Yesu amwebele ati: “Wayasuka bwino; ulecita ifyo fine kabili ukaba no bumi.” Lelo apa te papelele ilyashi. Yesu alimulondolwelele na fimbi pantu uyu mwaume alefwaya “ukuilungamika,” kabili alefwaya Yesu amone ukuti ifyo aishibe fyali fya cine no kuti ifyo alecita ku bantu banankwe fyali fye bwino. E calengele epushe Yesu ukuti: “Nga kanshi umunandi nani?” (Luka 10:28, 29) Ici cipusho icamoneke kwati tacakosele, calisokolwele ifyo uyu mwaume asumiine. Casokolwele shani?

AbaYuda balemona kwati abo bengeta ukuti ‘abanabo,’ ni balya abalekonka intambi sha baYuda, kabili balemona kwati amashiwi yaba pa Ubwina Lebi 19:18 e fyo yalanda. Na kuba abaYuda baleti ‘ifunde talyabasuminishe’ ukumfwana na bashali baYuda. (Imilimo 10:28) E ico uyu mwaume nalimo na basambi ba kwa Yesu bamo, baleimona abalungami pa mulandu wa kuti balecitila abaYuda banabo ifisuma, lelo abashali abaYuda tabalebacitila ifisuma pantu baleti tabali ‘abanabo.’

Ala Yesu alimusambilishe bwino sana! Nga ca kuti Yesu amwebele fye ukuti na bashali baYuda bene baali banankwe, bushe uyu mwaume na baYuda bambi nga balisumiine? Nalimo nga tabasumiine. Lelo, filya ashimike ilyashi ilipi umo alandile pa fintu ifyo balya bantu baishibe, alibafwile ukwishiba icasuko ku cipusho ca kuti “Nga kanshi umunandi nani?” Kanshi umuntu uwaba no kutemwa e lyo ne cikuuku ifyo Amalembo yatweba ukukwata, e munensu.