Twalikwata Ifyuma Ifyacindama Ifya Kupeelako Bambi
1 Mu Cebo ca kwa Lesa mwaliba amasambilisho ayacindama nga nshi ayo twatemwa. (Amalu. 12:6; 119:11, 14) Inshita imo, Yesu alandile ifilangililo ifyalekanalekana ifyalelanda pa Bufumu, kabili aipwishe abasambi bakwe ukuti: “Bushe namwiluka fyonse ifi?” Ilyo bayaswike ukuti nabeluka fyonse, abebele ati: “Kanshi onse uusambilisha abantu, ilyo bamusambilisha ifya bufumu bwa mu muulu, aba ngo muntu, umwine wa ng’anda, uufumya mu cipao cakwe ifintu ifipya ne fya kale.”—Mat. 13:1-52.
2 Icine ca mu Baibolo ico twasambilile ilyo twatendeke fye ukusambilila Baibolo caba kwati fyuma ifyo twakwata kale. Ilyo tuletwalilila ukusambilila pa lwesu ifyashika ifyaba mu Cebo ca kwa Lesa, tuleshiba icine na cimbi icaba mu Baibolo, kabili ici cine ciba cuma icipya kuli ifwe. (1 Kor. 2:7) Na kabili, tulasambilila na fimbi ku “musha wa cishinka kabili uwashilimuka.”—Mat. 24:45.
3 Twalicindamika sana ifi fyuma fya ku mupashi, e kutila icine ico twasambilila kale ne co tusambilile nomba line. Ici cilenga tulefwaya sana ukukanshiwa pa kuti twishibe bwino ukusambilisha Icebo ca kwa Lesa, ukulaebako bambi icine icacindama ico twasambilila.
4 Sambilileni ku ca Kumwenako ca kwa Yesu: Pa kulangilila ifyo abikile amano kuli ifi fyuma, Yesu alibombeshe ukushimikila bambi imbila nsuma. Nangu fye ni lintu anakile, talekele ukupeelako bambi ifyuma ifyali mu “butala” bwakwe.—Yoh. 4:6-14.
5 Ukutemwa uko Yesu atemenwe abantu abashaishibe Lesa ne fyo afwaya, kwalengele ukuti alebila icine ca kwa Lesa icaba nge cuma kabili icipeela umweo. (Amalu. 72:13) Aleumfwila uluse abantu abalefwaya ukwishiba Lesa ne fyo afwaya, kabili ici calengele ukuti ‘alebasambilisha ifintu ifingi.’—Marko 6:34.
6 Pashanyeni Yesu: Nga twalicindamika sana ifyuma twakwata, tukalafwaisha ukupeelako abantu ifyuma fya ku mupashi ifyaba muli Baibolo, nga filya fine Yesu alecita. (Amapi. 2:1-5) Nangu ca kutila limo kuti twaumfwa ukunaka, na lyo line tufwile ukuba abacincila ukwebako bambi icine ca mu Baibolo. (Marko 6:34) Nga tulamona ukuti ifi fyuma fya ku mupashi twakwata fyalicindama, tukalabombesha mu mulimo wa kushimikila, kabili tukalafwaya ukubombako lyonse.