya e mepusho fwe bantu twipusha ukutula fye na ku kale.

Yesu abomfeshe icilangililo icisuma ku kulangilila ukutila ilyo fye atendeke ubuKristu, Satana, umulwani, ali no kupumfyanya. (Mateo 13:24, 25) Kanshi te bantu fye abene abalengele imipepele ya Bena Kristu ukwaluka mu myaka iinono fye iyapitilepo ukutula apo Yesu afumiine pano calo. Uwalengele ukuti kube uku kwaluka ni Satana umulwani wa kwa Yesu. Ino nshita abantu abatila Bena Kristu bacili balacita ifilubo ifyo na ba kale balecita, kabili mu micitile yabo mulefuma ifyabipa.—2 Abena Korinti 11:14, 15; Yakobo 4:4.

Batendeka Ukufulunganya Ukupepa kwa Bena Kristu

Yesu alandile ukuti kukaba bamo abakesa mu kufulunganya ifyo asambilishe abantu. Atile: “Ubufumu bwa mu muulu bwapala umuntu uwatandile imbuto shisuma mwi bala lyakwe. Ilyo abantu bali mu tulo, umulwani wakwe aliishile no kutanda amankumba mu ngano, aya no kuya.” Nomba ica kupapusha ca kutila, lintu abasha baebele uwatandile imbuto shisuma ico umulwani acitile no kumwipusha nga kuti bafumyamo amankumba, uyu katanda wa mbuto shisuma atile: “Iyo; epali ilyo mulelonganika amankumba, mwanukwila kumo ne ngano. Lekeni fyonse fibili fikulile pamo mpaka no kulobolola; kabili pa nshita ya kulobolola nkeba aba kulobolola ati, Mubale mulonganye amankumba no kuyakaka imyanshi ku kuyoca, lyene kabiyeni mulonganye ingano mu butala bwandi.”—Mateo 13:24-30.

Nge fyo Yesu umwine alondolwele mu cilangililo cakwe, umwaume uwatandile ngano mwi bala, ni Yesu wine, kabili imbuto atandile, Bena Kristu ba cine. Umulwani uwatandile amankumba mu ngano ni “Kaseebanya.” Amankumba ni bampulamafunde, abasangu abaibepa ukuti babomfi ba kwa Lesa. (Mateo 13:36-42) Umutumwa Paulo na o alilandile na fimbi ifyali no kucitika mu cilonganino ca Bena Kristu. Atile: “Ninjishiba ukuti ilyo nkafumapo imimbulu ya kutakanya ikengila muli imwe kabili tayakatentembe umukuni, kabili muli imwe bene mukema abantu abakalalanda ifyapotama ku kukula abasambi babakonke.”—Imilimo 20:29, 30.

Imipepele ya Bena Kristu Yaonaika

Bushe ifyo Yesu alandile mu cilangililo ne fyo Paulo atile fikacitika fyalicitike? Ee fyalicitike. Abantu bamo abalefwaya ukucindikwa sana batendeke ukutungulula ku maka icilonganino ico Yesu ashiile, kabili balefwaya aba mu cilonganino ukulacita ifyo bena balefwaya. Yesu aebele abasambi bakwe ukuti: “Tamuli ba pano calo.” (Yohane 15:19) Lelo, abantu abalefwaya sana ukulatungulula baalikatene na bakateka no kupanga amacalici Ayakalamba ayaletungulula abantu abengi. Aya macalici ayanonkele ifyuma ifingi yalesambilisha “ifyapotama” (ifishalungama). Fimo ifyo yalesambilisha fya kutila, abantu bafwile ukulapepa Ubuteko no kuipeelesha ukufwila mu nkondo. Kanshi, abantu abatila Bena Kristu balelwa inkondo no kwipaya abantu abo balemona ukutila tabasumina muli Lesa. Baleya na ku nkondo kabili baleipaya na “bamunyinabo,” abantu abo balepepa nabo. Kanshi tabaleumfwila ifyo Yesu alandile ukuti tabalingile ukuipoosa mu fya calo e lyo kabili tabatemenwe abanabo nge fyo baitemenwe.—Mateo 22:37-39; Yohane 15:19; 2 Abena Korinti 10:3-5; 1 Yohane 4:8, 11.

