Sambilileniko Ku Fyo Yesu Acitile Ilyo Bamutunkile

Ilyo Yesu bamubatishe kuli Yohane, tapapitile na nshita, umupashi wa kwa Lesa wamutungulwile mu matololo ya Yudea. Alikwete ifingi ifya kutontonkanyapo. Ilyo Yesu abatishiwe, “umuulu waliswike.” (Mateo 3:16) Ici calengele ebukishe ifyo asambilile ne fyo alecita ilyo ali ku muulu. Kanshi fingi aletontonkanyapo!

Yesu aikele mu matololo inshiku 40, akasuba no bushiku. Pali iyi nshita yonse talilepo nangu kamo. Ilyo Yesu aumfwile sana insala, Satana Kaseebanya aile kuli ena no kumweba ati: “Nga uli mwana wa kwa Lesa, eba aya mabwe yabe imikate.” (Mateo 4:3) Apo alishibe ukuti te cisuma ukubomfya amaka ya kucita ifipesha amano pa kuti fye aisekeshe umwine, Yesu alikeene ukucita ifyo Satana amwebele.

Satana alikonkenyepo ukumutunka. Abomfeshe inshila imbi. Aebele Yesu ukuti atoloke ukufuma pa muulu we tempele. Lelo Yesu alikeene ukutoloka pa kuti fye ailange ku bantu. Ayaswike Satana ati, Amalembo yalikaanya ukwesha Lesa muli ulya musango.

Lyena umuku walenga butatu, Kaseebanya alangile Yesu “amabufumu yonse aya pano calo no bucindami bwa yako” no kumweba ati: “Fyonse ifi ndekupeela nga wafukama no kumpepa.” Yesu na kabili alikaaninine fye ndai. Atile: “Fuma apa, we Satana!” (Mateo 4:8-10) Alikeene ukucita ici cintu cabipa, pantu alishibe ukuti Yehova e walingile fye ukupepwa. Kanshi ico alefwaya, kuba uwa cishinka kuli Lesa.

Kuti twasambililako kuli aya matunko e lyo na ku fyo Yesu acitile ilyo atunkilwe. Aya mesho yali ya cine, ne ci citulanga ukuti Kaseebanya muntu uwa cine cine uushimoneka, te bubi fye ubwaba mu bantu. Ili ilyashi litulanga no kuti amabufumu, ya kwa Satana, e uyatungulula. Nga te yakwe, bushe ukweba Kristu ukuti nalakupeela amabufumu nga wampepa kuti kwaba litunko?

E lyo kabili, Kaseebanya aebele Yesu ati nga amupepako fye panono, alamupeela amabufumu yonse fye aya pano calo. Na ifwe, Kaseebanya kuti afwaya ukututunka ukucita fimo ifyabipa pa kuti tukwate ifintu ifimoneka kwati fisuma sana, pamo nga ifyuma, amaka ne cifulo ca pa muulu. Kuti cawama sana nga ca kutila twapashanya Yesu no kutwalilila ukuba aba cishinka kuli Lesa lyonse ilyo twatunkwa! Lelo ibukisheni ukuti, nangu ca kuti Kaseebanya alishiile Yesu, ali no kumutunka na kabili pa “nshita imbi iyalinga.” (Luka 4:13) Na ifwe bene kuti atutunka na kabili pa nshita imbi, kanshi tufwile ukuba abalola lyonse.