Amapepo Ayashininkishiwa Ukwasukwa

KWALIBAKO amapepo ayo mu kukanatwishika yakasukwa. Ukukatama kwa yene kwalangililwa mu cilangililo Yesu Kristu apeele abasambi bakwe lintu atile: “E ico imwe pepeni ifyo, amuti: Shifwe wa mu mulu, ishina lyenu [lishishiwe, NW]. Ubufumu bwenu bwise. Ukufwaya kwenu kucitwe pano nse nga mu mulu.”—Mateo 6:9-13.

Ayo mashiwi ye pepo lya cilangililo ilya kwa Yesu yalibwekeshiwapo imiku amamilioni ayengi. Nangula Kristu taenekele abakonshi bakwe aba cine ukusungila mu mutima ipepo lya musango uyo, ukupaapaata kwabo ukulumbulula amatontonkanyo yapalako kwashininkishiwa ukwasukwa. (Mateo 6:7, 8) E ico, cinshi cipilibula ukukwata ishina lya kwa Lesa ukushishiwa? Mulandu nshi uwa kupepela Ubufumu bwakwe ukwisa? Kabili mulandu nshi uwa kwipushisha ukufwaya kwa kwa Lesa ukucitwa?

“Ishina Lyenu Lishishiwe”

Yehova, “[uwapulamo] pano isonde ponse,” e Umo uo Yesu aitile pamo nga “Shifwe wa mu mulu.” (Ilumbo 83:18) Lesa ‘afyele’ abena Israele pa kubalubula ukufuma mu busha bwa Egupti na pa kwingila mu kwampana kwa cipingo na bene. (Amalango 32:6, 18; Ukufuma 4:22; Esaya 63:16) Ilelo, Abena Kristu basubwa bakwata umucinshi wabondoka kuli Yehova pamo nga Shibo. (Abena Roma 8:15) Kabili aba kubishanya nabo, abakwata isubilo lya pe sonde, mu musango umo wine bapepa kuli Yehova Lesa pamo nga Shibo.—Yohane 10:16; Ukusokolola 7:1-9.

Lelo mulandu nshi uwa kupepela ishina lya kwa Lesa ukushishiwa? Cisuma, ukutula pa kupondoka kwa bantunse babili aba kubalilapo mwi bala lya Edene, umuseebanya walituulikwa pe shina lya bulesa. Mu casuko kwi pepo lya musango uyo, Yehova akafumyapo umuseebanya onse uwatala autuulikwa pe shina lyakwe ilya cibukisho. (Ilumbo 135:13) Akacite ci ukupitila mu kufumyapo ububifi bonse ukufuma pe sonde. Ukukuma kuli iyo nshita, Lesa asosele ukupitila muli kasesema Esekiele ukuti: “Nkaikusha no kuishisha no kuilengo kwishibwa ku menso ya nko ishingi; e lyo shikeshibo kuti ni ne Yehova.”—Esekiele 38:23.

Yehova Lesa wa mushilo kabili uwasanguluka. Ishina lyakwe muli ifyo lilingile ukushishiwa, atemwa ukusungwa ilyapaatulwa pamo nge lya mushilo. Akalangilila bumushilo bwakwe pa kubomba ku kuishisha ku cinso ca bubumbo bonse. (Esekiele 36:23) Abo bafwaya ukusenamina kwakwe no bumi bwa muyayaya bafwile ukucindika Yehova mu kuba no mwenso no kushisha ishina lyakwe pa kulisunga ilyapaatulwa ne lyasumbuka ukufuma kuli yambi yonse. (Ubwina Lebi 22:32; Esaya 8:13; 29:23) E ico, Yesu aebele abakonshi bakwe ukupepa abati: “Ishina lyenu lishishiwe” nelyo, “ukumonwa nge lyashila; ukusungwa nge lya mushilo.” Kuti twaba abashininkisha ukuti Lesa akasuka ulu lubali lwe pepo lya cilangililo ilya kwa Yesu.

