Mule-enda nge fyo Yesu Kristu Aendele
“Uutila aikalilila muli [Lesa] afwile no kulaenda ifyo wene [Yesu] aendele.”—1 Yohane 2:6.
1, 2. Finshi fyabimbwamo mu kutonta amenso pali Yesu?
UMUTUMWA Paulo alembele ukuti: “Tubutuke no kushipikisha ulubilo ulwabikwa pa ntanshi yesu, ilyo tuletonta amenso ku Mwiminishi Mukalamba kabili Kawaminisha wa citetekelo cesu, Yesu.” (AbaHebere 12:1, 2) Pa kuba ne citetekelo tukabila ukutonta amenso kuli Yesu Kristu.
2 Ishiwi lya ciGriki ilyapilibulwa ukuti “ukutonta,” ilyabomfiwa mu Malembo ya Bwina Kristu aya ciGriki lipilibula “ukulolesha fye pa cintu cimo.” Icitabo cimo calandapo ukuti: “Lintu fye umuGriki uwalebutuka ulubilo apumbulwa no kutendeka ukulolesha abantu abaletamba uko alecimfyanya, calelenga ukuti anasheko ulubilo. E fyo caba na ku Bena Kristu.” Ukupumbulwa kuti kwacilikila ukulunduluka kwesu ukwa ku mupashi. Tulingile ukutonta amenso kuli Yesu Kristu. Nomba mulandu nshi tutontela amenso yesu ku Mwiminishi Mukalamba? Amashiwi ya ciGriki ayapilibulwa ukuti “umwiminishi mukalamba” yapilibula ukuti “intungulushi ikalamba, iitungulula muli fyonse kabili yaba ca kumwenako.” Kanshi, ukutonta amenso pali Yesu kupilibula ukukonka ica kumwenako cakwe.
3, 4. (a) Finshi tulingile ukucita pa kuti tule-enda nge fyo Yesu aendele? (b) Mepusho nshi tulingile ukutontonkanyapo?
3 Baibolo itila: “Uutila aikalilila muli [Lesa] afwile no kulaenda ifyo wene [Yesu] aendele.” (1 Yohane 2:6) Tulingile ukwikalilila muli Lesa pa kulabaka amafunde ya kwa Yesu nge fyo na o alebaka amafunde ya kwa Wishi.—Yohane 15:10.
4 Apo Yesu e Ntungulushi Ikalamba, kanshi, ukwenda nge fyo Yesu aendele kupilibula ukumona ifyo alecita no kulaibikilishako ukukonka bwino bwino mu ntampulo shakwe. E co amepusho yacindama ayo tulingile ukutontonkanyapo ni aya: Bushe Kristu atutungulula shani muno nshiku? Bushe ukwenda ifyo aendele kuti kwatukuma shani? Busuma nshi bwaba mu kukonka icipasho Yesu Kristu atwimikile?
Ifyo Kristu Atungulula Abakonshi Bakwe
5. Ilyo ashilaya ku muulu, bulayo nshi Yesu alaile abakonshi bakwe?
5 Lintu Yesu Kristu abuushiwe, ilyo ashilaya ku muulu amoneke ku basambi bakwe no kubapeela umulimo uwacindama. Atile: “E ico kabiyeni, kalengeni aba nko shonse ukuba abasambi.” Pali ilya ine nshita Intungulushi Ikalamba yalibalaile no kuti yakulaba na bena ilyo balebomba umulimo wabo. Yatile: “Moneni! nakulaba na imwe inshiku shonse ukufika na ku mpela ya bwikashi.” (Mateo 28:19, 20) Bushe Yesu Kristu aba shani na bakonshi bakwe muli shino nshita sha mpela?
6, 7. Bushe Yesu atutungulula shani ukupitila mu mupashi wa mushilo?
6 Yesu atile: “Kaafwa, umupashi wa mushilo, uo Tata akatumina mwi shina lyandi, wene ukamusambilisha fyonse no kumwibukisha fyonse ifyo namwebele.” (Yohane 14:26) Na muno nshiku, umupashi wa mushilo uwatuminwe mwi shina lya kwa Yesu, ulatutungulula no kutukosha. Ulatusanikila lwa ku mupashi no kutwafwa fye ukwishiba “ifyashika fya kwa Lesa.” (1 Abena Korinti 2:10) Na kabili imibele ya bukapepa pamo ngo “kutemwa, ukusekelela, umutende, ukushishimisha, icikuuku, ubusuma, icitetekelo, ukufuuka, [no] kuilama” yaba “fisabo fya mupashi.” (Abena Galatia 5:22, 23) Umupashi wa mushilo nga watwafwa kuti twalundulula iyi mibele.
