“Tasosele Kuli Bene Apabulo Mulumbe”

¹⁴ Ica bubili, ibukisheni umulumbe wa mwina Samaria musuma. Pa kutampa Yesu atile: “Umuntu umo afumine ku Yerusalemu, alatentemukila ku Yeriko; awilile na mu fipondo no kushingwa; ilyo fyamufuula no kumupume mpumo, fyafuminepo no kumushe mpondo.” (Luka 10:30) Yesu alandile pa nshila ‘yafumine ku Yerusalemu ukuya ku Yeriko’ ku kwafwa ukumfwikisha icishinka cakwe. Pa kushimika uyu mulumbe, aali mu Yudea, ukushali ukutali sana na ku Yerusalemu; kanshi bakoomfwa wakwe bafwile balishibe inshila alelandapo. Iyi nshila yaishibikwe bubi bubi, maka maka ku muntu uleenda eka. Mwali ifinshoko ifingi ukupulinkana mu mpanga yatalalila kabili calelenga mulesangwa ifipondo.

¹⁵ Pali na cimbi icacindama pali filya Yesu alandile pa nshila ‘yafumine ku Yerusalemu, ukutentemukila ku Yeriko.’ Ukulingana no yu mulumbe, intanshi shimapepo e wapitile muli ilya nshila e lyo pakonkele umwina Lebi—nangu ca kuti bonse babili tabaiminine ku kwafwa uwapuminwe. (Luka 10:31, 32) Bashimapepo balebombela pe tempele mu Yerusalemu, no mwina Lebi aleafwa bashimapepo. Bashimapepo abengi na bena Lebi baleikala ku Yeriko ilyo bashilebomba pe tempele, pantu Yeriko yatalwike fye amakilomita 23 ukufuma ku Yerusalemu. Kanshi, ukwabula no kutwishika inshita shimo balepita ilya nshila. Moneni no kuti, ulya shimapepo no mwina Lebi ‘baletentemuka’ mu nshila ilya, e kutila balefuma kwi tempele. E ico tapali uwingatila kulya kusuulako kwa balya bantu kwali fye bwino pantu, ‘Tabalefwaya ukusakamana ulya mwaume wacenenwe ico alemoneka ngo wafwa, kabili ukwikata icitumbi nga kwalibakoweseshe no kubalenga ukukanabomba pe tempele pa nshita inono.’ (Ubwina Lebi 21:1; Impendwa 19:11, 16) Bushe tacimoneke fye apabuuta ukuti imilumbe ya kwa Yesu yalelanda pa fintu bakoomfwa wakwe baishibe?