ISAMBILILO 12
Finshi Fingamwafwa pa Kuti Mutwalilile Ukusambilila Baibo?
Kuti mwanonkelamo nga mwatwalilila ukusambilila Baibo, nangu ca kuti inshita shimo tacanguka. Inshita shimo kuti mwasakamana nga ca kuti mukatwalilila ukusambilila Baibo. Cinshi cacindamina ukutwalilila ukulaibikilishako ukusambilila Baibo? Finshi fingamwafwa ukutwalilila ukusambilila Baibo nangu ca kuti inshita shimo cilafya?
1. Bushe ukusambilila Baibo kuti kwamwafwa shani?
“Icebo ca kwa Lesa ca mweo kabili ca maka.” (AbaHebere 4:12) Baibo kuti yamwafwa, pantu ilalondolola ifyo Lesa atontonkanya ne fyo amutemwa. Mukasambilila ifintu ifingi kabili mukaba ne nsansa pali ino nshita, e lyo ne subilo lya kuti ifintu fikawama ku ntanshi. Ne cacindamisha ca kuti nga mulesambilila Baibo, kuti mwaba cibusa wa kwa Yehova. Na kabili ukusambilila Baibo kukalenga ubumi bwenu bukawamineko.
2. Mulandu nshi tulingile ukwishibila ukuti icine icaba mu Baibo calicindama?
Icine icaba mu Baibo caba kwati cuma ica mutengo sana. E co Baibo itukoselesesha ukuti: “Shita icine kabili wicishitisha.” (Amapinda 23:23) Nga twaishiba ifyo icine caba mu Baibo cacindama, tukalaesha na maka ukutwalilila ukulasambilila Baibo, nangu ca kuti twakwata amafya.—Belengeni Amapinda 2:4, 5.
3. Bushe Yehova kuti amwafwa shani ukutwalilila ukusambilila Baibo?
Yehova Kabumba wa Maka Yonse kabili Cibusa wenu alimwishiba bwino kabili alafwaya ukumwafwa ukusambilila pali ena pa kuti mumwishibe. Kuti alenga “mulefwaya ukucita ifyo afwaya kabili alamupeela na maka ya kuficita.” (Belengeni Abena Filipi 2:13.) Kanshi nga mulekabila ukumwafwa pa kuti mutwalilila ukusambilila nelyo ukubomfya ifyo mulesambilila, Yehova kuti amwafwa. Nga mulekabila amaka ya kucimfya amafya nelyo aya kushipikisha nga balemucusha, Yehova kuti amupeela. Lyonse mulepepa kuli Yehova kabili mulemulomba ukuti alemwafwa ukutwalilila ukusambilila Baibo.—1 Abena Tesalonika 5:17.
SAMBILILENI NA FIMBI
Sambilileni ifyo mwingacita pa kuti mutwalilile ukusambilila Baibo, nangu ca kuti mwalikwata ifya kucita ifingi nelyo nga balemukaanya. Lyena mumone ifyo Yehova engamwafwa ukutwalilila ukusambilila.
4. Mulemona ukusambilila Baibo ukuti kwalicindama sana
Inshita shimo kuti twalamona kwati twalikwata ifya kucita ifingi ica kutila te kuti tukwate ne nshita ya kusambilila Baibo. Finshi fingatwafwa? Belengeni Abena Filipi 1:10, lyena lanshanyeni aya mepusho:
Finshi fimo ifyo mumona ukuti e “fyacilapo ukucindama” mu bumi bwenu?
Finshi mwingacita pa kuti mulelanga ukuti ukusambilila Baibo kwalicindama sana kuli imwe?