7 Ilyo tubelenga Baibolo no kutukusha ukucita ifyo tusambilila, umupashi wa kwa Yehova ulatwafwa ukukula mu mano, mu mucetekanya, mu kwiluka, mu kwishiba, mu bupingushi, na mu bupanda. (Amapinda 2:1-11) Na kabili umupashi wa mushilo ulatwafwa ukushipikisha amatunko na mesho. (1 Abena Korinti 10:13; 2 Abena Korinti 4:7; Abena Filipi 4:13) Abena Kristu bacincishiwa ‘ukuisangulula kuli fyonse ifikowesha umubili no mupashi, pa kuti babe abafishapo bumushilo.’ (2 Abena Korinti 7:1) Ukwabula umupashi wa mushilo teti tube na bumushilo ukulingana ne fyo Lesa afwaya, kabili teti tube abasanguluka. Inshila imo iyo Yesu atutungulwilamo muno nshiku, kupitila mu mupashi wa mushilo uo Yehova Lesa asuminisha Umwana wakwe ukubomfya.—Mateo 28:18.
8, 9. Bushe Kristu abomfya shani “umusha wa cishinka kabili uwashilimuka” ukutungulula icilonganino?
8 Moneni inshila na imbi iyo Yesu atungulwilamo icilonganino muno nshiku. Ilyo Yesu alelanda pa kubapo kwakwe na pa mpela ya bwikashi, atile: “Nga kanshi nani umusha wa cishinka kabili uwashilimuka uo shikulu wakwe alaashike pa ba mu ng’anda yakwe, ku kubapeela ifya kulya fyabo pa nshita yalinga? Wa nsansa ulya musha nga shikulu wakwe pa kwisa amusanga alecita ifyo! Ndemwebe cine cine nati, akamulaasa pa fikwatwa fyakwe fyonse.”—Mateo 24:3, 45-47.
9 “Shikulu” ni Yesu Kristu. “Abasha” libumba lya Bena Kristu basubwa abacili pe sonde. Ibumba lya musha lyapeelwa umulimo wa kusakamana ifikwatwa fya kwa Yesu ifya pe sonde no kupekanya ifya kulya fya ku mupashi pa nshita yalinga. Bakangalila bafikapo abanono ukufuma mwi bumba ilya “musha wa cishinka kabili uwashilimuka” bapanga Ibumba Litungulula. Abapanga Ibumba Litungulula bemininako ibumba ilya musha wa cishinka kabili e batungulula umulimo wa kushimikila pa Bufumu mwi sonde lyonse no kupekanya ica kulya ca ku mupashi pa nshita yalinga. E ico, Kristu atungulula icilonganino ukupitila mu “musha wa cishinka kabili uwashilimuka,” e kuti Bena Kristu basubwa no mupashi wa mushilo e lyo na mwi Bumba Litungulula ilya uyu musha wa cishinka kabili uwashilimuka.
10. Bushe tulingile ukulamona shani baeluda, kabili mulandu nshi?
10 Na mumbi umo Kristu atungulwila icilonganino ni mu “fya bupe mu bantu,” baeluda ba Bwina Kristu, nangu bakangalila. Aba baume bapeelwa “ku kulungika aba mushilo, ku mulimo wa kupyungila, ku kukuula umubili wa kwa Kristu.” (Abena Efese 4:8, 11, 12) Ukulanda pali aba baume, AbaHebere 13:7 batila: “Ibukisheni abalemutungulula, abalanda icebo ca kwa Lesa kuli imwe, kabili pa kumona umwalola imyendele yabo, pashanyeni icitetekelo cabo.” Baeluda e batungulula mu cilonganino, apo bapashanya Kristu Yesu, twalinga ukupashanya icitetekelo cabo. (1 Abena Korinti 11:1) Kuti twalanga ukuti tulatasha ukulatungululwa na baeluda nga ca kuti tuleumfwila no kunakila ifi “fya bupe mu bantu.”—AbaHebere 13:17.
