5. Kuti mwalondolola shani ukwaluka mu mashiwi yenu?

⁵ Kulya kwaluka kwali kusesema. Yesu atile: “Umwana wa muntu ali no kwisa mu bukata bwa kwa Wishi pamo na bamalaika bakwe . . . Ndemwebe cine cine, nati, bamo ba mu beminine pano tabakasonde mfwa bakasuke abamona Umwana wa muntu aleisa mu bufumu bwakwe.” (Mateo 16: 27, 28) Bushe bamo pa batumwa balimwene Yesu aleisa mu Bufumu bwakwe? Pali Mateo 17:1-7 patila: “Kabili apo papite nshiku mutanda [6] Yesu abuula Petro, na Yakobo na Yohane munyina, no kubaninika ku lupili ulwasansama ku mbali; kabili ayalwike pa cinso cabo.” Mwandi kulya kwaluka kwali ukwa kusungusha! Awe “icinso cakwe cabalike nga kasuba na malaya yakwe yali ayabengeshima ngo lubuuto. Kabili, mona, kuli bene kwamoneke Mose na Eliya, balelanda nankwe.” Kabili ‘ikumbi ilyabuuta lyalibakupikile,’ kabili baumfwile ishiwi lya kwa Lesa lileti: “Uyu e Mwana wandi uwatemwikwa, uo mbekelwamo; muumfweni. Kabili abasambi pa kulyumfwa, bawile ubukupeme, no kutiine cibi; lelo Yesu aishileko, no kubekata, ati, Imeni, mwitiina.”

7. Twaishiba shani ukuti Petro aleibukisha bwino bwino icimonwa?

⁷ Ukwaluka kwakwe kwakoseshe icitetekelo ca aba baume batatu abali no kulatungulula ifintu mu cilonganino ca Bwina Kristu. Ukubengeshima kwa cinso ca kwa Yesu na malaya yakwe, no kusosa kwa kwa Lesa umwine ukuti Yesu Mwana Wakwe uwatemwikwa uo balingile ukumfwako—fyakoseshe icitetekelo cabo nga nshi. Lelo abatumwa tabaali na kwebako umuntu nangu umo ici cimonwa ukufikila Yesu abuushiwa. Ilyo papitile imyaka nalimo 32, Petro ali acili aleibukisha bwino kulya kwaluka kwa mu cimonwa. Lintu alandile pa lwa kwene no kulondolola ubupilibulo bwa kuko, alembele ukuti: “Pantu tatwakonkelele imilumbe iyashikwa ku bucenjeshi, ilyo twamulengele ukwishiba amaka no [kubapo, NW] ifya kwa Shikulwifwe Yesu Kristu; lelo twali bakamona wa bumulopwe bwakwe, ilyo apokelele ubukata no mucinshi kuli Lesa Wishi, ilyo kuli wene kwaletelwe ishiwi ukufuma ku bukata bwa bukalamba ubwacilishamo, aliti, Uyu e mwana wandi, Uwatemwikwa, uo mbekelwamo. Kabili ishiwi ili ifwe twalyumfwile lyaletwa ukufuma mu muulu, pa kuti twali pamo nankwe mu lupili lwa mushilo.”—2 Petro 1:16-18.