Bushe Tufwile Ukucitila Bambi Ifisuma Nelyo Ukutaluka fye ku Kubacite Fyabipa?
“IFYO mushilefwaya bambi bamucitile, mwilacitila bambi.” Uwalandile aya mashiwi pa lwa mibele isuma ni Confucius, kafundisha walumbuka umwina China kabili uwa mano ya pano nse. Pali leelo, mupepi ne myaka 2,500 iyapita, abengi bacili basumina ukuti umuntu aba umulungami nga ca kuti ataluka fye ku kucita ifingakalifya bambi.
Ca cine, muli aya mashiwi ya pa mibele isuma ayalandile confucius, mwaliba ubusuma bumo. Lelo, Baibolo ilanda icintu na cimbi pa mibele ya bantu ne fyo babishanya na bambi. Ukulunda pa co twingatila ukucita ulubembu, e kuti ukubembukila umunensu, Baibolo ilanda na pa lubembu lwa kukanacita icalungama. Umutumwa wa Bwina Kristu Yakobo alembele ati: “Ngo muntu alishiba ukucita icalungama lelo tacita, cena lubembu kuli wene.” (Yakobo 4:17) E co Yesu Kristu taebele Abena Kristu ukutaluka fye ku kucita ifyabipa kuli bambi, lelo abafundile no kuti: “Fyonse ifyo mufwaya abantu bacite kuli imwe, e fyo na imwe mucite kuli bene.”—Mateo 7:12.
Ubufwayo bwa kwa Lesa pa kubalilapo bwali bwa kuti abantunse bonse balecita kuli bambi ifyo bengatemwa bambi ukubacitila. Inshila abumbiilemo abantunse yalitulanga bwino bwino ifya kusakamana bambi. Baibolo itila: “Lesa alengele umuntu mu cata cakwe, mu cata ca kwa Lesa e mo amulengele; umwaume no mwanakashi e fyo abalengele.” (Ukutendeka 1:27) Ici cilelangilila ukuti Lesa mu kutemwa kwakwe abikile kampingu mu bantunse, uyo nga ca kuti akanshiwa bwino, kuti abalenga ukucita kuli bambi ifyo bafwaya bene babacitile.
Abaibililika ndakai balacusha abengi abashakwata isubilo lya kufuma muli aya mafya kabili ababula no wa kubaafwa. Kanshi, icikabilwa te kutaluka fye ku kucita ifyabipa kabili ifingakalifya bambi, lelo, kucita icisuma kabili icingabafwa. Pa mulandu wa ici, Inte sha kwa Yehova mu kuitemenwa baliipeelesha ukwafwa bambi ukusambilila pe subilo lishaiwamina ilisangwa mu Cebo ca kwa Lesa. Ilyo batandalila abena mupalamano pa kuti babebeko imbila nsuma ya mu Baibolo, bacite co mu kutemwa, bacitila bambi ifyo bengatemwa bambi ukubacitila.