11. Ni nshila nshi Kristu atungulwilamo abakonshi bakwe muno nshiku, kabili finshi fyabimbwamo mu kulaenda nge fyo aendele?
11 Ca cine, muno nshiku, Yesu Kristu atungulula abakonshi bakwe ukupitila mu mupashi wa mushilo, mu “musha wa cishinka kabili uwashilimuka,” na muli baeluda ba mu cilonganino. Pa kuti twende nge fyo Kristu aendele, tulingile ukwishiba inshila atutungulwilamo no kulanakila iyo nshila. Na kabili cipilibula no kuti tulepashanya ifyo aendele. Umutumwa Petro alembele ukuti: “Ni kuli iyi mibele mwaitilweko, pantu na Kristu aculiile imwe, pa kumushila ica kumwenako ukuti mukonke bwino bwino mu ntampulo shakwe.” (1 Petro 2:21) Bushe ukukonka icipasho ca kwa Yesu icapwililika kutulenga ukuba abantu ba musango shani?
Muleba no Mutembo Ilyo Mulebomfya Amaka
12. Ni muli cinshi umo baeluda balingile ukubikako amano ukupashanya Kristu?
12 Nangu ca kuti Yesu alipeelwe amaka ayengi nga nshi kuli Wishi, aleyabomfya mutembo mutembo. Bonse mu cilonganino, sana sana bakangalila, balingile ukuleka ‘umutembo wabo ukwishibikwa ku bantu bonse.’ (Abena Filipi 4:5; 1 Timote 3:2, 3) Apo baeluda balikwatako amaka mu cilonganino, balingile ukukonka sana mu ntampulo sha kwa Kristu ilyo baleyabomfya.
13, 14. Bushe baeluda kuti bapashanya shani Kristu ilyo balekoselesha bambi ukulabombela Lesa?
13 Yesu aletontonkanya na pa fyo abasambi bakwe bapelebele. Talefwaya ukuti bacite ifyo bashingakumamo ukucita. (Yohane 16:12) Talebapatikisha, lelo abakoseleshe ‘ukupilikita’ mu kucita ukufwaya kwa kwa Lesa. (Luka 13:24) Alebakoselesha ukupitila mu ca kumwenako cakwe e lyo na mu kubacincisha. Ukupalako, baeluda ba Bwina Kristu aba muno nshiku tabapatikisha bambi ukubombela Yehova kabili tababalenga ukuyumfwa aba mulandu. Lelo, babakoselesha ukubombela Yehova pa mulandu wa fyo bamutemwa ne fyo batemwa Yesu ukusanshako fye na bantu banabo.—Mateo 22:37-39.
14 Yesu tabomfeshe amaka yakwe bubi bubi, ukulaeba abantu fyonse ifyo bali no kucita. Kabili, taimikile abantu ifya kucita nelyo ukubapeela amafunde yakukonka ayengi nga nshi. Ifyo alecita pa kucincisha abantu, kubafika pa mutima ukubomfya ifishinte fya mafunde yapeelwe ukupitila muli Mose. (Mateo 5:27, 28) Pa mulandu wa kuti baeluda bapashanya Yesu Kristu, tabaipangila amafunde yabo nelyo ukupatikisha abantu ukucita ifyo bena baletontonkanya. Pa kufunda abantu ifyo balingile ukuipempenkanya nelyo ukwangala ne fya kusala ifya kusekesha, baeluda babomfya ifishinte fya mu Baibolo pamo nge fi fisangwa pali Mika 6:8; 1 Abena Korinti 10:31-33; na pali 1 Timote 2:9, 10 pa kuti bafike abantu pa mitima.
