Abapwishishe Isukulu lya Gileadi—“Bamishonari Bene Bene!”
“BUSHE mishonari cinshi?” Ico cipusho caipushiwe mu lyashi likalamba ilya mu nyunshipepala mupepi ne myaka amakumi yane iyapitapo. Kalemba apelulwile ukuti bamishonari ba cine cine baali fibombelo fya kuletako ukwaluka mu fya kwangalila pamo na mu fya bunonshi. Nangu cibe fyo, pa Mulungu, March 5, 1995, pa Ciyanda ca Kulonganinamo ica Nte sha kwa Yehova ica mu Jersey City, icasuko icapusanininako fye calipeelwe mu kwebekesha. Cinshi calecitika? Cali kupwishe sukulu ukwe kalasi lyalenga 98 ukwa Watchtower Bible School of Gilead—isukulu ilyatuma bamishonari ukuya ku mbali shonse isha calo!
Pa numa ya lwimbo lwa kwiswila ne pepo, Albert D. Schroeder uwa mwi Bumba Litungulula mu kukaba asengeele bonse 6,430 abasangilweko. Mu kulandapo kwakwe ukwa kwiswila, Munyina Schroeder alondolwele mu kumfwika umulandu abapwishishe isukulu lya Gileadi babelele abapusanako kuli bambi abaipeele abene ishina nga bamishonari. Atile: “Baibolo e citabo cikalamba ica kusambililamo ica Gileadi.” Abapwishishe isukulu lya Gileadi balakanshiwa ukuba, te bakabomba ba mu kwangalila capamo, lelo ukuba bakasambilisha ba Cebo ca kwa Lesa. Muli fyo balifikapo mu kuibela ku kusakamana ukukabila kwa ku mupashi ukwa bantu mu mabala ya cilendo.
Bakalanda bakonkelepo bakumishe pa mbali shimbi ishingi shintu abapwishe sukulu lya Gileadi bashininkishishamo ukuti ni bamishonari “bene bene.” Charles Molohan alandile kuli bene pa mutwe wa lyashi uwa kuti “Mube Abatwale Fisabo Fisuma nga Bamishonari.” Ukutonta pa mashiwi ya mutumwa Paulo pa Abena Kolose 1:9, 10, Munyina Molohan acinkwileko abapwishishe isukulu ukuti imyeshi yabo isano iyapita pa Gileadi yali naibaafwa ukwingilishako “mu kwishiba Lesa.” Ici cili no kubaafwa ukuletako ifisabo mu nshila shibili: pa kulangisha ifisabo fya mupashi wa kwa Lesa na pa kwakana icine ca Baibolo na bambi.
Daniel Sydlik uwa mwi Bumba Litungulula e wakonkelepo no mutwe wa kushilimuna uwa kuti “Mwilapooselekesha Ubumi Bwenu.” Aipwishe icipusho ca kwa Yesu ica kuti: “Umuntu engapeela cinshi ca kukabulamo umweo wakwe?” (Mateo 16:26) Munyina Sydlik alandilepo ukuti: “Abantu balikabusha imyeo yabo ukufwayako inshila ya bumi iyaanguka, iyanakilila.” Nangu cibe fyo, abo bakwata icitetekelo icumi tabasuusuka lintu balolenkana ne fya kwesha na mesho. Amashiwi ya kwa Yesu yalango kuti umo afwile ukuitemenwa ‘ukupeela,’ e kuti, ukuipusula, pa kuti enganonka umweo, nelyo ubumi. Bamishonari abapya bakonkomeshiwe ukupeela Yehova ifyabo fyonse, apo bengapesha, mu mulimo wakwe!
