Bushe Ifunde lya Mulinganya Lifunde Nshi?

Icasuko ca mu Baibolo

Mu Baibolo tamwaba amashiwi ya kuti “Ifunde lya Mulinganya.” Na lyo line, abantu abengi nga balanda pali ili funde ninshi balelanda pe funde ilyo Yesu asambilishe. Ilyo Yesu alelanda Ilyashi lya pa Lupili, atile: “Fyonse ifyo mufwaya abantu ukuti balemucitila, e fyo na imwe mulebacitila.”—Mateo 7:12; Luka 6:31.

• Bushe Ifunde lya Mulinganya lyalola mwi?

• Bushe Ifunde lya Mulinganya litwafwa shani?

• Bushe Ifunde lya Mulinganya lilanda sana pa fyo twingapoka ku bantu?

• Kuti mwabomfya shani ifyaba mwi Funde lya Mulinganya?

Bushe Ifunde lya Mulinganya lyalola mwi?

Ifunde lya Mulinganya lyalola mu kuti tulingile ukucitila abantu ifyo twingafwaya ukutucitila. Ku ca kumwenako, abantu abengi balatemwa nga ca kuti abantu balebacindika, balebalanga icikuuku, e lyo no kubatemwa. Kanshi ifyo nga e fyo tufwaya abantu baletucitila ninshi ‘e fyo na ifwe tufwile’ ukulacitila abantu.—Luka 6:31.

Bushe Ifunde lya Mulinganya litwafwa shani?

Ifunde lya Mulinganya lilabomba mu fintu ifingi sana. Ku ca kumwenako kuti lyabomba . . .

• Ukukosha icupo.—Abena Efese 5:28, 33.

• Ukwafwa abafyashi ukukusha bwino abana.—Abena Efese 6:4.

• Ukulenga ifibusa, abena mupalamano, e lyo na babombela pamo ku ncito ukulaumfwana bwino.—Amapinda 3:27, 28; Abena Kolose 3:13.

Ifunde lya Mulinganya lyalipalana sana ne fingi ifyaba mu mabuuku abantu beta no kuti Icipingo ca Kale. Yesu atile muli ili funde “e mwalola amashiwi yaba mu mabuuku ya Mafunde [amabuuku ya kubalilapo 5] na ya Bakasesema [amabuuku ya bakasesema].” (Mateo 7:12) Mu mashiwi yambi, amafunde yonse ayaba mu Cipingo ca Kale yaingila mwi Funde lya Mulinganya e kutila: ukutemwa abanensu.—Abena Roma 13:8-10.

Bushe Ifunde lya Mulinganya lilanda sana pa fyo twingapoka ku bantu?

Awe. Ifunde lya Mulinganya lilanda sana pa kupeela. Ilyo Yesu alandile pe Funde lya Mulinganya, talelanda fye pa fyo tufwile ukulacitila abantu, lelo alelanda na pa fyo tufwile ukucitila abalwani besu. (Luka 6:27-31, 35) Kanshi Ifunde lya Mulinganya litukoselesha ukulacitila abantu bonse ifisuma.

Kuti mwabomfya shani ifyaba mwi Funde lya Mulinganya?

1. 1. Mulebika amano ku bantu. Ku ca kumwenako, kuti mwamona umuntu afuma mu kushita fimo nomba nafimushupa ukusenda, nalimo kuti mwaumfwa ukuti umwina mupalamano wenu nalwala ali mu cipatala, nelyo kuti mwamona ukuti uo mubomba nankwe ali no bulanda. Nga ‘mulebika amano na ku fyo bambi bafwaya,’ mwa kulamona ilyo mwingalanda nelyo ilyo mwingacita ifingakoselesha abantu.—Abena Filipi 2:4.

2. 2. Mulelangulukilako abantu. Mule-esha ukwelenganya ifyo mwingomfwa nga ca kuti ifyo bambi balepitamo ni mwe fyalecitikila. Bushe kuti mwaumfwa shani? (Abena Roma 12:15) Nga ca kuti muleumfwikisha ifyo abantu bambi balepitamo, mwakulafwaisha ukubafwa.

3. 3. Mwilaumina kumo. Lyonse muleibukisha ukuti abantu balipusanapusana. Ifyo abantu bambi bengafwaya ukubacitila kuti fyapusana ne fyo mwingafwaya ukumucitila. Kanshi ilyo mulesala ifyo mwingabacitila muletontonkanya pa fyo bengafwaya sana ukubacitila.—1 Abena Korinti 10:24.