Mulelangulukilako Kabili Mule-elela
15. Bushe Yesu alecita shani ilyo abasambi bakwe balelufyanya?
15 Kristu alitushilile icipasho ca kukonka na mu fyo alesunga abasambi bakwe nga balufyanya. Tontonkanyeni pa fintu fibili ifyacitike pa bushiku alekeleshe ukuba pe sonde. Ilyo bafikile pa Getsemane, Yesu “asendele Petro na Yakobo na Yohane baye nankwe” kabili abebele ukuti ‘balelola.’ E lyo, “cilya aya akatalamukila, awa pa nshi, alapepa.” Ilyo abwelele, ‘asangile nabalaala.’ Bushe Yesu acitile shani? Atile: “Umutima wena ulefwaisha, lelo umubili naunaka.” (Marko 14:32-38) Mu nshita ya kuti abakalipile, alibalangulukileko! Pali bulya bwine bushiku, Petro akeene Yesu imiku itatu. (Marko 14:66-72) Cinshi Yesu aishilecita kuli Petro pa numa? Baibolo itila: “Shikulu nabuushiwa kabili namoneka kuli Simone [Petro]!” (Luka 24:34) “Amoneke kuli Kefa, e lyo ku be kumi na babili (12).” (1 Abena Korinti 15:5) Mu nshita ya kuti Yesu afulilwe Petro, alimwelela no kumukoselesha. Na pa numa, Yesu apeele Petro umulimo uukalamba nga nshi.—Imilimo 2:14; 8:14-17; 10:44, 45.
16. Bushe kuti twaenda shani nge fyo Yesu aendele nga ca kuti uwasumina munensu atulufyanya?
16 Kanshi, abasumina banensu nga batulufyanya pa mulandu wa kukanapwililika, tufwile ukubalangulukilako no kubelela nge fyo Yesu acitile. Petro akonkomeshe abasumina banankwe ukuti: “Bonse mube aba mutima umo, abalangulukilana, abatemwa aba bwananyina, aba nkumbu, aba mitima ya kuiceefya, abashibwesesha bubi pa bubi atemwa icituko pa cituko, lelo, mulepaala, pantu mwaitiilwe kuli iyi mibele, pa kuti mukapyane ipaalo.” (1 Petro 3:8, 9) Nomba, tutile umuntu umbi akaana ukutulangulukilako no kutwelela nga fintu Yesu acitile, bushe kuti twacita shani? Nangu ni lintu cabe fyo, tufwile ukupashanya Yesu no kucita nge fyo wena engacita.—1 Yohane 3:16.
Bikeni Amano ku fya Bufumu
17. Cinshi cilanga ukuti Yesu alicindamike sana ukucita ukufwaya kwa kwa Lesa?
17 Kuliko inshila na imbi iyo twingendelamo nge fyo Yesu aendele. Ukubila imbila nsuma ya Bufumu bwa kwa Lesa kwalicindeme sana kuli Yesu. Ilyo ashimikile ku mwanakashi umwina Samaria mupepi no musumba wa Sukari, Yesu aebele abasambi bakwe ukuti: “Ica kulya candi kucito kufwaya kwa wantumine no kupwisho mulimo wakwe.” (Yohane 4:34) Ukucita ukufwaya kwa kwa Wishi kwaletungilila Yesu; kwalemwikusha no kumupembesula kwati fye fya kulya. Ala ukubika amano ku kucito kufwaya kwa kwa Lesa nge fyo Yesu acitile kulaleta insansa sha cine cine!
18. Mapaalo nshi yaba mu kukoselesha abana ukubombako umulimo wa nshita yonse?
18 Nga ca kuti abafyashi bakoselesha abana ukutendeka ukubomba umulimo wa nshita yonse, bena pamo na bana babo bakapaalwa. Umufyashi umo alekoselesha abana bakwe bampundu ukuti nga bakula bakabombeko bupainiya. Ilyo bapwile amasukulu, aba balumendo baishileba bapainiya. Ukulanda pa nsansa akwata, uyu mufyashi alembele ukuti: “Abana besu tabatulenga ubulanda. Tulatasha ica kuti kuti twatila, ‘Abana baume cikwatwa icafuma kuli Yehova.’” (Amalumbo 127:3) Nga bana bena, bushe banonkelamo shani mu kubomba umulimo wa nshita yonse? Umufyashi uwakwata abana basano atila: “Bupainiya bwalyafwa abana bandi bonse ukupalama kuli Yehova, bwalibafwa ukwishiba ifya kubomfya bwino inshita, kabili bwalibafwa ukubika amano ku fya ku mupashi. Nangu ca kuti bonse bali-ipuswileko muli fimo fimo, tapaba nangu umo uutontonkanya ukuti alyonaula inshita pa kubombako bupainiya.”
