Bushe Muleibukisha?
Bushe mwalitesekesha bamagazini ba Ulupungu lwa kwa Kalinda aba nomba line? Cisuma, moneni nga kuti mwayasuka ifi fipusho:
◻ Fipusho nshi fimo Abena Kristu babili bengaipusha ilyo bashilatendeka ukutontonkanya pa kukobekelana?
‘Bushe nalishiba bwino bumupashi bwa uyu muntu no kuipeelesha kwakwe kuli Lesa? Bushe cine cine nkabombela Lesa pamo nankwe ubumi bwandi bonse? Bushe twalishibana sana utumisango tumo tumo? Bushe cine cine tukaba abayana mu kubelelela? Bushe twalishibanina ifingi ifya ku numa ne fya nomba?’—8/15, ibula 31.
◻ Bushe Yesu aloseshe mwi lintu aebele abakonshi bakwe ukuti: “Imwe muli mucele wa pano isonde”? (Mateo 5:13)
Yesu aloseshe mu kuti ukushimikilako bambi Ubufumu bwa kwa Lesa kwali no kukwata amaka ya kubakilila, nelyo ukupususha imyeo ya bakomfwa. Na kuba, abalebomfya amashiwi ya kwa Yesu bali no kucingililwa ku kubotelela kwa mibele no kubola kwa ku mupashi ifili pano isonde.—8/15, ibula 32.
◻ Ni shani fintu abaleishishanya bengasengauka iciteyo ca kucita ubulalelale?
Nga muletandashanya, cisuma ukukanaba mweka mu mibele ishalinga no yo mulefwaya ukupana nankwe. E co kuti cawama ilyo muleishishanya mwaba na bambi nelyo mwaba mu fifulo fya cintubwingi. Imikeni umwa kupelela ilyo mulelanga icitemwiko, umo na umo alingile ukucindika ifyo umbi aleyumfwa na kampingu wa munankwe.—9/1, amabula 17, 18.
◻ Bushe umucetekanya cinshi?
Umucetekanya maka ya kumfwikisha umulandu no kwiluka ifibimbilwemo ukupitila mu kutesekesha ifyo fyampene ku mulandu onse, pa kuti umo engeluka umo ulolele. (Amapinda 4:1)—9/15, ibula 13.
◻ Cinshi ico Yehova afwaya kuli ifwe ilelo?
Maka maka, Yehova afwaya tuleumfwa ku Mwana Wakwe no kukonka ica kumwenako cakwe ne fisambilisho. (Mateo 16:24; 1 Petro 2:21)—9/15, ibula 22.
◻ Ni bani fye beka bengakwata umutende ilelo?
Apo Yehova ni “Lesa wa mutende,” abengakwata umutende ni balya fye abatemwa Lesa kabili abacindikisha ifishinte fyakwe ifyalungama. (Abena Roma 15:33)—10/1, ibula 11.
◻ Ni kwi Yosefe afumishe ubukose bwa kukaanina muka Potifari akasuba na kasuba?
Yosefe akatamike isenge lyakwe na Yehova ukucila pa kuisekesha kwa pa kashita fye akanono. Kabili nangu ca kuti pali ilya nshita ifunde lya bulesa ninshi takulaba, Yosefe alyumfwikishe ifishinte fya mibele isuma. (Ukutendeka 39:9)—10/1, ibula 29.
◻ Kwacindama shani ukuba uwaitemenwa ukulekelela bambi?
Pa kuti Lesa engatwalilila ukutulekelela, kano na ifwe twaba abaitemenwa ukulekelela bambi. (Mateo 6:12, 14; Luka 11:4)—10/15, ibula 17.
◻ Ni membu sha musango nshi Mateo 18:15-17 alandapo, kabili cinshi cilangilila ifyo?
Imembu isho Yesu alelandapo shifwile shali ishikalamba ica kuti uwabembwike kuti amonwa “kwati Mwina fyalo kabili umusangushi.” AbaYuda tabalebishanya na Bena fyalo, kabili balesengauka abasangushi. E co Mateo 18:15-17 alosha ku membu ishikalamba, te ku filubo ifinono nelyo ukubifiwa uko mwingalekelela fye no kulabako. (Mateo 18:21, 22)—10/15, ibula 19.
◻ Cinshi cabimbwamo mu kutemwisha Icebo ca kwa Lesa?
Ukutemwa Icebo ca kwa Lesa kulenga umuntu ukukonka ifyo cifwaya. (Amalumbo 119:97, 101, 105) Ici cifwaya umuntu ukulateulula lyonse imitontonkanishishe yakwe ne mikalile.—11/1, ibula 14.
◻ Apo Yehova alitupeela ifingi, cinshi twingapeela Imfumu yakulisha kabili Kapeela?
Baibolo isokolola ukuti “ilambo lya malumbo,” e ca bupe cawamisha twingapeela Yehova. (AbaHebere 13:15) Mulandu nshi? Pa mulandu wa kuti ili lambo e lilepususha abantu, kabili lyaba cintu ico Yehova afwaisha muli ino nshita ya mpela. (Esekiele 18:23)—11/1, ibula 21.
◻ Solomone aloseshe mwi lintu alembele ukuti: “Ifyebo fya ba mano fili nge fya kusoswelako”? (Lukala Milandu 12:11)
Ifyebo fya bakwata amano ya bukapepa ficincisha bakabelenga nelyo bakakutika ukulunduluka mu kumfwana ne fyebo fya mano ifyo babelenga nelyo ukumfwa.—11/15, ibula 21.
◻ Umucetekanya wa bulesa cinshi?
Yaba maka ya kulekanya icalungama ku calubana kabili lyene ukusala inshila yalungama. Ukubomfya fintu mulesambilila mu Cebo ca kwa Lesa kulapeela umucetekanya.—11/15, ibula 25.
◻ Ukuba uwaitemenwa ukusumina ukubomba imilimo kulingile ukwendela pamo na cinshi? (1 Timote 3:1)
Kulingile ukwendela pamo no kupelulula kusuma. Tacingakabilwa umo ukusumina imilimo iingi ica kuti calenga alabomba umulimo wa kwa Yehova mu bulanda. Ukuba uwaitemenwa ukubomba imilimo kusuma, lelo ukuitemenwa kufwile na kabili ukulangilila ubupete no “mweo wa kutekanya.” (Tito 2:12; Ukusokolola 3:15, 16)—12/1, ibula 28.
◻ Amafya ya kukusha abana kuti yacimfiwa shani?
Lesa afunda abafyashi ukube fya kumwenako fisuma, aba bucibusa, abalanshanya, kabili abafundisha abana. (Amalango 6:6, 7)—12/1, ibula 32.