Ilyo Abena Kristu Babanyunga nge Ng’anu

LINTU Yesu ali mupepi fye no kufwa, asokele abasambi bakwe ukuti: ‘Moneni! Satana alefwaisha ukumwela nge ngano.’ (Luka 22:31) Bushe aloseshe mwi?

Mu nshiku sha kwa Yesu, umulimo wa kulobolola ing’anu wali mulimo uwakosa. Ico abalelobolola balebalilapo kucita, kufumya ing’anu mu mabala. Lyena, balepuma ing’anu, e lyo limo balebomfya ilibwe lyafina ilyo bakakile ku mipeto iyo inama shaletinta. Ili libwe lyalelekanya, impimbili, inseke, ne misungu. Pa numa ya kucite fi, abalimi baleulusha ing’anu. Ing’anu shaleponena apa kupuulila, e lyo imisungu yena yaleuluka. Mu kulekelesha, balepunga nelyo ukunyunga ing’anu bwino bwino pa kuti bafumyeko ifikwi.

Nga filya fine Yesu alandile, Satana atwalilile fye ukusansa abasambi ba kwa Yesu, kabili na ino ine nshita alatusansa. (Efes. 6:11) Kwena, amafya yonse ayo tupitamo tayafuma kuli Satana mu kulungatika. (Luk. Mil. 9:11) Na lyo line, Satana afwaisha ukucita icili conse icingalenga twaleka ukuba aba cishinka kuli Lesa. Kuti atutunka ukuti tulefwaisha sana ukunonka ifyuma, ukusala ifya kuleseshamo icitendwe ifingatonaula, nelyo ukuti atutunka ukucita ubulalelale. Na kabili kuti abomfya abo tusambilila na bo nelyo abo tubomba na bo na balupwa abashipepa ukututunka ukuti tubike sana amano ku masambililo ne ncito ifya muli cino calo. Na kabili Satana kuti alenga abantu ukulatucusha pa kuti tuleke ukuba aba cishinka kuli Lesa. Kwena kwaliba ifingi ifyo Satana acita pa kufwaya ukutwela nga filya bela ing’anu.

Bushe kuti twacita shani pa kulwisha uyu mulwani wa maka? Te kuti tumucimfye ku maka yesu. Satana alikwata amaka ukutucila; lelo twalishiba ukuti Yehova wa maka nga nshi ukucila Satana. Nga twacetekela sana Yehova, ukulomba amano na maka ya kushipikisha amesho, no kushintilila pa butungulushi bwakwe, akatupeela amaka ya kulwisha Satana.—Amalu. 25:4, 5.

Ilyo tuleeshiwa, tufwile ukwishiba ifya “kulekanya icalungama ne cabipa” pa kuti Satana tatulufishe ku micenjelo yakwe. (Heb. 5:13, 14) Yehova kuti atwafwa ukwishiba ifya kulekanya icalungama ne cabipa. Lyena tufwile ukutwalilila ukucita icalungama, te mulandu ne cingacitika. Nga tulekonka ubutungulushi bwakwe, Yehova akulatwafwa ukutwalilila ukucita icalungama.—Efes. 6:10.

Satana kuti afwaya ukutwela nga filya bela ing’anu. Lelo ku maka ya kwa Yehova kuti twamukaanya, no kwiminina ndi mu citetekelo. (1 Pet. 5:9) Na kuba, Icebo ca kwa Yehova citweba ukuti: “Kaaneni Kaseebanya, na o akamufulumuka.”—Yako. 4:7.