Bushe ‘Mwalitemwa’ Ukwafwa Bambi?
1 Yesu cine cine alisakamene abantu. Ilyo uwa fibashi amupaapete ukuti amwafwe, Yesu atambike ukuboko kwakwe, amukumya, no kutila: “Nintemwa; usangululwe.” (Marko 1:40-42) Ni mwi twingapashanya Yesu ukwafwa bambi?
2 Aba Kusekelela: Bonse ababa mu cilonganino balikwata umulimo wa kwafwa aba kusekelela pa kuti bengaba bakapepa ba kwa Yehova. Ilyo abapya baisa ku kulongana, baposheni kabili beshibeni. Fwayeni inshila ya kubakoseleseshamo. Batasheni pa fyo basukapo. Batasheni pa fyo balebombesha ukubomfya ifishinte fya mu Baibolo mu mikalile yabo. Bafweni bamone ukuti bakapanga ifibusa fine fine mu cilonganino.
3 Abasumina Banensu: ‘Aba bwananyina bwa mu citetekelo’ e bo maka maka tufwile ukwafwa mu fingi. (Gal. 6:10) Abengi balashomboka na malwele. Nga mwabatandalila ku kubakoselesha, kuti mwabalenga ukumwenamo mu kubishanya bwino kabili nalimo kuti mwabafwako na muli fimo. Bamo kuti nabakwata amafya yambi mu mikalile yabo. Langeni ukuti mulabasakamana pa kupoosako inshita ya kukutika ifyo balelanda kabili bakoselesheni. (1 Tes. 5:14) Na baeluda bene balafwaya ukubombela pamo na bo ilyo balebomba imilimo yabo. (Heb. 13:17) Nga tulelanga umutima wa kuitemenwa kabili uwa kwafwa, tukaba ‘icisansamushi’ ku basumina banensu.—Kol. 4:11.
4 Aba mu Lupwa: Na kabili tufwile ukubombesha pa kupashanya ifyo Yesu alesakamana abantu bambi ilyo tulesakamana aba mu lupwa lwesu mwine. Ukusakamana kwine kwine kulenga abafyashi ‘ukukusha abana babo mu kufunda no kukonkomesha kwa kwa Shikulu.’ (Efes. 6:4) Abana kuti babomba ulubali lwabo pa kuiteyanya bwangu ilyo inshita yakumana iye sambililo lya lupwa, ukulongana kwa cilonganino, nelyo umulimo wa mwi bala. Abana abakulu kuti bapashanya inkumbu sha kwa Yesu pa kwafwa abafyashi babo ukushipikisha amafya yesa ku mulandu wa bukote. Muli ishi nshila ne nshila shimbi, ifwe bonse kuti ‘twacita aba ng’anda yesu iine umwabela bukapepa.’—1 Tim. 5:4.
5 Ilyo twapashanya Yesu mu kwafwa bambi, nalimo kuti twayafwilisha ukucefyako amafya kabili tulekatanya indupwa shesu ne cilonganino ciine. Ne cacindamisha ca kutila, tupeela Yehova umucinshi, “Shifwe wa nkumbu.”—2 Kor.1:3.