“Icishibilo ca mu Muulu”

INSOSELO ya ku kale itila: “Ulwelele lwakashika ubushiku, buseko kuli bakensha wa ngalaba,/Ulwelele lwakashika ulucelo, bakensha ba ngalaba balasokwa.” Ilelo, amasetilaiti, ukusambilila ukukaba no kutalala ifyafwilishiwa na makompyuta, Doppler radar (ica kupiminako amatamba ya fya kumfwaninamo fya mu lwelele), ne nshila shimbi isha sayansi filabomfiwa ku kupimina libela imiceele. Ukusobela ilingi line kulomfwana ne nsoselo yambwilwe nomba line.

Abalwani ba kwa Yesu Kristu aba butotelo bapindile kuli wene “icishibilo ca mu muulu,” ukulangisha kushili kwa lyonse ku kushinino kuti aali e Mesia. “Pa cungulo,” e fyo asosele, “mutila, Kukacelebuka, pantu kwakashika ku muulu; kabili ulucelo mutila, Ubwa lelo kulebe nkuuka, pantu kwakashika no kubundumana. Mwaishibo kulinge mimonekele ya muulu, lelo tamulinga fishibilo fya nshita. Inkulo ibifi kabili iya bucende ifwaye cishibilo, kabili icishibilo tacakapeelwe kuli yene, kano icishibilo ca kwa Yona.”—Mateo 16:1-4.

Abalwani ba kwa Yesu kuti bapimina libela imiceele lelo tabaali na maka ya kumfwikisha imilandu ya ku mupashi. Ku ca kumwenako, ni shani pa lwa “cishibilo ca kwa Yona”? Pa numa ya kupoosa mupepi ne nshiku shitatu mu nda ya cisabi, kasesema wa kwa Lesa Yona ashimikile mu Ninebe na muli fyo ukuba icishibilo kuli ulya musumba ukalamba uwa Ashuri. Inkulo ya kwa Yesu yalikwete “icishibilo ca kwa Yona” lintu Kristu apoosele imbali sha nshiku shitatu mu nshishi kabili alibuushiwe. Abasambi bakwe babilishe ubushininkisho bwa cilya ca kuponako, na muli fyo Yesu aali cishibilo kuli ilya nkulo.—Mateo 12:39-41.

Pa kashita na kambi, abasambi ba kwa Yesu bamwipwishe ulwa “cishibilo” ca “kubapo” kwakwe ukwa ku nshita ya ku ntanshi mu maka ya Bufumu. Mu kwasuka, apeele icishibilo cabamo ifingi icapangwa ne mbali shalekanalekana, ukusanshako inkondo sha pa cipimo cishingalinganishiwako, ifinkukuma fikalamba, ukucepelwa kwa fya kulya, no kushimikila kwa mu kusaalala kwe sonde pa lwa Bufumu bwaimikwa ubwa mu muulu ubwa kwa Lesa.—Mateo 24:3-14, NW.

Bushe ulamwensekesha icishibilo ca kubapo kwa kwa Kristu nge Mfumu ishimoneka iya mu muulu? Imbali sha ciko shilefikilishiwa pali iyi nkulo. (Mateo 24:34) Kabili ni shani pa lwa nshita ya ku ntanshi? Baibolo taisokolola fye ukuti impela ya iyi micitile ya fintu ili mupepi lelo na kabili isobela ubushiku bupya ubwa kwa Lesa ubwalaiwa ubo buli no kuca mu kwangufyanya mu kulengamisha kabili mu kubembela ku mutundu wa muntu.—2 Petro 3:13.