Bushe Umusha wa Cishinka Kabili Uwashilimuka ni Nani?

Ilyo Yesu aali mupepi no kufwa, alanshenye na basambi bakwe bane ku mbali. Na aba ni Petro, Yakobo, Yohane, na Andrea. Ilyo alebeba pa fya kwishibilako ukubapo kwakwe mu nshiku sha kulekelesha, aipwishe icipusho cacindama ica kuti: “Nga kanshi nani umusha wa cishinka kabili uwashilimuka uo shikulu wakwe asontele ukuba kangalila pa ba mu ng’anda yakwe, pa kuti alebapeela ifya kulya fyabo pa nshita yalinga?” (Mateo 24:3, 45; Marko 13:3, 4) Ico Yesu aleeba abasambi bakwe ca kuti, apo ali “shikulu” wabo, ali no kusala abali no kulapeela abasambi bakwe ifya kulya mu nshita ya ku mpela. Ni bani bapanga umusha wa cishinka?

Libumba ilinono ilya Bena Kristu abasubwa no mupashi. “Umusha” libumba ilinono ilya bamunyina abasubwa ababa mwi Bumba Litungulula ilya Nte sha kwa Yehova. “Umusha” alapeela bakapepa banankwe ifibafwa ukusambilila pali Yehova.Uyu umusha wa cishinka, e utupeela “ifya kulya pa nshita yalinga.”—Luka 12:42.

Balasunga aba mu ng’anda ya kwa Lesa. (1 Timote 3:15) Yesu alipeele umusha wa cishinka umulimo uukalamba uwa kusakamana icilonganino ca kwa Yehova pano calo. Umusha alasakamana ifikwatwa, alatungulula umulimo wa kushimikila, e lyo no kutusambilisha ukupitila mu filonganino fyesu. E ico pa kutupeela ifyo tukabila pa nshita tulefikabila, “umusha wa cishinka kabili uwashilimuka” alatusambilisha ifya kwa Lesa ukupitila mu ifitabo na magazini ifyo tubomfya pa kushimikila, e lyo no kupitila mu malyashi yabako pa kulongana kwa cilonganino na pa kulongana kukalamba.

Uyu musha, wa cishinka pantu alakonka bwino bwino icine ca mu Baibolo, e lyo alabomba bwino umulimo wa kushimikila imbila nsuma. Kabili alishilimuka pantu alasakamana bwino sana ifya kwa Kristu pano calo. (Imilimo 10:42) Yehova alapaala umulimo uo uyu musha abomba kabili aleafwa abengi ukuba Inte Shakwe.—Esaya 60:22; 65:13.

• Ni nani Yesu asontele ukupeela abasambi ifyakubafwa ukusambilila pali Lesa?

• Bushe umusha aba shani uwa cishinka kabili uwashilimuka?