‘Imibili Iingi ya ba Mushilo Yalibuukile’
“ICALO calitenkene, ne fimabwe fyalilepwike, ne nshishi shaliiswike, ne mibili iingi ya ba mushilo abaleele yalibuukile; kabili bafumine mu nshishi pa numa ya kubuuka kwakwe, baile mu musumba wa mushilo no kumoneka ku bengi.” (Mateo 27:51-53) Uwasambilila uwa ciKatolika Karl Staab eta ici ca kuponako icacitike pa mfwa ya kwa Yesu “ica nkama nga nshi.” Cinshi cacitike?
Epiphanius na baShibo bambi abe Calici aba mu kubangilila basambilishe ukuti aba mushilo mu cine cine balishile ku bumi no kuya na Yesu wabuushiwa ku mulu. Augustine, Theophylactus, na Zigabenus basumine ukuti aba bafwa bapokelele ukubuuka kwa pa kashita akepi lelo pa numa babwelele ku nshishi shabo. Itontonkanyo lyalekelesheko, nangu cibe fyo, “talyanonkele ukwishibikwa kwa mu kusaalala,” e filandapo uwasambilila Erich Fascher. Pa kupilibula Mateo 27:52, 53, amabupilibulo ayengi aya mu nshiku sha nomba aya Baibolo yapeela imimwene ya kuti ukubuuka kwalicitike. Te fyo kuli New World Translation, iyo isonta ku fya kufumamo fya cinkukuma. Mulandu nshi?
Ica kubalilapo, te mulandu na “aba mushilo” fintu baali, Mateo tatile balibuukile. Atile imibili yabo, nelyo ifitumbi, e fyabuukile. Ica bubili, tatile iyi mibili yaishile ku bumi. Atile yalibuukile, kabili verbu wa ciGreek e·geiʹro, iipilibula “ukubuuka,” te lyonse ilosha ku kubuuka. Kuti, pa kati ka fintu fimbi, na kabili yapilibula ‘ukwimya’ ukufuma mu cilindi nelyo ‘ukwima’ ukufuma mu mushili. (Mateo 12:11; 17:7; Luka 1:69) Icimfulumfulu cikalamba pa mfwa ya kwa Yesu caiswile nshishi, ukupoosa imibili yafwa pa mbilibili. Ifya kucitika fya musango uyo mu kati ka cinkukuma fyalicitilwe lipoti mu mwanda wa myaka uwalenga ibili C.E. kuli kalemba umuGreek Aelius Aristides kabili na mu nshita ya nomba line, mu 1962, mu Colombia.
Iyi mimwene ya ca kuponako yumfwana no kusambilisha kwa Baibolo. Muli 1 Abena Korinti icipandwa 15, umutumwa Paulo apeela ubushinino bwa kubuuka, lelo asuulako umupwilapo Mateo 27:52, 53. E ficita na bakalemba bambi bonse aba Baibolo. (Imilimo 2:32, 34) Ifitumbi fyabuukile pa mfwa ya kwa Yesu te kuti fibwele ku bumi mu nshila Epiphanius atontonkanishishemo, pa kuti pa bushiku bwalenga shitatu pa numa ya ico, Yesu abeele “libeli ku bafuma ku bafwa.” (Abena Kolose 1:18) Abena Kristu basubwa, abetwa na bo “aba mushilo,” balailwe icakaniko mu kubuuka kwa ntanshi mu kati ka kubapo kwa kwa Kristu, te mu mwanda wa myaka uwa kubalilapo.—1 Abena Tesalonika 3:13; 4:14-17.
Abalandapo pali Baibolo abengi balikwata ubwafya ukulondolola icikomo ca 53, nangu cingatila abengi aba bene batubulula ukuti icikomo 52 cilondolola ukwisuka kwa nshishi ku cinkukuma no kusansalika ifitumbi fyashikwa ifipya. Ku ca kumwenako, uwasambilila umwina Germany Theobald Daechsel apeela ubupilibulo bwakonkapo: “Kabili ne nshishi shaliswike, ne fitumbi fya ba mushilo ifyalaala fyalimishiwe.”
Ni bani abo “baile mu musumba wa mushilo” pa ciputulwa ca nshita cikalamba pa numa, uko e kuti pa numa Yesu abe nabuushiwa? Nga fintu cimwenwe pa mulu, imibili yasansalikwa yatwalilile ukuba iyafwa, e co Mateo afwile ukulosha ku bantu abo batandalile nshishi no kuleta imbila ya ca kuponako mu Yerusalemu. Muli fyo, ukupilibula kwa New World Translation kulakusha ukumfwikisha kwa Baibolo kabili takufulunganya bakabelenga ukukuma ku kubuuka.