Twamona kanshi ukutila abantu ba mu macalici abaleyita pa nshita iitali ukuti Bena Kristu, tabali Bena Kristu ba cine. Nga filya fine tulandilepo na mu fipande fibalilepo e mulandu wine abantu balefumina mu macalici no kupanga utumabumba utwalekanalekana. Amacalici yaleingila mu fikansa fya calo, kabili yalesuula na mafunde ya kwa Lesa. Ifi fyonse ifyabipa twalandapo te ficita Abena Kristu ba cine, lelo abacite fi Bena Kristu ba bufi, abapala amankumba ayo Satana atandile. Ni kwi imipepele ya bufi ilelola? Nge fyo tumfwile mu cilangililo ca kwa Yesu, icikalenga ukuti imipepele ya bufi ikapwe te kutila bantu bakaleka ukupepako. Lelo Lesa e ukaipingula no kuyonaula.

Abena Kristu ba Cine Balebalika mu Mfifi

Mu cilangililo ca kwa Yesu, ilyo alandile pa kulonganya no konaula “amankumba” ayaba e mipepele ya bufi, atile kukaba na cimo icikacitika ilyo amankumba tayalaonaulwa. Pa myaka iingi imipepele ya bufi iyaba nga “amankumba” yalifulile ica kutila calyafishe sana ukwishiba Abena Kristu ababa mu kupepa kwa cine, abapala “ingano.” Lelo Yesu alondolwele ati kukaba ukulonganika ingano ukushifumya mu mankumba pa nshita ya “kulobolola,” ne yi nshita ya kulobolola e ilya Yesu atile ni “mpela ya bwikashi.” Yesu asosele no kuti: “Pa nshita ilya abalungama bakabalika kwati kasuba.” (Mateo 13:39-43) Ificitika mu calo filanga ukutila twikala mu nshiku sha kulekelesha isha buno bwikashi. Ishi nshiku sha kulekelesha shatendeke pa Nkondo ya Calo iya Kubalilapo, iyaliko imyaka 90 iyapita. (Mateo 24:3, 7-12) Bushe na filya Yesu alandile ukuti abalungama bakabalika kwati kasuba, na fyo fyalicitika?

Kwaliba ukulonganika Abena Kristu ba cine ukubafumya mu bantu bapala “amankumba” abatila Bena Kristu. Inte sha kwa Yehova ‘balebalika kwati kasuba,’ e kutila baleafwa bambi ukwishiba Lesa wa cine Yehova. Inte sha kwa Yehova tabasuula amafunde ya kwa Lesa. Kanshi abasanguka Inte sha kwa Yehova, ilingi line, bafwile ukwaluka sana mu mikalile yabo no kutendeka ukukonka amafunde yaba mu Cebo ca kwa Lesa ayo Abena Kristu ba cine balingile ukukonka.

Ku kulongana kwa Nte sha kwa Yehova takuba ifya kwangala. Icikalamba kubela ukulongana, kusambilisha abantu Baibolo ukwabula ukubalipilisha. Balalanga abantu ukuti balibatemwa kabili balaba aba bucibusa kuli bena. Ifi e fyo Baibolo ibasambilisha ukuba. Ifyo Inte sha kwa Yehova basumina fya kutila Lesa akalenga lino sonde ukuba paradaise umo abafuuka bakekala, nga filya fine Lesa afwaile ukuti cibe pa kutendeka. Lelo ilyo Lesa talacita ifyo, intanshi afwile ukufumyapo ukupepa kwa bufi, uko beta mu Baibolo ukuti Babiloni Mukalamba. Ukulingana no kusesema kwaba mu Baibolo, inshita iisheleko inono pa kutila Yehova alete uko kwaluka. Mateo 5:5; Ukusokolola 18:9-10, 21.

Lintu abantu ba cumfwila bakalubulwa ukufuma ku misango yonse iya kupepa kwa bufi, ukupepa kwa cine kukekatanya abantu bonse abakekala pe sonde. Mwandini iyo ikaba ni nshita iisuma ku Bena Kristu ba cine ababa nge ngano shilya Yesu atandile! Paradaise yaliko mu Edene ikabwela na kabili, isonde likaba ilya mutende. Takwakabe ne mipepele ya bufi iileta ifimfulunganya!

[Icikope pe bula 23]

“Umulwani wakwe aliishile no kutanda amankumba mu ngano.”—Mateo 13:25

[Ifikope pe bula 24, 25]

Tulemwita ku Ng’anda ya Bufumu iya Nte sha kwa Yehova iyabela uko mwikalila. Uku e ko basambilisha abantu ifya mu Baibolo ukwabula ukubalipilisha

[Icikope pe bula 25]

“Lyene kabiyeni mulonganye ingano mu butala bwandi.”—Mateo 13:30