“Mube Abaiteyanya”
1 Mu kusesema kwakwe ukukalamba pa lwa mpela ya bwikashi buno, Yesu asokele pa kukanaobelwa ne fintu fya lyonse ifya mu bumi. (Mat. 24:36-39; Luka 21:34, 35) Apo ubucushi bukalamba kuti bwatendeka pa nshita iili yonse, tufwile ukumfwila ukukonkomesha kwa kwa Yesu ukutila: “Mube abaiteyanya, pantu pa nshita mushenekele, e po Umwana wa muntu akesa.” (Mat. 24:44) Cinshi cingatwafwa ukucite ci?
2 Ukucincintila Amasakamika ne fya Kupumbula: Iciteyo ca ku mupashi cimo tulingile ukuibakako “masakamika ya mikalile.” (Luka 21:34) Mu fyalo fimo, ubupiina, ubulofwa, no kunina kwa mitengo ya fintu kulenga cileafya ukukwata ififwaikwa mu mikalile. Mu fyalo fimbi, calyanguka ukunonka ifikwatwa. Nga ca kuti twalasakamikwa sana pa kunonka ifikwatwa fya ku mubili, ninshi kuti twafilwa ukutontomesha pa fya cine cine ifya Bufumu. (Mat. 6:19-24, 31-33) Ukulongana kwa Bwina Kristu kutwafwa ukutwalilila ukutontomesha pa fya cine cine fya Bufumu. Bushe mulemika ubuyo bwa kusangwa ku kulongana konse?—Heb. 10:24, 25.
3 Mu calo leelo mwaba ifya kupumbula ifingi ifingatupwishisha inshita yacindama. Ukubomfya kompyuta kuti kwaba citeyo nga ca kuti umuntu alepoosa inshita ikalamba ukulamona ifya pa Intaneti, ukubelenga no kutuma amakalata ya E-mail, nelyo ukwangala ifyangalo fya pa kompyuta. Inshita ikalamba kuti yaonaika ku kutamba televishoni, amafilimu, ukucita ifya kuleseshamo icitendwe, ukubelenga ifya ku calo, na ku kwangala ifyangalo. Ici kuti calenga twashala fye ne nshita inono kabili ukwabula na maka ya kucita ifya ku mupashi. Nangula ukukokoloka no kutuushako kuti kwatupembesulako, isambililo lya Baibolo ilya pa lwesu ne lya lupwa kuti fyatunonsha umuyayaya. (1 Tim. 4:7, 8) Bushe mulalubulako inshita ya kwetetula pa Cebo ca kwa Lesa cila bushiku?—Efes. 5:15-17.
4 Tulatasha nga nshi pa kuti ukuteyanya kwa kwa Yehova kwalipekanya programu wa kutusambilisha ifya ku mupashi ifya kutwafwa ‘ukupusuka kuli fyonse ifikacitika, no kwiminina ku cinso ca Mwana wa muntu’! (Luka 21:36) Shi natushukile fyonse ifi fyapekanishiwa no ‘kuba abaiteyanya’ pa kuti icitetekelo cesu “cikasangwe ica kulenga ukulumbanya no bukata no mucinshi pa kusokololwa kwa kwa Yesu Kristu.”—1 Pet. 1:7.