Ubumi bwa kwa Yesu no Butumikishi
Ukushikitika mwi Bala
LINTU Yesu apwisha ukupepa, wene na batumwa bakwe aba citetekelo 11 baimba inyimbo sha malumbo kuli Yehova. Lyene baikila ukufuma pa muputule wa pa mulu, baisa mu mfifi yatalala iya bushiku, no kupita ukubwelela ku numa ukucilinganya Umukonko wa Kidrone ukulola ku Betani. Lelo mu nshila, baiminina pa ncende yawamisha, ibala lya Getsemane. Ili lyabela pa nelyo mupepi no Lupili lwa Miolife. Yesu pa nshita ishingi akumene na batumwa bakwe pano pa kati ka miti ya miolife.
Ukusha cinekonsekonse aba mu batumwa bakwe—napamo mupepi na pa bwingililo bwe bala—abakambisha ukuti: “Ikaleni pano, nsuke nje kulya ku kupepa.” Lyene asenda bambi batatu—Petro, Yakobo, na Yohane—kabili atwalilila ukuya mwi bala. Yesu aumfwa ubulanda kabili acushiwa nga nshi. “Kwafiite cibi ku mutima wandi, cikanga ne mfwa,” e fintu abeba. “Ikaleni pano, no kulola pamo na ine.”
Ukwenda ukuya ku ntanshi panono, Yesu aponena pa nshi kabili mu kuba ne cinso cakwe pa nshi atendeka ukupepa mu mukoosha ukuti: “Tata, nga cabe cingacitwa, lekeni ulukombo ulu lupitepo pali ine. Lelo, te ifyo ine ntemenwe kano ifyo imwe mutemenwe.” Cinshi apilibula? Mulandu nshi “kwafiite cibi ku mutima wandi, cikanga ne mfwa”? Bushe alekwinda ukufuma ku kupingulapo kwakwe ukufwa no kupayanya icilubula?
Nakalya! Yesu taleipusha ukulubulwa ukufuma ku mfwa. Nangu fye litontonkanyo lya kusengauka imfwa ya bulilambo, ilyo inshita imo lyatubulwilwe na Petro, lili ilishalinga kuli wene. Ukucila, ali mu kushikitika pa mulandu wa kuti inshila intu mu kwangufyanya alafwilamo—nge ntalamisoka yasenukwa—ikaleta umuseebanya pe shina lya kwa Wishi. Nomba amwensekesha ukuti mu maawala fye yanono alakobekwa pa cimuti ngo musango wabipisha uwa muntu—uupontela Lesa! Ici e camusakamika nga nshi.
Pa numa ya kupepa mu kutantalilako, Yesu abwela no kusanga abatumwa batatu nabasendama. Ukulanda kuli Petro, asoso kuti: “E fyo caba, mwafilwo kulola pamo na ine ora umo! Loleni no kupepa, ukuti mwiingila mu kweshiwa.” Ukwishibisha, nangu cibe fyo, ukutitikisha kuntu balimo no kupitingana kwe awala, asoso kuti: “[Umupashi, NW] wena naukosa, lelo umubili naunaka.”
Yesu lyene afumapo umuku walenga bubili no kwipusha ukuti Lesa afumyepo pali ena “lukombo ulu,” uko e kuti, ulubali lwapeelwa ulwa kwa Yehova, nelyo ukufwaya, kuli wene. Lintu abwela, na kabili asanga batatu nabasendama ilyo balingile ukulapepa ukuti beingila mu kweshiwa. Ilyo Yesu alanda kuli bene, tabeshibe ica kusosa mu kwasuka.
Mu kupelako, umuku walenga butatu, Yesu asomoka nge nkalo ya kupoosapo ilibwe, kabili uwafukama na mu kuba no kupunda ne filamba, apepo kuti: “Tata, nga mwafwaya, fumyeni pali ine ulukombo ulu.” Yesu mu kushika aumfwa ukukalipwa kwabipisha pa mulandu wa museebanya untu imfwa yakwe pamo nge ntalamisoka ikaleta pe shina lya kwa Wishi. Kwena, ukupingulwa ngo wa miponto—umo uutuka Lesa—cili icayafya nga nshi ukushipikisha!
Nangu ni fyo, Yesu atwalilila ukupepa ukuti: “Te ico ntemenwe ine, kano ico mutemenwe imwe.” Yesu mu kubamo icumfwila anashisha ukufwaya kwakwe ku kwa kwa Lesa. Pali ici, malaika ukufuma ku mulu amoneka no ku mukosha mu kuba na mashiwi yamo aya kukoselesha. Mu kupalako, malaika aeba Yesu ukuti nakwata ukusuminisha kwa kumwentula ukwa kwa Wishi.
Nalyo line, we cisendo cili pa mabeya ya kwa Yesu! Ubumi bwakwe bwine ubwa muyayaya no bo ubwa mushobo onse uwa buntunse nabukobekwa mu ca kulingo kufina. Ukutitikisha kwa mu nkuntu kuli ukukalamba. E co Yesu atwalililo kupepa mu mukoosha nga nshi, kabili amabe yakwe yaba kwati matoni ya mulopa lintu yaleponena pa nshi. “Nangu cingati ici cili cinjelengwe ca mu nshita mu nshita,” e fimona The Journal of the American Medical Association, “amabe ya mulopa . . . kuti pambi yacitikako mu mibele ya nkuntu yasumbukisha.”
Pa numa, Yesu abwela umuku walenga itatu ku batumwa bakwe, na kabili abasanga nabasendama. Nabafunshika ukufuma ku bulanda bukalamba. “Mucili mu tulo? muletusha? Epela! Inshita naifika; moneni, Umwana wa muntu afutukilwa mu minwe ya babembu. Imeni, natuleya; moneni, uulemfutuka napalama.”
Ilintu acili alelanda, Yuda Iskariote apalama, ukukonkwapo ne bumba ilikalamba nabasenda imyenge ne nyali ne fyanso. Mateo 26:30, 36-47; 16:21-23; Marko 14:26, 32-43; Luka 22:39-47; Yohane 18:1-3; AbaHebere 5:7.
◆ Pa numa ya kusha umuputule wa pa mulu, ni kwi Yesu atungulula batumwa, kabili cinshi acita kulya?
◆ Ilintu Yesu alepepa, cinshi abatumwa balecita?
◆ Mulandu nshi Yesu abelele mu kushikitika, kabili kwipusha nshi acita kuli Lesa?
◆ Cinshi calangililwa ku mabe ya kwa Yesu ukuba nga amatoni ya mulopa?