Ukusambilila ku Fyuni na Maluba

BUSHE ilelo cinshi icisakamika abantu mu kucishamo? Ku cinabwingi, caba kukwata fye ifyakumanina ku kupayanishisha ulupwa lwabo nelyo ukuwamyako imikalile yabo.

Na lintu Yesu Kristu aali pe sonde ukukumanisha ififwaikwa mu bumi kwali ca kusakamika cikalamba. Lelo asokele ukuti uku kusakamikwa, ukushalubana mu kwine kweka kuti kwasanguka isakamika lyakulisha ica kuti ne fya ku mupashi fyapooswa ku nse. Ku kulangilila ici cishinka, Yesu aebele abasambi bakwe ukulolekesha ifyuni na maluba.

Ifyuni filakabila ukulya lyonse fye—nga twati tulinganye filalya ifingi ukutucila pa mulandu wa cipimo fibomfeshapo amaka fisangamo. Mu kulundapo, te kuti fitande, ukuseepa, nelyo ukututila mu matala ifya kulya ku ntanshi. Lelo, nga fintu Yesu alandilepo, “[Shifwe] wa mu muulu alafilela.” (Mateo 6:26) Mu kupalako, Lesa alasaamika “bacananika ba mu mpanga” abawamisha.—Mateo 6:28-30.

Yesu atwebekesha ukuti nga twasungilila ifintu fya ku mubili mu cifulo calinga no kupeela ifintu fya ku mupashi icifulo ca ntanshi, Lesa akashininkisha ukuti na kabili twakwata ifya kulya ne fya kufwala ifyalinga. Nga ca kuti Yehova Lesa alasakamana ifyuni na maluba, mu kushininkisha akasakamana abamutemwa kabili ‘ababala ukufwaya ubufumu no bulungami bwakwe.’ (Mateo 6:33) Bushe ulebika amabuseko ya Bufumu bwa kwa Lesa pa ntanshi mu bumi bobe?