Maria Aimita Ilyo Ashilaupwa

Napapita imyeshi 4 ukutula apo Maria aimitiile. Ibukisheni ukuti ilyo Maria aimite fye, ailetandalila lupwa lwakwe Elisabete uwaleikala mu mpili sha mu Yudea ishali ku kapinda ka ku kulyo. Lelo pali iyi nshita ninshi Maria alibwelela ku mwabo ku Nasarete. Apo abena Nasarete baali no kwishiba ukuti Maria ali pa bukulu, afwile alisakamene sana pa fyo cali no kuba!

Icabipishe ca kuti Maria pali iyi nshita ninshi alikobekelwa kuli Yosefe, uwali kabasa. Maria alishibe bwino ifyalelanda Ifunde ilyo Lesa apeele abena Israele ukuti, umwanakashi uwakobekelwa nga alaala no mwaume umbi, ali no kupoolwa amabwe mpaka afwa. (Amalango 22:23, 24) Kanshi nangu ca kuti Maria taleelepo no mwaume, afwile alisakamikwe pa fya kulondolwela Yosefe pa fyo cali pa kuti emite e lyo ne fyo ifintu fyali no kuba.

Apo Maria alifuminepo pa myeshi itatu, Yosefe afwile alefwaisha ukumumona. Ilyo bamonene, nalimo Maria alilondolwelele Yosefe ukuti aali pa bukulu kabili afwile alyeseshe ukumulondolwela bwino sana ukuti umupashi wa mushilo uwa kwa Lesa e walengele ukutila emite. Na lyo line, cifwile calimwafishe Yosefe ukusumina ifyo Maria amwebele.

Yosefe alitemenwe Maria icine cine, alishibe ukuti Maria ali ne mibele iisuma kabili na bantu balimucindike. Na lyo line, Yosefe tasumine ifyo Maria amwebele, alemona fye kwati umuntu umbi e walengele Maria ukuba pa bukulu. Yosefe talefwaya ukuti Maria bakamupoole amabwe nelyo ukuti akaseebane ku bantu, e ico atontonkenye pa kumuleka ukwabula abantu ukwishiba. Mu nshiku shilya umuntu nga akobekelwa alemonwa ngo uwaupwa, kanshi na pa kuti bunkobekela bupwe, kano kwaba ukulekana.

Yosefe asukile apona mutulo ninshi aletontonkanya pa fyo ali no kucita. Awe malaika wa kwa Yehova amoneke kuli ena mu ciloto no kumweba ati: “Witiina ukusenda umukashi obe Maria ku mobe, pantu ifumo emiite lifumine ku mupashi wa mushilo. Akafyala umwana umwaume, kabili ukamwinike ati Yesu, pantu akapususha abantu bakwe ku membu shabo.”—Mateo 1:20, 21.

Ilyo Yosefe ashibwike, alitemenwe pantu nomba alishibe icishinka! Taikete na ku cani, alicitile ifyo malaika amwebele. Asendele Maria ku ng’anda ku mwakwe. Umuntu nga asenda nkobekela wakwe ku ng’anda, ninshi baupana ukulingana no lutambi. Kanshi ilyo Yosefe asendele Maria ku mwakwe, calishibikwe ukuti nomba baupana. Na lyo line, Yosefe tasendemepo na Maria ukufikila ilyo Yesu afyelwe.

Ilyo kwashele fye inshiku ishinono ukuti Maria apaape, Yosefe na Maria batendeke ukuipekanya ukufuma mu mushi mu mwabo mu Nasarete. Ni kwi balefwaya ukuya pali iyi nshita iyo Maria ali mupepi no kupaapa?