Pakonkele William Van de Wall uwa muli Komiti wa Dipartimenti wa Mulimo uwalandile pa mutwe wa kuti “Umutumwa Paulo—Ica Kumwenako Icalingo Kupashanya.” Munyina Van de Wall alondolwele ukuti: “Paulo e wali pa ntanshi mu mulimo wa bumishonari mu mwanda wa myaka uwa kubalilapo.” Mu kulingisha lyene, imbali shine shalyebekeshiwe umo muntu umutumwa Paulo aimikile bamishonari ba lelo ica kumwenako cisuma: (1) Ukutemwa kwa cine cine ukwa kwa Paulo ku bantu, (2) ukubombesha kwakwe mu butumikishi, (3) mu kufuuka ukukanaininikisha, (4) ukucetekela kwakwe kushingatwishikwa muli Yehova.
“Lekeni Yehova Amulengule mu Mulimo Wenu Uupya” e mutwe wa lyashi uwalandilwepo na Lyman A. Swingle uwa mwi Bumba Litungulula. Ukubomfya ilembo lya pali bulya bushiku, Ilumbo 139:16, Munyina Swingle asumine ukuti, pamo nga bamishonari bapya, bali no kukumanye mpika mu mulimo wabo no kuti Yehova alishiba ukupikululwa kwa shiko. “Kabiyeni kuli wene,” e fyo akonkomeshe, “landeni kuli wene lintu mwaba ne mpika. Fwayeni ukwishiba icili ukufwaya kwakwe.”
John E. Barr uwa mwi Bumba Litungulula lyene alandile pa mutwe wa kuti “Icitetekelo Cenu Cilekula no Kukula.” (2 Abena Tesalonika 1:3) Pali Luka 17:1, tubelengapo kuti Yesu atile: “Te kuti kubule ifya kupunwisha.” Bamo balipunwishiwa pa mibele ya buntu iya bamishonari banabo. Lelo Munyina Barr akoseleshe bamishonari ukukwate citetekelo icikabilwa pa kuba abalekelela. Mu cine cine, ni muli aya mashiwi yashingulukako e mo abasambi ba kwa Yesu bamulombele abati: “Kusheni icitetekelo cesu.” (Luka 17:2-5) Icitetekelo ca bamishonari kuti na kabili caeshiwa ku kuteulula kwalekanalekana ukwa mu kuteyanya. “Bushe namukwata icitetekelo ca kupokelela kwene,” e fyaipwishe Munyina Barr, “nelyo bushe kukaba ifipindami fyapale mpili?”
Pakonkele ukukonkomesha kuli bakafundisha babili aba pa Gileadi. Jack Redford acincishe abapwishishe isukulu ukusungilila imibele ya mutima iyashikatala. Ashimikepo mishonari umo uwalekele umulimo wakwe pa mulandu wa kumutumfya kuli bamishonari banankwe. Amalembo, nangu cibe fyo, yalatusoka ukukanalafulwa na pashilingile. (Lukala Milandu 7:9) “Kwateni imibele ya mutima iyalinga,” e fyo acincishe. “Mulelekelela ifilubo ifya bambi abamushingulwike no kukanapwililika kwabo.”
U. V. Glass, kalemba wa pa Gileadi, lyene aipwishe ati: “Bushe muli abaiteyanya ukubomba ne ‘nshita ne ca mankumanya’”? (Lukala Milandu 9:11) “Inshila yesu iya mikalile lyonse ilaalukaaluka,” e fyalandilepo Munyina Glass, “kabili shimo kuti shaba isha kukalifya nga nshi.” Bamishonari bamo mu kukanaenekela balilolenkana no butuntulu bwa bumi ubwabipa, ukulwala, ne mpika sha pa lupwa, ukupatikisha bamo ukuleka umulimo wabo. “Te mulandu na fintu ica mankumanya cingaba,” e fyasosele Munyina Glass, “twalishiba ukuti Yehova alebukila ulwa cene kabili alangwako. Nga twashintilila pali wene, twalishiba ukuti tukacimfya!”