19. Finshi imisepela balingile ukutontonkanyapo ukucita nga bakula?
19 Mwe misepela, finshi mufwaya ukucita nga mwakula? Bushe mufwaya ukusambilila sana? Nangu mufwaya ukuti mukabombeko umulimo wa nshita yonse? Umutumwa Paulo afundile ukuti: “Cenjeleni ukuti ukwenda kwenu takuli ngo kwa bawelewele iyo kano nga ba mano, ukuilubwile nshita mwe bene, pantu ishi nshiku sha bubifi.” Kabili atwalilile ukuti: “Pali uyu mulandu mwiba abashashilimuka, lelo mulekutuluka icabo kufwaya kwa kwa Yehova.”—Abena Efese 5:15-17.
Beni aba Cishinka
20, 21. Ni muli finshi Yesu aali uwa cishinka, kabili kuti twamupashanya shani?
20 Pa kwenda nge fyo Yesu aendele tufwile no kupashanya bucishinka bwakwe. Baibolo ilanda pali bucishinka bwa kwa Yesu ukuti: “Nangu ca kutila aali mu cipasho ca kwa Lesa, tatontonkenye ulwa kusompole ci, ukuti alingane na Lesa. Iyo, lelo aisangwile uwa fye no kubuule cipasho ca busha kabili aishileba mu cipasho ca bantu. Lelo, ilyo aisangile mu mibele ya buntu, aliiceefeshe kabili aishileba uwa cumfwila ukufika na ku mfwa, awe ukufika ku mfwa pa cimuti.” Muli bucishinka Yesu atungilile bumulopwe bwa kwa Yehova ilyo anakile ku kucita ukufwaya kwa kwa Lesa. Yesu aali uwa cumfwila ukufika fye na lintu afwile pa cimuti. Na ifwe bene, tulingile ‘ukuba no yu mutima’ no kulanakila ku kucita ukufwaya kwa kwa Lesa.—Abena Filipi 2:5-8.
21 Na kabili Yesu ali uwa cishinka ku batumwa bakwe abali aba cishinka kuli wena. Te mulandu no kukanapwililika na fintu balelufyanya, Yesu alibatemenwe “ukufika na ku mpela.” (Yohane 13:1) E fyo na ifwe tufwile ukuba, tatulingile ukulalengulula bamunyinefwe pa mulandu wa kukanapwililika kwabo.
Konkeni Icipasho ca kwa Yesu
22, 23. Kuti twamwenamo shani mu kukonka icipasho ca kwa Yesu?
22 Apo tatwapwililika, te kuti twende nga filya fine fye Kristu uwapwililika aendele. Na lyo line, kuti twatukusha ukukonka mu ntampulo shakwe. Pa kucite fyo, tukabila ukwishiba no kunakila inshila Kristu atutungulwilamo no kulakonka sana icipasho cakwe.
23 Ukupashanya Kristu kulaleta amapaalo ayengi nga nshi. Imikalile yesu ilawama sana kabili tulaba aba nsansa pantu tubika amano ku kucita ukufwaya kwa kwa Lesa ukucila ifyo tulefwaya. (Yohane 5:30; 6:38) Twalikwata kampingu uwasanguluka. Bambi balapashanya imyendele yesu. Yesu aitile bonse abalecucutika kabili abafinininwe ukwisa kuli wena pa kuti apuupuutule imyeo yabo. (Mateo 11:28-30) Nga twakonka ica kumwenako ca kwa Yesu, na ifwe bene kuti twapuupuutula abo tuleyampana nabo. Kanshi, shi natutwalilile ukulaenda nge fyo Yesu aendele.
Bushe Muleibukisha?
• Bushe Kristu atungulula shani abakonshi bakwe muno nshiku?
• Bushe baeluda kuti bapashanya shani ubutungulushi bwa kwa Kristu ilyo balebomfya amaka Lesa abapeela?
• Kuti twapashanya shani Yesu ilyo tuleesha ukulungika ifilubo fya bambi?
• Bushe imisepela kuti yabika shani amano ku fya Bufumu?
[Icikope pe bula 23]
Baeluda ba Bwina Kristu balatwafwa ukulakonka ubutungulushi bwa kwa Kristu
[Ifikope pe bula 24, 25]
Mwe misepela, finshi mulepanga ukucita pa kuti mukaipakishe imikalile isuma iya Bwina Kristu?