Bushe Uleibukisha?

Bushe walitontonkanyapo mu kusakamanishisha pali bamagazini ba Ulupungu lwa kwa Kalinda abafumine nomba line? Kuti pambi wacisango kube ca buseko ukwibukisha ifyakonkapo:

◻ Ni shani fintu umuntu ‘esa kuli Yesu’ mu kumfwana no bwite bwakwe ubwa pali Mateo 11:28?

Yesu atile: “Umuntu nga afwayo kunkonka pa numa, aikaanye, asende ne [cimuti cakwe ica kucushiwilwapo, NW], no kunkonka.” (Mateo 16:24) E ico, ukwisa kuli Yesu kulangilila ukunashisha ukufwaya kwa umo ku kufwaya kwa kwa Lesa na Kristu, ukupokelela icipe cimo ica cishingamo no kucite co mu kutwalilila.—8/15, ibula 17.

◻ Mulandu nshi “abanono” fye e basanga ‘inshila ya kamfyemfye iitwala ku mweo’ iyo Yesu alumbwile pali Mateo 7:13, 14?

Inshila ya kamfyemfye yaba iyakosa pa kubamo amafunde ya kwa Lesa ne fishinte. E ico, kuti yacebusha fye umuntu uulefwaisha mu kufumaluka ukulinganya ubumi bwakwe ne fipimo fya kwa Lesa. Nangu cingati imoneka ukuba iyakosa, ‘inshila ya kamfyemfye’ ilenga umuntu ukulubuka mu milandu iili yonse iyacindama. Imipaka ya iko yaimikwa na “malango ayatuntulu aya buntungwa.” (Yakobo 1:25)—9/1, ibula 5.

◻ Ni shani fintu umucetekanya wingalundululwa?

Umucetekanya tawisako mu kwanguka nelyo mu cifyalilwa fye. Lelo mu kuba no kutekanya, ipepo, ukubombesha kwafumaluka, ukubishanya kusuma, ukusambilila Baibolo no kwetetula pali yene, no kushintilila pa mupashi wa mushilo uwa kwa Yehova, umucetekanya kuti walundululwa.—9/1, ibula 21.

◻ Ni mu nshila nshi umo akalumwa ka buntunse kengabombela imifwaile isuma?

Kuti kasesha umuntu ku kucingilila uo atemwa ukumufumya ku kusonga kwabipa. Mu kulundapo, abantunse mu kulinga kuti balanga akalumwa kuli Yehova no kupepa kwakwe. (1 Ishamfumu 19:10)—9/15, amabula 8, 9.

◻ Ni mwi muntu inumbwilo ya pa Ukutendeka 50:23 yalola ukukuma ku fishikulula fya kwa Yosefe ilyo kutila: “Bapaapilwe pa makufi ya kwa Yosefe”?

Ici kuti capilibula fye ukuti Yosefe alipokelele abo bana nge ntuntuko shakwe. Kuti na kabili calangilila ukuti aleangala na bana mu citemwishi, ukubasunsuntila pa makufi yakwe. Bashibo ilelo kuti bacita bwino nga bengalanga abana babo icitemwishi capalako.—9/15, amabula 20, 21.

◻ Cinshi cacindamisha pa kuti icupo no bumi bwa lupwa fitunguluke?

Pa kuti banonke ifyo fya kufumamo fyafwaikwa, abaupana bafwile lyonse ukutangisha ukufwaya kwa kwa Lesa intanshi. Abaupana abacite fyo, balesha ukwikalilila capamo no kupikulula impika shabo ukupitila mu kubomfya ukufunda kwa Cebo ca kwa Lesa. Muli fyo balasengauka ifya kukalifya umutima ifyalekanalekana ififumamo nga ca kuti ukufwaya kwa kwa Lesa kwasuulwa. (Ilumbo 19:7-11)—10/1, ibula 11.

◻ Lyaba shani ilyakakala ilelo ipamfya lya bukapepa?

Ipamfya lya bukapepa lyaba lubali lwacindama ulwa mulimo wa mweo onse kuli Yehova. Lilatamya no kwaafwa ukufumyapo ukwesha kwa kwa Kaseebanya ukwa kulenga ababomfi ba kwa Lesa ‘ukunaka no kuba abatompoke mitima.’ (AbaHebere 12:3) Ipamfya lilatucingilila ukukanayobekamo mu calo no kutemwa ifikwatwa kwa ciko ukwa kukopeka, ukusungilila imintontonkanya yesu pa fintu fya ku muulu—“umweo uwabo mweo wine wine.” (1 Timote 6:19)—10/1, ibula 28.

◻ Mu mulumbe wa mpaanga ne mbushi, ni lilali Yesu ekala pa cipuna cakwe ica bufumu kabili mulandu nshi? (Mateo 25:31-33)

Umulumbe taumulondolola ngo waikala pa cipuna mu mano ya kube Mfumu. Ukucila, ekala pa cipuna pamo nga Kapingula. Uko kupingula takuli cintu cimo icingatwalilila pa ciputulwa catanunuka ica myaka iingi. Ukucila, umulumbe ulosha ku nshita ya ku ntanshi lintu Yesu mu nshita yapimwa akapingula no kuputunkanye nko.—10/15, amabula 22, 23.

◻ Bushe “inkulo” Yesu alosesheko libili libili nga nshi yaba cinshi?

Yesu abomfeshe inumbwilo “inkulo ino” ku cinabwingi ca bantu mu kuba ne “ntungulushi mpofu” abapangile uluko lwa ciYuda. (Mateo 11:16; 15:14; 24:34)—11/1, ibula 14.

◻ Mu kufikilishiwa kwa kupelako ukwa busesemo bwa kwa Yesu pali Mateo 24:34-39, ni kuli cinshi inumbwilo “inkulo ino” ilosha?

Mu kumonekesha Yesu alosha ku bantu na bantu aba pe sonde abaamona icishibilo ca kubapo kwa kwa Kristu lelo abafilwa ukuwamya nshila shabo.—11/1, amabula 19, 31.

◻ Ni shani fintu imitantikile ya mishi ya kushinamo ne fibindo fya iko fyanonseshe abantu muli Israele wa pa kale?

Yaebekeshe abena Israele ukuti tabalingile ukuba aba mulekelesha nelyo abashayangwako pa lwa bumi bwa buntunse. Na kabili yakomaile pa kukabila kwa kulanga inkumbu lintu ukucite fyo kuli ukwalinga. (Yakobo 2:13)—11/15, ibula 14.

◻ Cinshi calepashanishiwa ku mushi wa kushinamo?

Ici caba kupayanya kwa kwa Lesa ukwa kutucingilila ku mfwa pa kutobe funde lyakwe pa lwa kushila kwa mulopa. (Ukutendeka 9:6)—11/15, ibula 17.

◻ Ni shani fintu bumunyina bwa Bwina Kristu bwingatwaafwa ‘ukupepemuka amaka’? (Esaya 40:31)

Pa kati ka bamunyinefwe ne nkashi aba Bwina Kristu, palibapo bamo abo pambi abalelolenkana no kutitikisha kwapalako ne fya kwesha kabili abengalakumanya ukuyumfwa ukupala kuntu tukumanyako. (1 Petro 5:9) Cilapembesula no kukoshe citetekelo ukwishiba ukuti cintu tulepitamo ca lyonse no kuti ukuyumfwa kwesu kwa cifyalilwa.—12/1, amabula 15, 16.