Ilyashi ilyakwete umutwe wa kuti “Abapaatulwa ku Mulimo wa Bumishonari” lyafishishe pa kalume ukukonkana kwa malyashi ukwa lucelo. Theodore Jaracz uwa mwi Bumba Litungulula alandile pa cipusho cipushiwe pa kutendeka, ica kuti, “Bushe mishonari cinshi?” Pa kwasuka, alandile pa Imilimo ifipandwa 13 na 14 pa mulimo wa bumishonari uwa kwa Paulo na Barnaba. Mu kumfwika, ulya mulimo watontele ukusakamana, te pa kupwisha amafya ya mu bwikashi, lelo ni pa ‘kubila imbila nsuma.’ (Imilimo 13:32) Munyina Jaracz aipwishe ati: “Bushe tamulesumina ukuti Paulo na Barnaba balangishe cintu mishonari mwine mwine alingile ukuba?” Mishonari mukokole Robert Tracy uwa ku Mexico lyene alitilwe ukuti apeeleko ifya kukumanya fyakwe umwine pamo nga kabila wa mbila nsuma.
Programu wa lucelo afikile pa kalume ilyo Munyina Schroeder apeele amadiploma ku bapwishishe isukulu 48. Abasangilweko balicincimushiwe ukumfwa amashina ya fyalo 21 ifyo aba bamishonari batuminweko: Barbados, Benin, Bolivia, Central African Republic, Costa Rica, Côte d’Ivoire, Ecuador, Equatorial Guinea, Estonia, Guinea-Bissau, Honduras, Latvia, Leeward Islands, Mauritius, Mozambique, Nicaragua, Paraguay, Peru, Senegal, Taiwan, na Venezuela.
Pa numa ya kutuusha kwa ca kulya ca kasuba, ibumba na kabili lyalilongene no kuipakisha isambililo lya Ulupungu lwa kwa Kalinda ilyacincimuka, ilyatungulwilwe na Robert P. Johnson uwa mu Dipartimenti wa Mulimo. Ifilundwa fye kalasi lyalenga 98 e baleasuke fipusho. Ici cakonkelwepo no kulanshanya kwa kwipusha ukwa kulengo buseko ukwatungulwilwe ne filundwa fya bakabomba ba pa Gileadi. Ibumba lyonse lyalikoseleshiwe apakalamba ilyo abapwishishe isukulu baleshimika ifyo bakumenye mwi bala no kulumbulula ifyo bayumfwile pa lwa kupeelwa kwabo umulimo ku nse ya calo.
Pa myaka mutanda na citika, Gileadi yabelele pa fikuulwa fya Watchtower Society mu Wallkill, New York. Mu April 1995, nangu cibe fyo, isukulu lyaselele ku cifulo cipya ica Watchtower Educational Center mu Patterson, New York. Ni shani fintu ulupwa lwa Bethel pa Wallkill bayumfwile pali uku kwaluka? Pali uku kupwishe sukulu impendwa ya bamo abafumine ku Wallkill balipushiwe. Amashiwi yabo aya kufika pa mutima yacilengele ukumfwiko kuti abasambi ba Gileadi balisha ukwebekesha kubelelela pali bene. Mu kumonekesha, aba baume na banakashi abaitemenwa baba ni bamishonari bene bene—abaicefya, aba kuipeela bulilambo, abayangwako mu kushika pa lwa kwaafwako bambi.
Ilyo ukupwishe sukulu kwaleisa ku mpela, abasangilweko bonse bali abacetekela ukuti Isukulu lya Gileadi likatwalilila ukucita mu kutunguluka cintu lyacita pa myaka ukucila 50, ukuletako bamishonari bene bene!
[Akabokoshi pe bula 18]
Ifipendo fye Kalasi:
Impendwa ya fyalo fyaimininweko: 8
Impendwa ya fyalo batuminweko: 21
Impendwa ya Basambi: 48
Avareji wa myaka ya bukulu: 32.72
Avareji wa myaka mu cine: 15.48
Avareji wa myaka mu butumikishi bwa nshita yonse: 10.91
[Icikope pe bula 18]
Ikalasi Lyalenga 98 Ilya Bapwishishe Sukulu lya Watchtower Bible School of Gilead
Mu mutande uli pe samba, imitande ipeelwe amanambala ukufuma pa ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo umo.
(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.