Ico Tulingiile Ukwelela

Petro alyumfwile ifyo Yesu abafundile pa fya kucita nga bapusana. Yesu atile abapusana balingile ukulanshanya ninshi bali fye babili. Lelo Petro ena alefwaya ukwishiba imiku alingile ukwelela uwamulufyanya.

Petro aipwishe Yesu ati: “Mwe Shikulu, miku inga ningabelela munyinane uluse nga andufyanya? Bushe miku 7?” Bashimapepo bamo balesambilisha ukuti umuntu alingile ukwelela umunankwe imiku itatu. E ico Petro amwene kwati nga aeleela munyina “imiku 7” ninshi amwelela sana.—Mateo 18:21.

Lelo Yesu talesambilisha abantu ukuti balingile ukulapenda imiku babalufyanya. E ico aebele Petro ati: “Nshilekweba nati, imiku 7, lelo imiku 77.” (Mateo 18:22) Ico Yesu alelandapo ca kuti, balingile ukutwalilila ukwelela. Kanshi Petro talingile ukulapenda imiku aeleela munyina.

Lyena Yesu ashimikile Petro na bantu bambi icilangililo pa kubalanga ukuti bafwile ukulaelela bambi. Alandile pa musha uo baeleele kuli shikulu wakwe lelo uwakeene ukwelela umusha munankwe. Imfumu yalefwaya abasha baiko ukubwesha imisha. Umusha umo uwakongwele amatalanti 10,000 [amadenari 60,000,000] balimutwele ku mfumu. Takwete umwa kubwesesha inkongole. E ico imfumu yatile bamushitishe no mukashi wakwe, na bana bakwe pa kuti abweshe inkongole. Awe umusha awile pa makasa ya kwa shikulu wakwe no kumupaapaata ati: “Mukwai bandoleleko, nkamubwesesha fyonse.”—Mateo 18:26.

Imfumu yalimumfwilile uluse kabili yalisuulileko ku nkongole ishingi isho umusha aikongwele. Lelo uyu umusha afumine palya no kuyasanga umusha mubiye uwamukwatile inkongole amadenari 100. Alimufyambete, amukama na pa mukoshi no kumweba ati: “Bwesha inkongole shandi shonse.” Lelo uyu musha awile pa makasa ya musha mubiye uwalemupinda inkongole e lyo alamupaapaata ati: “Undoleleko, nkakubwesesha.” (Mateo 18:28, 29) Lelo umusha, uo imfumu yasuulileko ku nkongole aikongwele, ena alikeene ukubelela umusha mubiye uluse. Ailemukakisha mu cifungo kabili atile akekalamo mpaka akabweshe inkongole nangu ca kuti indalama amukongwele yali iinono.

Yesu lyena atile abasha bambi abamweneko ifyacitike baile-eba shikulu wabo. Na o alifulilwe sana! Awe aitile umusha no kumweba ati: “We musha mubi we, nacisuulako ku nkongole shobe shonse ilyo wacimpaapaata. Bushe na iwe taufwile ukubelela umusha munobe uluse, ifyo na ine nkubelele uluse?” Shikulu wakwe, pa mulandu wa kuti alifulilwe, apeele umusha mubi ku balinshi ba cifungo, kabili atile akekalemo mpaka akabweshe inkongole shonse. Pa kusondwelela Yesu atile: “E fyo na Tata wa mu muulu akamucita nga tamubelela bamunyinenwe uluse ne mitima yenu yonse.”—Mateo 18:32-35.

Ili, lisambililo ilisuma sana pa fyo ukwelela bambi kwacindama! Lesa alitwelela imembu ishikalamba. Munyinefwe nangu engatubembukila shani, imembu shakwe shinono nga kushilinganya ku fyo tubembukila Lesa. Kabili Yehova tatwelela fye umuku umo, lelo atwelela imiku iingi sana. Bushe na ifwe tatulingile ukwelela munyinefwe imiku iingi, nangu ca kuti ifyo atulufyenye fyatukalifya sana? Nge fyo Yesu asambilishe mu Lyashi lya pa Lupili, Lesa ‘akatubelela uluse pa membu shesu, ifyo na ifwe tubelela uluse abatulufyanya.’—Mateo 6:12.