Ubusesemo Bwafikilishiwa

LINTU Kristu Yesu aipushiwe ku basambi bakwe ulwa cishibilo ca kubapo kwakwe ukushimoneka mu maka ya Bufumu, Yesu asobele “ukufulisha kwa bupulumushi.” (Mateo 24:3, 12) Bushe ubu busesemo bulefikilishiwa mu kasuba kesu?

Mu cine cine bulefikilishiwa! Icitabo The United Nations and Crime Prevention, icasabankanishiwe na UN mu October 1991, calondolola ukuti: “Imisoka yabipisha ukucilisha e mpika iyakakala ku nko ishingi isha calo. Umusoka wa mu kati ka calo walicimfya ukulama kwa nko ishafulilako kabili umusoka wa pa kati ka nko walisumbana ukufika ukwalepesha ukushingafikwako ne fyalo fyonse. . . . Imisoka ku mpuka shateyanishiwa isha ntalamisoka walitanunuka ukufika ku fipimo fyasumbana, ukucilisha mu kuba ne fya kufumamo fyabipisha ukukuma ku lukaakala lwa ku mubili, icintiinya no kubosha ukwa balashi ba cintubwingi. Ukululunkanya kwalilofya amakumi ya makana aya finakabupalu fya kaele. Ubukwebo bwa bufumfuntungu ubwa bunkalwe ubwa miti iikunkumya bwasanguka kayofi ka mu kusaalala kwa calo. Ukonaula kwa fyashingulukako ukwa mulekelesha ukwa buntalamisoka kwalibuula imibele ya musango yo iilesumbana ne fipimo ica kuti yalishibikwa pamo nga umusoka ukulwisha icalo cine.”

Ukusansa: Ukwingilishiwako ukufuma ku kusansa 150 pa bantu 100,000 mu 1970 ukufika mupepi na 400 pa bantu 100,000 mu 1990.

Ubupuupu: Ukwingilishiwako ukufuma ukucila fye panono pali 1,000 mu bantu 100,000 mu 1970 ukufika kuli 3,500 pali 100,000 mu 1990.

Ubukomi bwa ku mufulo: Mu fyalo ifilelunduluka, ukwingilishiwako ukufuma kuli 1 ukufika kuli 2.5 pa bantu 100,000 pa kati ka 1975 na 1985. Mu fyalo fyalunduluka ukwingilishiwako pa ciputulwa ca nshita cimo cine kwali ukufuma mu kucepako pali 3 ukufika ukucila pali 3.5.

Imisoka yaampana ne miti ikola: Icitabo cilandapo ukuti: “Ukupuminkanya ubukwebo bukalamba ubwa bufumfuntungu mu cine cine kuti kwakwata indalama ishingi kabili ukucila pa Makamfulumende ya nko shinono, kabili ukufika pali ino nshita baliba na maka ya kucilikila icibindo no kubombesha kwa kubomfya ifunde ukwa fyalo fyalunduluka mu fya maindastri.”

Icipimo conse pamo ica misoka: Cileenekelwa ukufushiwako imiku ibili ukufuma pali 4,000 pa bantu 100,000 mu 1985 ukufika mupepi na 8,000 mu mwaka wa 2000.

Ukwingilishiwako kwa mu cibulungwa conse mu misoka kwaba fye lubali lumo ulwa busesemo bwa kwa Yesu ukulangilila ifyo tuleikala mu “kupwa kwa pano isonde.” (Mateo 24:3) Yesu asosele ukuti: “Ilyo mukamona ifi fintu fileisa, ishibeni ukuti ubufumu bwa kwa Lesa buli mupepi.”—Luka 21:31.