Nga mwabalilapo ukubika umucanga mu mbeketi e lyo mwaesha ukubikamo amabwe, te kuti yengile yonse
Nga mwabalilapo ukubika amabwe mu mbeketi, kuti kwashala incende iya kuti mwabikamo umucanga uwingi. Ifi fine e fyo ciba nga ca kuti mwabalilapo ukucita ifintu “ifyacilapo ukucindama” mu bumi bwenu. Kuti mwakumanisha ukuficita, kabili kuti mwashalako ne nshita ya kucitako ne fintu fimbi
Nga tulesambilila Baibo tuleshiba fyonse ifyo tukabila ukwishiba pa fya kwa Lesa, e kutila ukwishiba Lesa no kulamupepa. Belengeni Mateo 5:3, lyena lanshanyeni ici cipusho:
Tunonkelamo shani nga ca kuti tulemona ukutila ukusambilila Baibo kwalicindama sana?
5. Muletwalilila ukusambilila Baibo na lintu balemukaanya
Inshita shimo, abantu bamo kuti bamweba ukuti muleke ukusambilila Baibo. Moneni ifyacitike kuli ba Francesco. Tambeni VIDIO, lyena lanshanyeni amepusho yakonkapo.
Muli vidio twatamba, finshi ifibusa fya ba Francesco na banyina bacitile ilyo babebeleko ifyo balesambilila?
Finshi fyafuminemo muli filya ba Francesco batwalilile ukusambilila?
Belengeni 2 Timote 2:24, 25, lyena lanshanyeni aya mepusho:
Bushe balupwa lwenu ne fibusa bomfwa shani ifi musambilila Baibo?
Ukulingana ne fyo twabelenga mu Baibo, cinshi mufwile ukucita nga ca kuti abantu bamo tabatemwe ukuti mulesambilila Baibo? Cinshi mufwile ukucitila ifyo?
6. Muleshintilila pali Yehova ukuti alemwafwa
Nga twaba sana ifibusa fya kwa Yehova, tulafwaisha ukulacita ifingamusekesha. Na lyo line, kuti catukosela ukwalulako fimo mu bumi bwesu pa kuti tuleikala ukulingana ne fyo Yehova afwaya. Nga ca kuti ifi e fyo mumfwa, tamufwile ukunenuka. Yehova akamwafwa. Tambeni VIDIO, lyena lanshanyeni amepusho yakonkapo.
Muli vidio twatamba, finshi ba Jim balekele ukucita pa kuti batendeke ukulacita ifyo Yehova atemwa?
Finshi mwatemwa pa fyo bacitile?
Belengeni AbaHebere 11:6, lyena lanshanyeni aya mepusho:
Finshi Yehova akacitila “abafwaisha ukumubombela,” e kutila abesha na maka ukumwishiba no kulacita ifilenga alasekelela?
Bushe ifi fyalenga mwaishiba ukuti Yehova omfwa shani nga amona mulefwaisha ukusambilila Baibo?
BAMO KUTI BAIPUSHA ABATI: “Mulandu nshi mulesambilila Baibo ne Nte sha kwa Yehova?”
Kuti mwa-asuka shani ici cipusho?
IFYO MUSAMBILILE
Nangu ca kuti limo kuti cakosa ukusambilila Baibo, ukusambilila Baibo kuti kwalenga mwaba ne nsansa umuyayaya. Mutwalilile ukushintililila pali Yehova, kabili akamulambula.
Ukupitulukamo
Mulandu nshi icine icaba mu Baibo cacindamina kuli imwe?
Finshi mufwile ukucita nga ‘mwaishiba bwino bwino ifyacilapo ukucindama’?
Cinshi mulingile ukulombela Yehova ukuti amwafwe ukusambilila Baibo?
ISHIBILENIPO NA FIMBI
Moneni ifintu 4 ifyo abantu abengi bacita pa kuti balebomfya bwino inshita yabo.
Moneni ifyo Yehova ayafwile umwanakashi umo uwalebombesha ukucita ifilenga Lesa alesekelela, lelo uo umwina mwakwe ashaishibe icalelenga alebombesha.
Moneni ifyo umwaume umo anonkelemo mu fyo abena mwakwe bashipikishe.
Inshita shimo Inte sha kwa Yehova balabeba ukuti balalekanya indupwa. Bushe ici ca cine?
“Bushe Inte sha kwa Yehova Balalekanya Indupwa Nelyo Balalenga Shaikatana?” (Icipande ca pa jw.org)