“Ubufumu Bwenu Bwise”

Yesu na kabili aebele abakonshi bakwe ukupepa abati: “Ubufumu bwenu bwise.” Amapepo ku kwisa kwa Bufumu bwa kwa Lesa mu kukanatwishika yakasukwa. Ubufumu kuteka kwa bumulopwe ukwa kwa Yehova nga fintu kwalumbululwa ukupitila muli kamfulumende ya buMesia iya mu mulu iyaba mu maboko ya Mwana wakwe, Yesu Kristu, na ba kubishanya nabo “abashila.” (Daniele 7:13, 14, 18, 22, 27; Esaya 9:6, 7) Inte sha kwa Yehova pa nshita ntali balishininkisha ukufuma mu Malembo ukuti Yesu abikilwe pa cipuna ca bufumu nge Mfumu mu mulu mu mwaka wa 1914. Mulandu nshi, lyene, untu uuli onse alingile ukupepela Ubufumu ‘ukwisa’?

Ukupepela ukwisa kwa Bufumu mu cishinka kupilibula ukulomba ukuti bwise ku kulwisha bonse bakakaanya ba kuteka kwa bulesa pe sonde. Mu kwangufyanya nomba “ubufumu [bwa kwa Lesa] . . . bukashonaula no kupesha aya mabufumu [aya pe sonde] yonse, kabili bukeminina umuyayaya.” (Daniele 2:44) Uku kulunduluka kukasangwilako ku kucindikwa kwe shina lya kwa Yehova ilya mushilo.

“Ukufwaya Kwenu Kucitwe”

Yesu mu kulundapo akambishe abasambi bakwe ukupepa abati: “Ukufwaya kwenu kucitwe pano nse nga mu mulu.” Uku kuli kwipusha ukuti Yehova abombe mu kumfwana no kufwaya kwakwe kwi sonde. Kwaliba ukwapalako ku kubilisha kwa kwa kemba wa malumbo ukwa kuti: “Conse ico Yehova atemenwe e co acita, mu mulu na pano isonde, muli babemba na matenga yonse; aimya fubefube afumya ku mpela sha calo, acitile mfula inkuba, afumyo mwela umwa kututila mwakwe. E waumine amabeli mu Egupti, aya mu bantu na ya mu nama; atumine ifishibilo ne fipesha amano mu kati ka iwe, we Egupti, pali Farao na pa babomfi bakwe bonse. E waumine inko ishingi, no kubobaule shamfumu isha maka.”—Ilumbo 135:6-10.

Ukupepa ukuti ukufwaya kwa kwa Yehova kucitwe pe sonde kuli kwipusha ukuti abombe imifwaile yakwe ukulola kuli ici cibulungwa. Ici cisanshamo ukufumyapo ukubelelela ukwa bakakaanya bakwe, kwati fye fintu abafumishepo pa cipimo icinono mu nshita sha pa kale. (Ilumbo 83:9-18; Ukusokolola 19:19-21) Amapepo ku kufwaya kwa kwa Yehova ukucitwa ukupulinkane sonde lyonse no kubumbwa konse mu kushininkisha yakasukwa.

Lintu Ubufumu Bwateka

Mu cifulo ca bubifi ubo nomba ubwaanana muli sosaite ya buntunse, cinshi cingenekelwa lintu Ubufumu bwa kwa Lesa bwateka no kufwaya kwa bulesa kwacitwa pe sonde nga mu mulu? Ukulingana no mutumwa Petro, “imyulu ipya ne calo cipya e fyo tulolela, umwaikalo bulungami, umwabele cilayo cakwe.” (2 Petro 3:13) “Imyulu ipya” yaba maka yalungama aya bumupashi ayateka—Yesu Kristu na ba 144,000 impyani shinankwe mu Bufumu bwa mu mulu. (Abena Roma 8:16, 17; Ukusokolola 14: 1-5; 20:4-6) “Icalo cipya” tacili cibulungwa na cimbi ice sonde. Ukucila, caba ni sosaite walungama uwa bantu abekala pe sonde.—Linganyeniko Ilumbo 96:1.

Pe samba lya kuteka kwa Bufumu, isonde likasangulwa muli paradise wa cibulungwa. (Luka 23:43) Abantunse ba cumfwila lyene bakaipakisha umutende wa cine no lubanda. (Ilumbo 72:1-15; Ukusokolola 21:1-5) Kuti waba pa kati ka ayo mabumba nga ca kuti uli ndubulwila wa cishinka uwa kuteka kwa buMesia pa batekwa ba pa calo aba cumfwila. Bandubulwila ba kuteka kwa musango uyo mu mukoosha balapepela ukushishiwa kwe shina lya kwa Yehova, Ubufumu bwakwe ukwisa, no kufwaya kwakwe ukuti kucitwe. Amapepo yabo aya kufuma ku mutima yaba ayashininkishiwa ukwasukwa.